Lalai 58 - ŊMALƐ KRƆŊKRƆŊ LƐ

Yiwalɔi atoigbalamɔ he sɔlemɔ

David Lala ko ni atswa yɛ kpaa saŋku nɔ yɛ Miktam gbɛjianɔtoo naa.

¹ Nyɛ lumɛi, aso nyɛbuɔ atɛŋ yɛ jalɛ naa lo? Ani nyɛkojoɔ gbɔmɛi abii fɛɛ yɛ jalɛ naa lo?

² Dabida! Nɔ fɔŋ ni nyɛbaafee he nyɛjwɛŋɔ; yiwalɛ nii nyɛfeɔ yɛ shikpɔŋ lɛ nɔ.

³ Mɛi fɔ̃ji gbaa jwɛi kɛjɛɔ musuŋ beebe; kɛji ashwie amɛ shi nɔŋŋ pɛ amɛbɔi malemɔ.

⁴ Ebɔɔ yɛ amɛmli tamɔ onufu, amɛtsimɔɔ amɛtoi tamɔ ble

⁵ koni amɛkanu ŋkunyaayelɔ gbee loo ashwãifeelɔ tsɛmɔ.

⁶ Oo Naa Nyɔŋmɔ, kuumɔ amɛdaaŋ nyanyɔji. Oo Yehowa, fãamɔ jata oblahii atsoji.

⁷ Hã amɛlaaje tamɔ nu ni hoɔ kɛyaa, ni anaanaa amɛnɔ tamɔ jwɛi koni amɛgboi.

⁸ Hã amɛtsɔ̃ tamɔ waa mli nu kplãnaa; amɛtsɔ̃ tamɔ bi ni ashrake ni enaaa hulu.

⁹ Dani nyɛkukwɛi aaanu laitso dɔlɛ he lɛ, tso ŋmɔŋ jio, tso ni la efu he momo jio, Yehowa abɛɛ amɛ fɛɛ ashwie.

¹⁰ Jalɔi aaanya be ni amɛaana oweletɔɔ lɛ; amɛaanyiɛ mɛi fɔ̃ji ala mli kɛho.

¹¹ Mɛi aaakɛɛ akɛ, “Lɛɛlɛŋ akɛ nyɔmɔwoo ko yɛ hã jalɔ; lɛɛlɛŋ akɛ Nyɔŋmɔ ko yɛ ni kojoɔ yɛ shikpɔŋ lɛ nɔ.”