Lalai 5 - ŊMALƐ KRƆŊKRƆŊ LƐ

Sɔlemɔ kɛhã hebuu

David Lala kɛha lalatsɛ nukpa lɛ ni akɛ bɛlɛ akpa.

¹ Oo Yehowa, bo miwiemɔi lɛ toi, koni onu mikɔmɔ ni miyeɔ lɛ he ohã mi!

² Mimaŋtsɛ kɛ miNyɔŋmɔ, feemɔ toi ohã mibolɔmɔ lɛ, ejaakɛ bo fai mikpaa nɛɛ.

³ Oo Yehowa, leebi lɛ bo migbee toi; leebi lɛ bo fai mikpaa, ni bo ohetoo gbɛ mikwɛɔ.

⁴ Ejaakɛ ojeee Nyɔŋmɔ ni naa efɔŋfeemɔ he tsui; ni mɔ fɔŋ hu kɛ bo ehiii shi.

⁵ Hewolɔi nyɛɛɛ ohiɛ amɛdamɔ, ni onyɛɔ efɔŋfeelɔi fɛɛ.

⁶ Okpãtãa amalelɔi ahiɛ. Lashishwielɔi kɛ shishiulɔi lɛ Yehowa miihi amɛ.

⁷ Shi mi lɛ, yɛ osuɔmɔ ni tsakeee lɛ naa lɛ maba owe lɛ; mikɛ woo aaaja bo yɛ oSɔlemɔ we krɔŋkrɔŋ lɛŋ.

⁸ Oo, Yehowa, kplamɔ mi yɛ ojalɛ lɛ naa yɛ mihenyɛlɔi lɛ ahewɔ. Hã ogbɛ akã shi faŋŋ ahã mi.

⁹ Ejaakɛ anɔkwa kome nɛkɛ bɛ amɛdaaŋ; amɛtsuiiaŋ eyi obɔ̃ kɛ fitemɔ; amɛsɛ̃ lɛ gbonyobu ni agbele naa ni; amɛkɛ amɛlilɛi wieɔ dɔkɔbii.

¹⁰ Oo Nyɔŋmɔ, hã amɛsɔ̃ abua amɛyiteŋ. Hã amɛyiŋshai lɛ nɔŋŋ akpãtã amɛhiɛ. Shɛrɛmɔ amɛ oshwie, ejaakɛ amɛtɔ̃ onɔ babaoo, ni amɛtse ohiɛ atua.

¹¹ Shi mɛi fɛɛ ni baa bo abo lɛ, amɛmli filiɔ amɛ. Hã amɛla lalai be fɛɛ be kɛ miishɛɛ. Mɛi fɛɛ ni sumɔɔ ogbɛi lɛ, fã amɛhe ni ohã amɛnya.

¹² Ejaakɛ bo Yehowa lɛ jalɔ ojɔɔ, ni okɛ mlihilɛ buɔ ehe tamɔ tsɛŋ.