Lalai 74 - ŊMALƐ KRƆŊKRƆŊ LƐ

Maŋkpɔ̃mɔ he sɔlemɔ

Asaf lala ko ni atswa yɛ kpaa saŋku nɔ yɛ Maskil gbɛjianɔtoo naa lɛ.

¹ Oo, Naa Nyɔŋmɔ, mɛɛba oshɛrɛ wɔ oshwie kwraa nɛkɛ? Mɛɛba omlifu lɛ jɛleɔ woɔ olɛɛhe lɛ toi nɛɛ?

² Kaimɔ osafo ni oŋɔ fee onɔ kɛjɛ blema lɛ! Kaimɔ Zion Gɔŋ, he ni obahiɔ lɛ.

³ Dɔɔ ohe kɛya naanɔ amaŋfɔ̃i lɛ amli. Henyɛlɔ lɛ efite nibii fɛɛ ni yɔɔ He Krɔŋkrɔŋ lɛŋ lɛ.

⁴ Ohenyɛlɔi lɛ ebɔ kunimyeli oshe yɛ Ohe Krɔŋkrɔŋ lɛŋ; amɛshi amɛflaŋaai yɛ jɛi akɛ kunimyeli he okadi.

⁵ Amɛkɛ lemai miikumɔ yiteŋgbɛ agbo lɛ he tsei lɛ;

⁶ ni agbo lɛ tsei ni ayeyee samai awo he lɛ, amɛkɛ lemai kɛ hamle ekumɔ.

⁷ Ni amɛma Ohe Krɔŋkrɔŋ lɛ naa la, ni amɛbule he ni ajaa bo yɛ lɛ kwrakwra.

⁸ Amɛkɛɛkɛɛ amɛhe akɛ, “Wɔbaaye amɛnɔ kɛwula shi.” Amɛshãshãa Nyɔŋmɔ kpeehei fɛɛ ni yɔɔ shikpɔŋ lɛ nɔ lɛ.

⁹ Wɔnaaa wɔkadii krɔŋkrɔŋi lɛ! Gbalɔ ko gbalɔ ko bɛ dɔŋŋ, ni mɔ ko mɔ ko kwraa bɛ wɔteŋ ni ele bɔ ni sane nɛɛ naa aaayakpa ahã.

¹⁰ Oo Nyɔŋmɔ, mɛɛ beyinɔ nɔŋŋ ni henyɛlɔ lɛ aaabɔ ahora kɛyashi? Ani henyɛlɔ lɛ aaagbe ogbɛi lɛ he guɔ kɛaaya naanɔ lo?

¹¹ Mɛɛba osu onine? Mɛɛba osu ohewalɛ ninejurɔ lɛ owo omlishi?

¹² Kɛ̃lɛ kɛjɛ blema beebe lɛ, miNyɔŋmɔ, mimaŋtsɛ lɛ, lɛ etsuɔ yiwalaheremɔ nitsumɔ yɛ shikpɔŋ lɛ nɔ.

¹³ Ogba ŋshɔ lɛ mli yɛ ohewalɛ naa; ojwara ŋshɔŋ bonsoi lɛ ayitsei.

¹⁴ Ojwara kooloo leviatan lɛ yitsei lɛ wɔtsɔwɔtsɔ; ni oŋɔ egbɔmɔtso lɛ ohã ŋaŋ kooloi koni amɛye.

¹⁵ Ohã nuhiŋmɛii kɛ faa niji tue; ni ohã faa ni hoɔ daa lɛ ŋala.

¹⁶ Shwane lɛ onɔ ni, ni nyɔɔŋ hu onɔ ni. Bo obɔ ŋulamii kɛ hulu.

¹⁷ Bo oto shikpɔŋ lɛ husui lɛ fɛɛ; bo obɔ latsaa be kɛ fɛ̃i be fɛɛ.

¹⁸ Oo Yehowa, kaimɔ bɔ ni henyɛlɔi lɛ bɔɔ bo ahora amɛhãa; kɛ bɔ ni mɛi ni sheee Nyɔŋmɔ gbeyei lɛ gbeɔ ogbɛi lɛ he guɔ.

¹⁹ Kaaŋmɛɛ omɛi ni ahe waaa lɛ ahe ohã kooloi kakawuai lɛ; ohiɛ akakpa omɛi nɔnalɔi lɛ anɔ kwraa.

²⁰ Ohiɛ akakpa okpãŋmɔ lɛ nɔ, ejaakɛ shikpɔŋ lɛ nɔ hei ni ewowoo duŋ lɛ eyimɔ tɔ kɛ yiwalɛ.

²¹ Kaahã mɔ ni awaa lɛ yi lɛ hiɛ miishwie shi. Hã ohiafo kɛ mɔ ni efi lɛ fɛɛ ajie ogbɛi lɛ yi.

²² Oo Naa Nyɔŋmɔ, wo ohe nɔ koni ofã ohe. Kaimɔ bɔ ni mɛi ni sheee Nyɔŋmɔ gbeyei bɔɔ bo ahora gbi muu fɛɛ.

²³ Ohiɛ akakpa ohenyɛlɔi lɛ abolɔmɔ lɛ, amɛhoofeemɔ ni kwɔɔ kɛyaa ŋwɛi be fɛɛ be lɛ nɔ.