Lalai 73 - ŊMALƐ KRƆŊKRƆŊ LƐ

WOLO NI JI ETƐ̃ (Lalai 73—89 ) Nyɔŋmɔ jalɛ saneyeli

Asaf lala ko.

¹ Lɛɛlɛŋ, Nyɔŋmɔ hi hã Israel; ehi ehã mɛi ni atsuiiaŋ tse lɛ.

² Shi mi lɛ eshwɛ shrao ni minane atɔ̃tɔ̃; shwɛ shrao kulɛ mishane.

³ Ejaakɛ be ni mina bɔ ni mɛi fɔ̃ji eshwere lɛ, mihiɛ kɔ̃ yiwalɔi lɛ aninamɔ lɛ nɔ.

⁴ Ejaakɛ amɛbɛ piŋmɔ ko lɛ, amɛgbɔmɔtsei yɛ hewalɛ kpiŋtiŋkpliŋŋ.

⁵ Adesãi ahaomɔ lɛ eko kwraa gbaaa amɛnaa lɛ, amɛpiŋŋ tamɔ adesãi krokomɛi.

⁶ No hewɔ lɛ, hewoo etsɔ̃ kuɛnii ni amɛwo, ni yiwaa ji amɛhebo.

⁷ Fɔ sɔŋŋ ehã amɛhiŋmɛii ekɛ̃lɛ̃ emamɔ shi; amɛtsuii eyimɔ obɔ̃bɔ̃ kɛ kwashiaianii.

⁸ Amɛyeɔ mɛi ahe fɛo, ni nishaianii he amɛwieɔ; amɛfaa amɛhe amɛwieɔ, ni mɛi apiŋmɔ pɛ he amɛjwɛŋɔ.

⁹ Amɛhãa amɛnaa yasaa Nyɔŋmɔ tete he; amɛdaaŋ wiemɔi ekpele shikpɔŋ lɛ nɔ fɛɛ;

¹⁰ hewɔ lɛ Nyɔŋmɔ webii lɛ ekpale kɛtee amɛŋɔɔ, ni amɛkafoɔ amɛ; ni amɛnaaa tɔ̃mɔ ko yɛ amɛhe.

¹¹ Amɛkɛɔ akɛ, “Te Nyɔŋmɔ aaafee tɛŋŋ ni ele hu? Ani Ŋwɛinyo lɛ aaale?”

¹² Naa, bɔ ni mɛi fɔ̃ji yɔɔ nɛ: Daa nɛɛ amɛhe ejɔ amɛ, ni nii lɛ, na kɛkɛ amɛnaa.

¹³ Yakatswaa po mihiɛ mitsuiŋ keŋkeŋ, ni miwooo miniji ahe muji kɛ efɔŋfeemɔ ko lɛ.

¹⁴ Minaa nɔ daa jenamɔ, ni agbalaa mitoi daa leebi.

¹⁵ Eji mikɛɛ akɛ, “Mawie nɛkɛ” kulɛ, miyeŋ owebii lɛ ashwiei lɛ anɔkwa.

¹⁶ Shi be ni mibɔ mɔdɛŋ misusu he koni manu sane lɛ shishi lɛ, mina akɛ ewa tsɔ̃ hã mi.

¹⁷ Kɛyashi mibote Nyɔŋmɔ he krɔŋkrɔŋ lɛŋ, dani mina bɔ ni amɛnaagbee tamɔ hã.

¹⁸ Lɛɛlɛŋ akɛ okɛ amɛ eto hei ni shamɔɔ trotro; ohãa amɛtswiaa shi, ni amɛhiɛ kpãtãa.

¹⁹ Amɛhiɛ kpãtãa shwiaa, ni ŋmiŋmi loɔ amɛ kɛyaa kwrakwra.

²⁰ Amɛtamɔ lamɔ ni alaa. Kɛji hiɛ tsɛ̃ kɛjɛ wɔ lɛ mli lɛ, amɛjeee fɛifɛi dɔŋŋ.

²¹ Be ni edɔ mi, ni mitsui mli shã mi lɛ,

²² asomoaŋ kwashia mifee lɛ, ni mileee nii. Mitamɔ kooloo yɛ ohiɛ.

²³ Kɛ̃lɛ miyɛ omasɛi daa, ni ohiɛ mininejurɔ mli.

²⁴ Okɛ oŋaawoo tsɔ̃ɔ mi gbɛ; ni kɛfee sɛɛ lɛ ooohere mi owo onunyam mli.

²⁵ Namɔ miyɔɔ yɛ ŋwɛi fe bo? Ni nɔ ko nɔ ko bɛ shikpɔŋ nɛɛ nɔ ni mitaoɔ yɛ bo osɛɛ.

²⁶ Miheloo kɛ mitsui aaagbɔjɔ nɛ, shi Nyɔŋmɔ ji mitsui hewalɛ kɛ migbɛfaŋnɔ kɛmiiya naanɔ;

²⁷ ejaakɛ mɛi ni ekwa bo lɛ, ahiɛ aaakpãtã. Okpãtãa mɛi ni yeee bo anɔkwa lɛ ahiɛ.

²⁸ Shi mi lɛ, Nyɔŋmɔ masɛi hilɛ hi hã mi. Mikɛ Nuŋtsɔ Nyɔŋmɔ lɛ efee mibobaahe, bɔ ni afee ni magba onitsumɔi lɛ fɛɛ.