Lalai 84 - ŊMALƐ KRƆŊKRƆŊ LƐ

Shwe ni ashweɔ Nyɔŋmɔ We lɛ

Kɛha lalatsɛ nukpa lɛ. Korahbii alala ko.

¹ Yehowa, Taiatsɛ, kwɛ bɔ ni oSɔlemɔ we lɛ yɔɔ akɔnɔ hã!

² Misusuma hiɛ miitse Yehowa kpoi lɛ anɔ; hiɛtselɛ lɛ hãa misusuma tɔɔ biti po. Mikɛ mitsui kɛ migbɔmɔtso fɛɛ laa kɛ miishɛɛ hãa Nyɔŋmɔ hiɛkãalɔ lɛ.

³ Aflimata po naa eshihilɛhe; ni nyɔŋmɔbitɛte hu naa etsu he ni ekɛ ebii aaato yɛ ofɔleshãa latɛi lɛ ahe! Oo Yehowa, Taiatsɛ, mimaŋtsɛ kɛ miNyɔŋmɔ,

⁴ kwɛ bɔ ni mɛi ni hiɔ owe lɛ yɔɔ miishɛɛ hã, ni amɛlaa daa kɛjieɔ oyi.

⁵ Ajɔɔ mɛi ni odɛ̃ŋ amɛhewalɛ jɛɔ, mɛi ni gbɛfãa kɛyaa Zion Gɔŋ nɔ lɛ kã amɛtsui nɔ.

⁶ Kɛji amɛnyiɛ Baka jɔɔ lɛŋ kɛmiiho lɛ, amɛhãa jɛi tsɔ̃ɔ nuhiŋmɛi; ni Agbiɛnaa nu taraa shi yɛ jɛi.

⁷ Amɛnyiɛɔ ni amɛhewalɛ nɔ gbɔɔɔ; amɛyanaa nyɔŋmɔi amli Nyɔŋmɔ lɛ yɛ Zion.

⁸ Oo Yehowa, Tai aNyɔŋmɔ, bo misɔlemɔ lɛ toi! Oo Yakob Nyɔŋmɔ, feemɔ toi ohã mi!

⁹ Oo Nyɔŋmɔ, jɔɔmɔ wɔmaŋtsɛ lɛ, jɔɔmɔ mɔ ni ofɔ lɛ mu lɛ.

¹⁰ Gbi kometoo shihilɛ yɛ oSɔlemɔ we lɛ, ehi fe gbii akpe ni aaaye yɛ he kroko. Masumɔ matsɔ̃ shinaa naabulɔ yɛ miNyɔŋmɔ lɛ we lɛ, fe nɔ ni mahi efɔŋfeelɔi awe mli.

¹¹ Ejaakɛ Yehowa, Nyɔŋmɔ lɛ, hulu kɛ tsɛŋ fɛɛ ji lɛ; eduroɔ mɔ, ni ewoɔ mɔ hiɛ nyam. Mɛi ni feɔ nɔ ni ja gbɛ lɛ Yehowa kãmãaa amɛ nɔ kpakpa ko nɔ kpakpa ko.

¹² Oo Yehowa, Taiatsɛ, ajɔɔ gbɔmɔ ni kɛ ehiɛ fɔ̃ɔ onɔ lɛ!