Lalai 9 - ŊMALƐ KRƆŊKRƆŊ LƐ

Shidaa ahã Nyɔŋmɔ yɛ jalɛ saneyeli hewɔ

David Lala ni ekɛha lalatsɛ nukpa lɛ ni akɛ Muth-labben gbee ala.

¹ Mada Yehowa shi kɛ mitsui fɛɛ, ni magba onaakpɛɛ nitsumɔi lɛ matsɔ̃ɔ.

² Ohewɔ lɛ manya; ni mimli aaafli mi. Bo Ofe ni oyɔɔ ŋwɛi flooflo, mala, ni majie ogbɛi lɛ yi.

³ Mihenyɛlɔi lɛ ku amɛsɛɛ; amɛgbeegbee shi, ni amɛplene yɛ ohiɛ.

⁴ Anɔkwale kɛ jalɛ saneyelɔ ji bo yɛ okojomɔ mli. Ota omaŋtsɛ sɛi lɛ nɔ ni oye jalɛ sane ohã mi.

⁵ Okã majimaji lɛ ahiɛ, okpãtã mɛi fɔ̃ji lɛ ahiɛ. Ogbe amɛgbɛi kwrakwra kɛmiiya naanɔi anaanɔ.

⁶ Henyɛlɔi lɛ asɛɛ efo kɛmiiya naanɔ; obutu amɛmaji wuji lɛ; ni kaimɔ po, akaiŋ amɛ dɔŋŋ.

⁷ Shi Yehowa lɛ, lɛ lɛ, eeye maŋtsɛ kɛmiiya naanɔ; emaŋtsɛ sɛi lɛ ma shi shiŋŋ kɛhã kojomɔ.

⁸ Ekojoɔ je lɛ yɛ jalɛ naa, ekwɛɛɛ hiɛaŋ ekojooo mɛi.

⁹ Yehowa ji abobaahe hã mɛi ni awaa amɛ yi lɛ, eji abobaahe yɛ fimɔ bei amli.

¹⁰ Ni mɛi ni le ogbɛi lɛ ŋɔɔ amɛhiɛ amɛfɔ̃ɔ onɔ; ejaakɛ bo Yehowa, okwaaa mɛi ni taoɔ osɛɛgbɛ lɛ.

¹¹ Nyɛlaa nyɛjiea Yehowa ni yɔɔ Zion lɛ yi! Nyɛgbaa enitsumɔi lɛ yɛ majimaji lɛ amli.

¹² Ejaakɛ lɛ mɔ ni etɔɔ lá he owele lɛ, ekaiɔ mɛi ni piŋɔ; ni ehiɛ kpaaa nɔnalɔi abolɔmɔ nɔ.

¹³ Oo Yehowa, naa mi mɔbɔ! Kwɛmɔ mimanehulu ni minaa yɛ mɛi ni nyɛɔ mi lɛ adɛŋ. Oo, bo mɔ ni owoɔ minɔ kɛjɛɔ gbohiiaje agboi lɛ amli,

¹⁴ koni majaje oyijiemɔi lɛ fɛɛ yɛ Yerusalɛmbii lɛ agboi lɛ amli, mimli aaafli mi, ejaakɛ ohere miyiwala.

¹⁵ Jeŋ maji lɛ egbee bu ni amɛ nɔŋŋ amɛtsa lɛ mli. Tsɔne ni amɛtsɔ̃ amɛtee lɛ edu amɛ.

¹⁶ Yehowa kɛ ejalɛ kojomɔ ehã ale lɛ; mɛi fɔ̃ji edu tsɔne ni amɛ diɛŋtsɛ amɛtsɔ̃ lɛ.

¹⁷ Mɛi fɔ̃ji kɛ mɛi fɛɛ ni hiɛ kpaa Nyɔŋmɔ nɔ lɛ baaya gbohiiaje.

¹⁸ Shi ohiafo lɛ, jeee daa hiɛ aaakpa enɔ, ohiafo hiɛnɔkãmɔ efeŋ yaka, kɛyaŋ naanɔ.

¹⁹ Oo, Yehowa, tee shi; kaahã adesa miiye kunim. Hã ni akojo majimaji lɛ yɛ ohiɛ.

²⁰ Oo Yehowa, wo amɛhe gbeyei koni majimaji lɛ ana ale akɛ gbɔmɛi adesai kɛkɛ ji amɛ.