Lalai 7 - ŊMALƐ KRƆŊKRƆŊ LƐ

Jalɛ saneyeli he sɔlemɔ

David Lala ko ni ela eha Yehowa ni kɔɔ Benyaminnyo Kush wiemɔ ko he.

¹ Oo Yehowa, miNyɔŋmɔ, bo abo mibaa! Heremɔ miyiwala ni ojie mi yɛ mɛi fɛɛ ni nyiɛ misɛɛ lɛ adɛŋ.

² Heremɔ mi koni henyɛlɔi lɛ akagbala mi kɛtee he ni jielɔ ko bɛ, ni amɛyatserɛ mimli tamɔ jata.

^3-4 Oo Yehowa miNyɔŋmɔ, kɛji mitɔ̃ mɔ ko nɔ, kɛji mifee naanyo ko efɔŋ, kɛji miwa mɛi ni he tsɛ̃ɔ mi yakatswaa lɛ ayi lɛ,

⁵ no lɛ, hã mihenyɛlɔi lɛ atiu mi ni amɛmɔ mi, ni amɛnaanaa minɔ yɛ shikpɔŋ ni magbo, ni makã mlu mli.

⁶ Oo, Yehowa, tee shi kɛ mlila, wo ohe nɔ yɛ mihenyɛlɔi lɛ agirimɔ lɛ hewɔ; Oo miNyɔŋmɔ, ohiɛ atsɛ̃; bo ni oto kojomɔ ofɔ shi.

⁷ Buamɔ asafokui lɛ anaa kɛbɔle ohe kɛkpe, ni ojɛ ŋwɛi oye amɛnɔ.

⁸ Yehowa, bo okojoɔ mɛi fɛɛ! Oo Yehowa, kojomɔ mi yɛ mijalɛ lɛ naa, ejaakɛ mi lɛ, mifeko efɔŋ ko.

⁹ Oo, hã mɛi fɔ̃ji anɔfɔŋfeemɔ lɛ sɛɛ afo; Shi jalɔi lɛ, ojuro amɛ; ejaakɛ bo ji jalɛ Nyɔŋmɔ, ni okaa tsui kɛ jwɛŋmɔ okwɛɔ.

¹⁰ Naa Nyɔŋmɔ ji mitsɛŋ! Lɛ ehereɔ mɛi ni ja yɛ amɛtsuiiaŋ lɛ.

¹¹ Nyɔŋmɔ lɛ jalɛ naa kojolɔ ni; ebuɔ efɔŋfeelɔ fɔ be fɛɛ be.

¹² Kɛji gbɔmɔ tsakeee etsui lɛ, Nyɔŋmɔ ejɔ eklante naa; ni edɔ egãi lɛ mli ni eta.

¹³ Esaa emɔgbee dadei lɛ eto bo, ni ehã egãimlibii lɛ miikpɛlɛ tamɔ la.

¹⁴ Mɛi fɔ̃ji jwɛŋɔ efɔŋ, ni amɛŋɔɔ efɔŋ hɔ, ni amɛfɔɔ amale.

¹⁵ Etsaa bu, ni ehãa emli kwɔɔ, ni lɛ nɔŋŋ egbeɔ bu ni etsa lɛ mli;

¹⁶ emusu buaa lɛ diɛŋtsɛ eyiteŋ, ni eyiwalɛ lɛ wulaa lɛ diɛŋtsɛ nɔŋŋ eyiteŋ.

¹⁷ Mada Yehowa shi yɛ ejalɛ naa, ni mala majie Yehowa, Ŋwɛi flooflonyo lɛ gbɛi lɛ yi.