Lalai 96 - ŊMALƐ KRƆŊKRƆŊ LƐ

Nyɔŋmɔ ji Maŋtsɛ Ofe

¹ Oo, nyɛlaa lala hee nyɛhãa Yehowa! Jeŋ fɛɛ, nyɛlaa nyɛhãa Yehowa!

² Nyɛlaa nyɛhãa Yehowa, nyɛjiea egbɛi lɛ yi! Nyɛgbaa wɔyiwala ni ehere he sane lɛ gbi fɛɛ gbi.

³ Nyɛshiɛa enunyam lɛ, yɛ majimaji lɛ ateŋ! Nyɛgbaa naakpɛɛnii ni efee lɛ nyɛtsɔa mɛi fɛɛ!

⁴ Ejaakɛ Yehowa je agbo, ni esa yijiemɔ babaoo, ni esa akɛ asheɔ lɛ gbeyei fe nyɔŋmɔi fɛɛ.

⁵ Ejaakɛ maji krokomɛi anyɔŋmɔi lɛ, amãgãi ni; shi Yehowa ji mɔ ni bɔ ŋwɛii amli ŋwɛi lɛ.

⁶ Anunyam kɛ agbojee ebɔle ehe, hewalɛ kɛ fɛo eyi ehe krɔŋkrɔŋ lɛ obɔ̃.

⁷ Oo maji amli wekui, nyɛkafoa Yehowa; nyɛkafoa enunyam kɛ hewalɛ lɛ!

⁸ Nyɛkɛ anunyam ni sa Yehowa gbɛi lɛ ahãa lɛ; nyɛhiɛa afɔlei kɛbaa, nyɛbaa ekpoi lɛ anɔ!

⁹ Je lɛ fɛɛ, nyɛkotoa kɛjaa Yehowa kɛji epue yɛ egbojeiaŋ! Nyɛ shikpɔŋ lɛ nɔ bii fɛɛ, nyɛhe akpokpoa yɛ ehiɛ!

¹⁰ Nyɛkɛa yɛ majimaji lɛ ateŋ akɛ, “Yehowa miiye maŋtsɛ! No hewɔ je lɛ ma shi shiŋŋ, ni anyɛŋ lɛ ahoso. Eeekojo gbɔmɛi yɛ jalɛ naa.”

¹¹ Ŋwɛi anya! Ni shikpɔŋ lɛ mli afili lɛ! Hã ŋshɔ ahũu kɛ emli nibii fɛɛ!

¹² Ŋa abɔ oshe kɛ nɔ fɛɛ nɔ ni yɔɔ emli! Kɛkɛ lɛ kooŋ tsei fɛɛ aaala kɛ miishɛɛ,

¹³ yɛ Yehowa hiɛ ejaakɛ eeba; eeba koni ebakojo shikpɔŋ lɛ. Ebaakojo je lɛ yɛ jalɛ naa; ebaakojo adesa yɛ anɔkwayeli naa.