Lalai 69 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David Lala ni ekɛha lalatsɛ nukpa lɛ.

¹ Oo Naa Nyɔŋmɔ, heremɔ miyiwala, shi nu lɛ ebata misɛ̃!

² Miishiu yɛ ŋmiamɔ ni mli kwɔ ni shidaamɔhe bɛ mli mli. Miyaje nu kwɔŋkwɔŋ mli, ni nu lɛ miisu mi.

³ Etɔ mi kɛ blɔmɔ, ni misɛŋ egbi. Mikwɛ miNyɔŋmɔ lɛ gbɛ aahu; agbɛnɛ mihiŋmɛii eshiu.

⁴ Mɛi ni he tsɛ̃ɔ mi yakatswaa lɛ, amɛyi fa fe miyiteŋ tsɔi; mihenyɛlɔi ni maleɔ mihe, mɛi ni taoɔ mihiɛ amɛkpãtã lɛ amɛyi fa. Nɔ ni mijuko lɛ aso esa akɛ mato najiaŋ lo?

⁵ Oo Naa Nyɔŋmɔ, ole mikwashiafeemɔ; tɔ̃mɔi ni mitɔ̃ lɛ, akɛteko bo.

⁶ Oo Nuŋtsɔ Nyɔŋmɔ, Taiatsɛ, kaahã mɛi ni hiɛ kã onɔ lɛ ahiɛ miigboi yɛ mi, mihewɔ. Oo Israel Nyɔŋmɔ, kaahã mɛi ni jaa bo lɛ ahiɛ miishwie shi yɛ mi mihewɔ.

⁷ Bo ohewɔ ni abɔ mi ahora, ni mihiɛ egbo kpɔtɔɔ nɛɛ.

⁸ Mitsɔ̃ gbɔ mihã miwekumɛi, kɛ mɔkpɔŋ yɛ minyɛbii ateŋ,

⁹ ejaakɛ owe lɛ he hiɛdɔɔ tsoɔ yɛ mimli tamɔ la; ni ahorai ni mɛi bɔɔ bo lɛ ebashwie minɔ.

¹⁰ Kɛji mifo, ni mikɛ ŋmaahilɛ piŋ misusuma po, no hu tsɔ̃ɔ ahorabɔɔ hãa mi.

¹¹ Kɛji mibu kpekpe po, amɛboɔ mi “tsia!”

¹² Nɔyelɔi kɛ kojolɔi yɛ koishi, tãa mihe sane ni dãatɔlɔi tete foɔ mihe lala.

¹³ Oo Yehowa, shi mi lɛ, masɔle matsɛ bo. Oo Nyɔŋmɔ, be ni sa mli lɛ, jɛɛ osuɔmɔ kpeteŋkple ni tsakeee lɛ naa ohã mi hetoo. Yɛ onɔkwayeli naa lɛ

¹⁴ heremɔ mi koni mikashiu yɛ ŋmiamɔ lɛ mli. Heremɔ mi yɛ mihenyɛlɔi adɛŋ, kɛjɛ nu kwɔŋkwɔŋ lɛ hu mli.

¹⁵ Kaahã nu lɛ miisu mi, kaahã mishiu yɛ bu kwɔŋkwɔŋ lɛŋ, loo gbonyobu miimi mi.

¹⁶ Oo Yehowa, heremɔ mi nɔ, yɛ osuɔmɔ kpakpa ni tsakeee lɛ naa. Omɔbɔnalɛ ni fa babaoo lɛ naa lɛ, tsɔ̃ ohiɛ ohã mi.

¹⁷ Okɛ ohiɛ akatee otsulɔ, ejaakɛ miyɛ jaramɔ mli, heremɔ mi nɔ mra.

¹⁸ Tsi obɛŋkɛ mi ni okpɔ̃ mi; mihenyɛlɔi ahewɔ lɛ, heremɔ mi.

¹⁹ Ole ahora ni abɔɔ mi, mihiɛgbele kɛ mihe guɔ ni egbo lɛ. Ole mihenyɛlɔi fɛɛ.

²⁰ Ahorabɔɔ ehã mitsui ekumɔ, ni ehã miyoyoro. Mikwɛ mɔbɔnalɛ gbɛ, shi eko baaa; mikwɛ miishɛjelɔi hu gbɛ, shi mɔ ko mɔ ko baaa.

²¹ Amɛhãa mi ebɔɔ akɛ niyenii, ni be ni kumai ye mi lɛ amɛhã mi ashiŋ akɛ minu.

²² Hã okplɔ̃ ni amɛŋmɛ lɛ atsɔ̃ tsɔne ahã amɛ diɛŋtsɛ, ni amɛgbiijuji anɔ niyenii lɛ atsɔ̃ akpa ahã amɛ.

²³ Hã amɛhiŋmɛii anɔ afee kusuu koni amɛkana nii; ni ohã amɛhɛ agbɔjɔ be fɛɛ be.

²⁴ Fɔsemɔ omlila lɛ oshwie amɛnɔ, ni okɛ omlifu ni naa wa lɛ anina amɛ.

²⁵ Amɛshitoohe atsɔ̃ amaŋfɔ̃ kaahã mɔ ko miihi amɛbui amli.

²⁶ Ejaakɛ amɛwaa mɔ ni otswia lɛ nii momo lɛ yi; ni mɔ ni opila lɛ momo lɛ, amɛyaa nɔ amɛpiŋɔ lɛ.

²⁷ Too amɛtoigbalamɔ lɛ nɔ ohã amɛ; amɛkaye amɛhe kɔkɔɔkɔ yɛ odɛ̃ŋ!

²⁸ Hã agbe amɛgbɛii yɛ wala wolo lɛ mli; akaŋmala amɛgbɛii ashi jalɔi anɔ nɔ.

²⁹ Shi mi lɛ, apila mi, ni miipiŋ. Oo Naa Nyɔŋmɔ, wo minɔ koni ohere miyiwala.

³⁰ Mikɛ lala aaajie Nyɔŋmɔ gbɛi lɛ yi! Mikɛ shidaa aaakafo lɛ!

³¹ Enɛ aaasa Yehowa hiɛ pam fe tsina oblayoo, loo tsinanuu kɛ eklontoi.

³² Hã mɛi ni awaa amɛ yi lɛ ana koni amɛmii ashɛ. Nyɛ mɛi ni nyɛtaoɔ Nyɔŋmɔ sɛɛgbɛ lɛ, nyɛhãa nyɛtsui anyɔa nyɛ mli;

³³ ejaakɛ Yehowa boɔ ohiafoi atoi, ni enyaŋeee lɛ diɛŋtsɛ emɛi ni yɔɔ gboklɛ mli lɛ.

³⁴ Hã ŋwɛi kɛ shikpɔŋ kɛ ŋshɔi kɛ bɔɔnii fɛɛ ni yɔɔ amɛmli lɛ ajie eyi.

³⁵ Ejaakɛ Nyɔŋmɔ baahere Zion yiwala, ni eeesaa Yuda maji wuji lɛ ema; etsuji lɛ aaahi amɛmli, ni eeetsɔ̃ amɛnɔ.

³⁶ Maji lɛ aaatsɔ̃ etsuji lɛ ashwiei anɔ, ni mɛi ni sumɔɔ lɛ lɛ aaahi amɛmli.