Lalai 45 - ŊMALƐ KRƆŊKRƆŊ LƐ

Odehe yookpeemɔ lala

David Lala ko ni ekɛha lalatsɛ nukpa ni atswa.

¹ Mitsui eyi tɔ kɛ wiemɔi kpakpai. Maŋtsɛ lala nɛ. Mililɛi tamɔ niŋmalɔ ni he esa niŋmaatso.

² Ohe yɛ fɛo fe gbɔmɛi abii fɛɛ. Odaaŋ wiemɔ he tse, hewɔ lɛ Nyɔŋmɔ ejɔɔ bo kɛmiiya naanɔ.

³ Oo, bo hewalɛtsɛ maŋtsɛ, miamɔ kɛ oklante yɛ ogbojee kɛ onunyam mli.

⁴ Fãa kɛ agbojee kɛyaye kunim, kɛfã anɔkwale kɛ jalɛ he. Ohewalɛ aaahã oye kunim wulu.

⁵ Ogãimlibii anaa ba; amɛgbulɔɔ maŋtsɛ henyɛlɔi atsuiiaŋ; ni majimaji pleneeɔ yɛ onaji anaa.

⁶ Omaŋtsɛ sɛi lɛ Nyɔŋmɔ maŋtsɛ sɛi ni, ni ema shi kɛmiiya naanɔ. Olumɔyeli tsi lɛ, jalɛ saneyeli tsi ni.

⁷ Osumɔɔ jalɛ saneyeli, ni onyɛɔ efɔŋfeemɔ. No hewɔ ni Nyɔŋmɔ, oNyɔŋmɔ lɛ, ehã oyi obɔ̃ kɛ miishɛɛ fe onanemɛi maŋtsɛmɛi fɛɛ lɛ.

⁸ Otadei amli eyi obɔ̃ kɛ krɔbɔo kɛ anuatrɛ kɛ kashia ŋma. Kpãa saŋkui atswaa akɛshɛjeɔ omii yɛ shuɔwu mɔji amli.

⁹ Maŋtsɛmɛi abiyei futu oyei hiɛnaanɔbii ateŋ. Maŋnyɛ lɛ ewula kɛ Ofir shika kɛdamɔ oninejurɔ nɔ

¹⁰ Ee! biyoo, bo toi, jwɛŋmɔ he; ohiɛ akpa bo diɛŋtsɛ omaŋbii kɛ otsɛ we lɛ anɔ.

¹¹ Ni maŋtsɛ lɛ hiɛ aaakɔ̃ ohefɛo lɛ nɔ. Akɛni lɛ ji onuŋtsɔ lɛ, kotomɔ lɛ.

¹² Tirobii kɛ maŋ lɛŋ niiatsɛmɛi lɛ tete kɛ nikeenii aaaba koni amɛkɛtao ohiɛ gbɛ?

¹³ Maŋtsɛ biyoo lɛ ewula kiŋkaŋŋ yɛ opia lɛŋ. Etade lɛ akɛ shika kpãa elo mli.

¹⁴ Ewula kɛ atadei ni aye ŋaabii kɛ amɛsui srɔtoi awo mli; ni akpala lɛ kɛyahã maŋtsɛ lɛ, esɛɛbii enanemɛi oblayei froi krokomɛi nyiɛ esɛɛ.

¹⁵ Amɛkɛ nyamɔ kɛ mliflimɔ boteɔ maŋtsɛ we lɛŋ.

¹⁶ Obihii lɛ aaabaye oblematsɛmɛi lɛ asɛɛ. Ooowo amɛ lumɛi yɛ shikpɔŋ lɛ nɔ fɛɛ.

¹⁷ Mahã akai onumnyam gbɛi lɛ yinɔi fɛɛ; no hewɔ lɛ, jeŋ gbɔmɛiabii fɛɛ aaajie oyi daa kɛaatee naanɔ.