Lalai 85 - ŊMALƐ KRƆŊKRƆŊ LƐ

Sɔlemɔ hã maŋ ejurɔyeli

Korahbii alala ko.

¹ Yehowa, ona oshikpɔŋ lɛ mɔbɔ; ohã Israel esaa eshwere ekoŋŋ.

² Okɛ omaŋ lɛ he eshai lɛ efa amɛ, ni okɛ amɛtɔ̃mɔi lɛ fɛɛ efa amɛ.

³ Ofo omli ni fu amɛ lɛ sɛɛ, ni oŋmɛɛ omlila kpele lɛ he.

⁴ Oo wɔyiwalaheremɔ Nyɔŋmɔ, ŋɔɔ wɔ oto wɔtoohe ekoŋŋ ni ofo omli ni efu wɔ lɛ sɛɛ!

⁵ Aso omli aaafu wɔ kɛaatee naanɔ? Oookã omlifu lɛ he kɛaaya yinɔi fɛɛ nɔ?

⁶ Aso ohaŋ wɔyi ana wala ekoŋŋ, koni omaŋ lɛ anya kɛkafo bo?

⁷ Oo Yehowa, hã wɔna osuɔmɔ ni sɛɛ efooo lɛ, ni ohã wɔyi ana wala!

⁸ Hã mabo nɔ ni Nuŋtsɔ Nyɔŋmɔ aaawie toi, ejaakɛ ekɛ emaŋ lɛ kɛ ehetselɔi lɛ kɛ mɛi ni kuɔ amɛsɛɛ kɛbaa eŋɔɔ kɛ amɛtsui fɛɛ lɛ, baawie hejɔlɛ wiemɔ.

⁹ Lɛɛlɛŋ efee kralo kɛbaahere mɛi ni sheɔ lɛ gbeyei lɛ ayiwala koni anunyam ahi wɔshikpɔŋ lɛ nɔ.

¹⁰ Suɔmɔ ni tsakeee kɛ anɔkwayeli baakpe; ni jalɛ kɛ toiŋjɔlɛ aaafua amɛhe atuu.

¹¹ Anɔkwayeli aaakwɛ̃ kɛaajɛ shikpɔŋ, ni jalɛ aaajɛ ŋwɛi egboo ehiɛ shi ekwɛ.

¹² Hɛɛ! Yehowa aaaŋɔ nɔ kpakpa ehã, ni wɔshikpɔŋ lɛ aaaba nii babaoo.

¹³ Jalɛ saneyeli aaatsɔ̃ Yehowa hiɛ eba; ni ebaasaa gbɛ ehã lɛ.