Lalai 60 - ŊMALƐ KRƆŊKRƆŊ LƐ

Kpɔ̃mɔ he sɔlemɔ

David lá be ni ekɛ Arambii ni jɛ Naharaim kɛ Zoba lɛ wu ni Yoab ku esɛɛ eyagbe Edombii lɛ ateŋ mɛi 12, 000 yɛ Ŋoo Jɔɔ lɛŋ lɛ.

¹ Oo Naa Nyɔŋmɔ, okwa wɔ, okumɔ wɔhe afabaŋ, omli efu wɔ. Kuu osɛɛ oba wɔŋɔɔ ekoŋŋ.

² Ohã shikpɔŋ lɛ ehoso, ni ohã emli egbala; tsaramɔ hei ni egbala lɛ, ejaakɛ ewɔtsɔ.

³ Ohã owebii lɛ ena nɔ naakpa. Wɔmiililaa shi tamɔ mɛi ni etɔ wain.

⁴ Oshi aflaŋaa akɛ okadi ohã mɛi ni sheɔ bo gbeyei lɛ, koni amɛje hiɛkpãtãmɔ mli kɛbaanyiɛ anɔkwale lɛ sɛɛ.

⁵ Okɛ ohewalɛ lɛ ahere wɔyiwala. Bo wɔ toi bɔ ni afee ni mɛi ni osumɔɔ lɛ ahere amɛyiwala.

⁶ Nyɔŋmɔ ejɛ ehe krɔŋkrɔŋ lɛ ekɛɛ akɛ, “Mikɛ miishɛɛ baaja Shekem mli, ni majara Sukot Jɔɔ lɛ mahã mimaŋ lɛ.

⁷ Minɔ ji Gilead, ni minɔ ji Manase; Efraim ji miyitso dade fai; Yuda ji mimaŋtsɛ tsi.

⁸ Moab ji mihejuu goga; majie mitokota mashwie Edom kɛtsɔ̃ɔ akɛ mi, minɔ ni, ni mabɔ kunimyeli oshe mashwie Filistia nɔ.”

⁹ Namɔ aaaŋɔ mi kɛaatee maŋ ni awaje lɛ lɛ mli? Namɔ aaanyiɛ mihiɛ kɛaaya Edom?

¹⁰ Oo Naa Nyɔŋmɔ, ani okwako wɔ? Oo Naa Nyɔŋmɔ, okɛ wɔta lɛ efãaa ta dɔŋŋ?

¹¹ Oo, ye obua wɔ koni wɔkɛ henyɛlɔ lɛ akpe; ejaakɛ gbɔmɔ adesã dɛŋ yelikɛbuamɔ jeee fɛifɛi.

¹² Akɛni Nyɔŋmɔ kɛ wɔ yɔɔ nɛɛ lɛ wɔɔye kunim kɛ̃. Lɛ ji mɔ ni aaanaanaa wɔhenyɛlɔi lɛ anɔ kɛmɔ shi.