Lalai 53 - ŊMALƐ KRƆŊKRƆŊ LƐ

Gbɔmɔ Adesa yitsoŋwalɛ

Lala ko kɛha lalatsɛ nukpa yɛ Mahalath gbɛjianɔtoo naa.

¹ Kwashiai kɛɔ yɛ amɛtsuiiaŋ akɛ, “Nyɔŋmɔ ko bɛ.” Amɛfite, ni nibii ni ahiɔ pɛ amɛfeɔ, amɛteŋ mɔ ko kwraa bɛ ni feɔ nɔ kpakpa.

² Nyɔŋmɔ jɛɔ ŋwɛi ekwɛɔ gbɔmɛi abii, akɛ eeena mɛi komɛi ni le nii, mɛi ni taoɔ Nyɔŋmɔ sɛɛgbɛ lo?

³ Amɛ fɛɛ amɛgba afã, amɛ fɛɛ amɛje amɛŋlɛ nɔ; amɛteŋ mɔ ko kwraa bɛ ni feɔ nɔ kpakpa. Dabida! Mɔ kome nɛkɛ folo bɛ.

⁴ Nyɔŋmɔ miibi akɛ, “Aso nakai efɔŋfeelɔi lɛ ni yeɔ mimaŋbii lɛ tamɔ ayeɔ aboloo, ni amɛjaaa Nyɔŋmɔ lɛ, amɛleee nii?

⁵ Naa amɛ ni ŋmiŋmi emɔmɔ amɛ, ŋmiŋmi ni anako ehenɔ dã! Ejaakɛ mɛi ni sheee Nyɔŋmɔ gbeyei lɛ, Nyɔŋmɔ baagbɛ amɛwui lɛ eshwã. Abaahã amɛhiɛ agboi ejaakɛ Nyɔŋmɔ ekwa amɛ.

⁶ Oo, kulɛ ajɛ Zion ahere Israel yiwala! Kɛji Nyɔŋmɔ hã ewebii ba amɛblema ekoŋŋ lɛ, no lɛ Yakob aaanya, ni Israel mii aaashɛ!