Lalai 49 - ŊMALƐ KRƆŊKRƆŊ LƐ

Hiɛ ni akɛfɔɔ ninamɔ nɔ lɛ kwashiafeemɔ ni

Lala ko ni akɛha lalatsɛ nukpa lɛ ni jɛ Korahbii adɛŋ.

¹ Nyɛboa enɛ toi, nyɛ mɛi fɛɛ! Nyɛ jeŋ gbɔmɛi fɛɛ, nyɛfea toi,

² nyɛ mɛi ni abuɔ kɛ mɛi ni abuuu, niiatsɛmɛi kɛ ohiafoi fɛɛ!

³ Nilee wiemɔ baajɛ midaaŋ; mitsuiŋ susumɔ lɛ niiashishinumɔ ni.

⁴ Mafee toi mahã abɛbuaiaŋ wiemɔ, ni mikɛ saŋku aaatsɔ̃ɔ mijenu lɛ shishi.

⁵ Mɛni hewɔ mashe gbeyei yɛ haomɔ bei amli; be ni mishishinyiɛlɔi kɛ amɛnifɔɔjianii ebɔle mi,

⁶ mɛi ni kɛ amɛhiɛ fɔ̃ɔ amɛninamɔ nɔ ni amɛshwãa akɛ amɛyɛ shika babaoo?

⁷ Ekã shi faŋŋ akɛ mɔ ko mɔ ko nyɛŋ lɛ diɛŋtsɛ eyi nyɔmɔ ewo; aloo enyɛ ekpɔ̃ ehe yɛ Nyɔŋmɔ dɛŋ;

⁸ ejaakɛ wala kpɔ̃mɔ nii lɛ ejara wa tsɔ̃, bɔ ni enyɛŋ he nyɔmɔ ewo kɔkɔɔkɔ,

⁹ koni ehi shi kɛya naanɔ ni ekana gbohiiaje.

¹⁰ Hɛɛ! Mɔ fɛɛ mɔ naa akɛ nilelɔi tete gboiɔ; asaŋ kwashia kɛ buulu fɛɛ hu gboiɔ; ni amɛshĩɔ amɛjwetrii fɛɛ amɛhãa mɛi krokomɛi.

¹¹ Amɛyiŋ fɛɛ lɛ, amɛgbonyobui lɛ ji amɛshĩai kɛmiiya naanɔ. Jɛi ji amɛshihilɛhei kɛmiiya yinɔi fɛɛ anɔ; tsɛbelɛ, amɛtsɛ shikpɔji krokomɛi akɛ amɛnɔ pɛŋ.

¹² Gbɔmɔ adesa, ekaŋ enunyam mli, ebaagbo tamɔ kooloo nɔŋŋ.

¹³ Mɛi ni kɛ amɛhiɛ fɔ̃ɔ amɛ diɛŋtsɛ amɛhewalɛ nɔ, ni nɔ ni amɛyɔɔ sa amɛhiɛ lɛ, bɔ ni amɛnaagbee yɔɔ nɛ:

¹⁴ gbohiiaje kã shi hã amɛ tamɔ toi, gbele baatsɔ̃ amɛkpalalɔ. Amɛaakpeleke shi oya kɛaatee gbonyobu mli; ni amɛgbɔmɔtsei lɛ aaakpɔtɔ. Gbohiiaje aaatsɔ̃ amɛwe

¹⁵ Shi mi lɛ, Nyɔŋmɔ aaakpɔ̃ misusuma kɛjɛ gbohiiaje hewalɛ dɛŋ. Ejaakɛ eeehe mi eto.

¹⁶ Kaashe mɔ ko ni etsɔ̃ niiatsɛ, ni ewe lɛŋ anunyam efa babaoo lɛ gbeyei.

¹⁷ Ejaakɛ kɛ egbo lɛ, eŋɔŋ nɔ ko nɔ ko kɛyaŋ. Eninamɔ lɛ ekoeko enyiɛŋ esɛɛ kɛyaŋ.

¹⁸ Eyɛ mli akɛ be ni eyɔɔ wala mli lɛ, ebuɔ ehe akɛ eyi tɔ kɛ miishɛɛ; ni mɛi hu jieɔ eyi akɛ “eyɛ jogbaŋŋ” moŋ nɛ;

¹⁹ shi kɛ̃lɛ, eeetee etsɛmɛi lɛ aŋɔɔ yɛ gbohiiaje; mɛi ni enaŋ la kɔkɔɔkɔ dɔŋŋ lɛ.

²⁰ Gbɔmɔ adesa nyɛŋ ehi enunyam shihilɛ mli sɔŋŋ; etamɔ kooloo ni hiɛ kpãtãa pɛpɛɛpɛ.