Lalai 75 - ŊMALƐ KRƆŊKRƆŊ LƐ

Nyɔŋmɔ ji kojolɔ

Asaf lala ko ni ekɛha lalatsɛ nukpa lɛ.

¹ Oo Naa Nyɔŋmɔ, wɔmiida bo shi! Wɔmiida bo shi! Ejaakɛ obɛŋkɛ wɔ; wɔgbaa onaakpɛɛ nitsumɔi lɛ.

² “Kɛji be ni mito lɛ shɛ lɛ, mibakojo yɛ jalɛ naa.

³ Kɛji je lɛ hoso kɛ enɔ bɔɔnii fɛɛ lɛ, mi, mihiɛ ekulashii lɛ amli kpɛŋŋ.”

⁴ Mikɛɔ mɛi ni shwãa lɛ akɛ, “Nyɛkashwãa!” Ni mikɛɔ yiwalɔi lɛ akɛ,

⁵ “Nyɛkafea ntɛŋ; nyɛkafea ntɛŋ kwraa, nyɛkawiea kɛ kuɛŋtilɛ.”

⁶ Ejaakɛ kojomɔ jɛɛɛ bokãgbɛ lɛ, ejɛɛɛ anaigbɛ; asaŋ ejɛɛɛ ŋanɔgbɛ hu ebaaa.

⁷ Nyɔŋmɔ ji kojolɔ! Ebaa mɔ ko shi, ni ewoɔ mɔ ko nɔ.

⁸ Ejaakɛ Yehowa hiɛ kpulu ko yɛ edɛŋ kɛ emli wain kpakpa ni miitswa afui. Ebaafo eko ehã, ni shikpɔŋ lɛ nɔ yiwalɔi lɛ fɛɛ baanu; amɛaashoo wain lɛ kɛ eshishi fɛɛ.

⁹ Shi mi lɛ, mibanya kɛaatee naanɔ. Mala majie Yakob Nyɔŋmɔ lɛ yi.

¹⁰ Ebaaba yiwalɔi ahewalɛi fɛɛ shi; shi jalɔi ahewalɛ lɛ ebaawo nɔ.