Lalai 59 - ŊMALƐ KRƆŊKRƆŊ LƐ

Shweshweeshwefeemɔ he sɔlemɔ

Lala ko ni akɛha lalatsɛ nukpa lɛ be mli ni Saul tsu mɛi ni amɛtɛo David ni amɛgbe lɛ.

¹ Oo miNyɔŋmɔ, heremɔ mi yɛ mihenyɛlɔi adɛŋ. Kpɔ̃ mi yɛ mɛi ni teɔ shi woɔ mi lɛ adɛŋ.

² Heremɔ mi yɛ mihenyɛlɔi adɛŋ; heremɔ miyiwala yɛ gbɔmɔgbelɔi adɛŋ.

³ Ejaakɛ naa, amɛwo ka yɛ mi mihewɔ; yiwalɔi ebua amɛhe naa amɛwo mi.

⁴ Oo Yehowa, jeee esha ni mifee loo tɔ̃mɔ ko ni mitɔ̃ hewɔ ni amɛjoɔ foi kɛyaa amɛyafeɔ kralo amɛtoɔ mi. Wo ohe nɔ, baakwɛ ni oye obua mi.

⁵ Yehowa, bo Nyɔŋmɔ Taiatsɛ, bo ji Israel Nyɔŋmɔ. Wo ohe nɔ koni ogbala maji fɛɛ atoi; kaana efɔŋfeelɔi kutumpɔfoi lɛ ekoeko kwraa mɔbɔ.

⁶ Daa gbɛkɛ lɛ, amɛkuɔ amɛsɛɛ amɛbaa; amɛbolɔɔ tamɔ gbei, ni amɛnyiɛɔ tsoŋtsoŋ yɛ maŋ lɛŋ.

⁷ Amɛ amɛyɔɔ jɛi lɛ, amɛwieɔ amɛdaa obɔ̃. Amɛnaa jaraa tamɔ klante, ni amɛkɛɔ akɛ, “Namɔ nuɔ nɔ ni wɔkɛɔ lɛ?”

⁸ Shi Oo, bo Yehowa, oŋmɔɔ amɛ; oyeɔ jeŋ maji fɛɛ ahe fɛo.

⁹ Oo miHewalɛ, bo pɛ gbɛ mikwɛɔ. Oo Naa Nyɔŋmɔ, ejaakɛ bo ji mimɔɔ.

¹⁰ MiNyɔŋmɔ aaabakpee mi; kɛ esuɔmɔ ni tsakeee lɛ; miNyɔŋmɔ aaahã mihiŋmɛi ana mihenyɛlɔi anɔ kunimyeli lɛ.

¹¹ Ao Nuŋtsɔ, wɔtsɛ, kaagbe amɛ, no lɛ mimaŋ lɛ hiɛ aaakpa nɔ; shi moŋ gbɛɛ amɛ oshwã yɛ ohewalɛ naa, ni okɛ amɛ atswia shi.

¹² Esha wiemɔi ni jeɔ amɛnaa lɛ hewɔ lɛ, hã amɛhewoo lɛ afimɔ amɛ nɔŋŋ. Loomɔ kɛ amale wiemɔi ni amɛwieɔ lɛ hewɔ lɛ,

¹³ okɛ mlifu akpãtã amɛhiɛ. Kpãtãmɔ amɛhiɛ kɛyaashi amɛyi aaatã, koni mɛi ni yɔɔ jeŋ naagbeehei fɛɛ ana ale akɛ Nyɔŋmɔ ji mɔ ni yeɔ Israel nɔ.

¹⁴ Daa gbɛkɛ lɛ, amɛkuɔ amɛsɛɛ amɛbaa; amɛbolɔɔ tamɔ gbei, ni amɛnyiɛɔ tsoŋtsoŋ yɛ maŋ lɛŋ.

¹⁵ Amɛkpaa shi amɛtaoɔ niyenii, ni kɛ eshɛɛɛ amɛnaa lɛ, amɛhuuɔ kɛ mlifu.

¹⁶ Shi mi lɛ, mala ohewalɛ lɛ he lala; leebi lɛ, mala osuɔmɔ ni tsakeee lɛ he lala; ejaakɛ otsɔ̃ mɔɔ ohã mi, ni otsɔ̃ abobaahe ohã mi, yɛ mifimɔ gbi lɛ nɔ.

¹⁷ Oo, miHewalɛ, mala majie oyi, ejaakɛ, Oo, bo Nyɔŋmɔ, bo ji mimɔ̃ɔ. Bo ji Nyɔŋmɔ ni ojieɔ osuɔmɔ ni tsakeee lɛ kpo otsɔ̃ɔ mi.