Lalai 94 - ŊMALƐ KRƆŊKRƆŊ LƐ

Nyɔŋmɔ ji mɛi fɛɛ akojolɔ

¹ Oo Yehowa, bo Nuŋtsɔ ni otɔɔ owele, bo Nyɔŋmɔ ni otɔɔ owele, hã ana omlifu.

² Oo je lɛ kojolɔ, wo ohe nɔ, koni owo hewolɔi lɛ nyɔmɔ bɔ ni sa amɛ.

³ Oo Yehowa, mɛɛ beyinɔ, mɛɛ beyinɔ nɔŋŋ ni mɛi fɔ̃ji lɛ aaanya kɛyashi?

⁴ Amɛwieɔ amɛdaa obɔ̃, amɛwieɔ hewoo wiemɔi; mɛi ni feɔ nishaianii lɛ fɛɛ shwãa.

⁵ Oo Yehowa, amɛmiinaanaa owebii lɛ anɔ, ni amɛmiipiŋ omɛi lɛ.

⁶ Oo Yehowa, amɛgbeɔ yoo okulafo kɛ gbɔi, ni amɛgbeɔ awusai hu,

⁷ ni amɛkɛɔ akɛ “Yehowa enaaa, ni Yakob Nyɔŋmɔ lɛ yooo sɛɛ.”

⁸ Oo, nyɛ maŋ lɛŋ kwashiai, nyɛyoa sɛɛ! Ni nyɛ, buului, te be ni nyɛaale nii lɛ?

⁹ Lɛ mɔ ni ebɔ toi lɛ, aso enuuu nii? Lɛ mɔ ni ebɔ hiŋmɛi lɛ, aso enaaa nii?

¹⁰ Lɛ mɔ ni ekuneɔ jeŋ maji lɛ, aso etsɔseee mɔ lo?

¹¹ Lɛ mɔ ni etsɔ̃ɔ gbɔmɛi anii lɛ, lɛ Yehowa lɛ, eleee akɛ gbɔmɔ jwɛŋmɔ lɛ kɔɔyɔɔ kɛkɛ ni lo?

¹² Ajɔɔ gbɔmɔ ni bo, Yehowa, otsɔ̃ɔ lɛ nii, gbɔmɔ ni ojɛɔ omla lɛ mli otsɔ̃ɔ lɛ nii lɛ,

¹³ bɔ ni afee ni ohã ehe ajɔ lɛ fioo, yɛ fimɔ gbii amli, kɛyaashi aaatsa bu ni akɛdu mɔ fɔŋ lɛ.

¹⁴ Ejaakɛ Yehowa kwaŋ emaŋ lɛ, ejeŋ emɛi lɛ asɛɛ,

¹⁵ ejaakɛ aaaku sɛɛ aye jalɛ sane yɛ kojomɔhei lɛ, ni jalɔi fɛɛ aaafĩ sɛɛ kɛ amɛtsuiŋ fɛɛ.

¹⁶ Namɔ aaate shi awo efɔŋfeelɔi ahã mi? Namɔ aaadamɔ shi ashi mɛi ni tsuɔ nishaianii ahã mi?

¹⁷ Kɛjeee Yehowa ni ye bua mi lɛ, kulɛ benɛ misusuma yɛ gbohiiaje kpoo.

¹⁸ Be ni mikɛɛ akɛ, “Miishane lɛ!” Yehowa, osuɔmɔ ni sɛɛ efooo lɛ mɔ mimli.

¹⁹ Kɛji mikɔmɔyeli fa yɛ mimli lɛ, oshɛjeɔ mimii, ni mimii shɛɔ mihe.

²⁰ Ani kojolɔi fɔ̃ji aaanyɛ amɛkɛ bo abɔ, amɛ mɛi ni tsɔ̃ɔ mla moŋ nɔ kɛfeɔ nɔ fɔŋ lɛ?

²¹ Amɛkpãŋɔ jalɔ yinɔ, ni amɛbuɔ lá ni efeko efɔŋ ko gbele fɔ.

²² Shi Yehowa ji mimɔɔ ni wa, ni miNyɔŋmɔ lɛ ji mibobaa tɛsaa.

²³ Ebaahã amɛnishaianii lɛ abua amɛ diɛŋtsɛ amɛyiteŋ; ni eeekpãtã amɛhiɛ yɛ amɛnifɔɔjianii lɛ ahewɔ. Yehowa, wɔNyɔŋmɔ lɛ aaabɛɛ amɛ ashwie.