Lalai 44 - ŊMALƐ KRƆŊKRƆŊ LƐ

Hebuu he sɔlemɔ

David Lala ni ekɛha lalatsɛ nukpa lɛ ni jɛ Maskil bii lɛ aŋɔɔ.

¹ Oo Nyɔŋmɔ, wɔnu kɛ wɔtoi; wɔblematsɛmɛi lɛ egba wɔ nibii ni otsu yɛ amɛyinɔ, yɛ blema bei lɛ amli.

² Bɔ ni bo diɛŋtsɛ oshwie maji lɛ, ni otɛo owebii yɛ jɛi; bɔ ni ohao maji krokomɛi lɛ, shi owebii lɛ ohã amɛshwere.

³ Ejaakɛ jeee amɛ diɛŋtsɛ amɛklante nɔ amɛtsɔ̃ amɛŋɔ shikpɔŋ lɛ; asaŋ jeee amɛnineshiwalɛ hã amɛye kunim; shi moŋ ohewalɛ kɛ onyɛmɔ naa, kɛ ohiɛ ni kã amɛhe lɛ hã amɛye kunim; ejaakɛ oyɛ amɛhe tsuijurɔ.

⁴ Bo ji mimaŋtsɛ kɛ miNyɔŋmɔ, bo ohã Israel ye kunim srɔtoi lɛ.

⁵ Ohewalɛ naa wɔtsirɛɔ wɔhenyɛlɔi wɔtswiaa shi yɛ; ogbɛi mli wɔnaanaa mɛi ni teɔ shi woɔ wɔ lɛ anɔ yɛ.

⁶ Ejaakɛ jeee migãi nɔ mihiɛ kã, asaŋ jeee miklante aaahere miyiwala.

⁷ Shi moŋ bo ohere wɔyiwala yɛ wɔhenyɛlɔi adɛŋ, ni ohã mɛi ni he tsɛ̃ɔ wɔ lɛ ahiɛ gboi.

⁸ Bo Nyɔŋmɔ, onɔ wɔshwãa wɔfɔ̃ɔ daa nɛɛ, ni wɔɔɔda bo shi daa kɛaatee naanɔ.

⁹ Enɛɛmɛi fɛɛ sɛɛ lɛ, okwa wɔ, ni oba wɔ shi; ni okɛ wɔ efãaa ta dɔŋŋ.

¹⁰ Ohãa wɔjoɔ wɔhenyɛlɔi anaa foi, ni wɔhenyɛlɔi lɛ haa wɔnii.

¹¹ Ofee wɔ tamɔ toi ni akɛ amɛ miiya gbeehe; ni ogbɛ wɔ oshwã majimaji lɛ amli.

¹² Ohɔ̃ɔ omaŋbii lɛ ofoo, ni ahe amɛ mlɛo.

¹³ Ohã mɛi ni bɔle wɔ lɛ bɔɔ wɔ ahora, mɛi ni bɔle wɔ lɛ yeɔ wɔhe fɛo ni amɛŋmɔɔ wɔ.

¹⁴ Ohã wɔtsɔ̃mɔ mɛi ni abuuu amɛ yɛ majimaji lɛ ateŋ; wɔtsɔ̃mɔ hefɛoyelinii wɔhã majimaji lɛ.

¹⁵ Minaa mihiɛshishwiemɔ lɛ daa jenamɔ tuu; ni hiɛgbele hu emɔ mi,

¹⁶ yɛ ahorabɔlɔi lɛ kɛ sopalɔi lɛ awiemɔi ahewɔ ni hiɛgbele hu mɔɔ mi kɛ mina mihenyɛlɔ kɛ oweletɔlɔ lɛ.

¹⁷ Enɛɛmɛi fɛɛ eba wɔnɔ moŋ nɛ, shi kɛ̃lɛ wɔhiɛ kpako onɔ, ni wɔkuko wɔkɛ bo teŋ kpãŋmɔ lɛ mli.

¹⁸ Wɔkwako bo, ni jeee akɛ wɔbako wɔjeŋ tamɔ bɔ ni otaoɔ lɛ,

¹⁹ shi kɛ̃lɛ okumɔ wɔ butubutu yɛ ŋaŋgbei ahilɛhe ni okɛ duŋ kabitii eha wɔnɔ nɛɛ.

²⁰ Eji wɔhiɛ ekpa wɔNyɔŋmɔ lɛ gbɛi lɛ nɔ, ni wɔyaja maŋsɛɛ nyɔŋmɔ ko kulɛ,

²¹ ani bo Nyɔŋmɔ oleŋ lo? Ejaakɛ ole tsuiiaŋ teemɔŋnii.

²² Naa, ohewɔ lɛ akpãtãa wɔhiɛ be fɛɛ be, ni abuɔ wɔ tamɔ toi ni ayaagbe amɛ.

²³ Oo Nuŋtsɔ, tee shi, mɛɛba owɔɔ? Ohiɛ atsɛ̃, kaashɛrɛ wɔ oshwie kɛmiiya naanɔ.

²⁴ Mɛɛ hewɔ okɛ ohiɛ etee? Mɛɛba ohiɛ ekpa wɔmanehulu kɛ yi ni awaa wɔ lɛ nɔ?

²⁵ Ejaakɛ anaanaa wɔnɔ yɛ shikpɔŋ; ni wɔgbɔmɔtso eka su mli.

²⁶ Tee shi ni obaye obua wɔ. Yɛ osuɔmɔ ni tsakeee lɛ hewɔ lɛ heremɔ wɔyiwala.