Lalai 64 - ŊMALƐ KRƆŊKRƆŊ LƐ

Hebuu he sɔlemɔ

David Lala ko ni ekɛha lalatsɛ nukpa lɛ.

¹ Oo Naa Nyɔŋmɔ, bo migbee toi, yɛ mikɔmɔyeli lɛ mli. Gbeyei ni misheɔ henyɛlɔ lɛ hewɔ lɛ baamɔ miwala yi.

² Ŋɔɔ mi otee yɛ ajina fɔŋ ni efɔŋfeelɔi yaa yɛ teemɔ mli lɛ hewɔ, yɛ nɔshafeelɔi ayiŋtoo fɔŋ lɛ hewɔ.

³ Amɛjɔ amɛlilɛii anaa tamɔ klante; amɛkɛ amɛdaaŋ wiemɔi ni joɔ gbulɔɔ mi tamɔ gãimlibii.

⁴ Amɛtsɛ̃rɛ̃ɔ amɛwiemɔi lɛ kɛjɛɔ amɛteemɔhe lɛ amɛtswiaa mɔ ni eye emuu lɛ; amɛtsɛ̃rɛ̃ɔ lɛ amɛgãi lɛ trukaa, ni amɛsheee gbeyei.

⁵ Amɛkpliŋ amɛtsuii yɛ yiŋtoo fɔŋ nɛɛ mli; amɛkpɛɔ mli koni amɛtsɔ̃tsɔ̃ɔ mɛi atsɔne yɛ teemɔ mli; ni amɛkɛɔ akɛ, “Namɔ po aaana wɔ?”

⁶ Namɔ aaanyɛ ajie nishaianii ni wɔfee wɔtee lɛ kpo? Wɔkɛ ŋaa kpɛ mli jogbaŋŋ. Ejaakɛ gbɔmɔ yitsoŋ kwɔ, ni etsui mli hu ewo duŋ.

⁷ Shi Nyɔŋmɔ aaatsɛ̃rɛ̃ amɛ gãi, ni eeepila amɛ trukaa.

⁸ Ebaakpãtã amɛhiɛ yɛ amɛlilɛi hewɔ; ni mɛi fɛɛ ni aaana amɛ lɛ aaahoso amɛyitso.

⁹ Kɛkɛ lɛ gbɔmɛi fɛɛ kwa aaashe gbeyei, ni amɛaagba nii ni Nyɔŋmɔ etsu lɛ; ni amɛaasusu enifeemɔnii lɛ he.

¹⁰ Hã jalɔi lɛ anya yɛ Yehowa hewɔ, ni amɛba lɛ abo! Hã mɛi fɛɛ ni atsuiiaŋ tse lɛ anya.