Lalai 43 - ŊMALƐ KRƆŊKRƆŊ LƐ

Mɔ ko ni yɔɔ nomŋɔɔ mli sɔlemɔ

¹ Oo Nyɔŋmɔ, ye misane lɛ ohã mi; ni obu mi bem. Fã mihe yɛ maŋbii ni sheee bo gbeyei lɛ adɛŋ. Jiemɔ mi yɛ shishiulɔi kɛ mɛi ni yeee anɔkwa lɛ adɛŋ!

² Ejaakɛ bo ji Nyɔŋmɔ, mɔ abo ni mibaa. Mɛɛba oshɛ mi ofɔ̃? Mɛɛba sa akɛ manyiɛ mɔbɔmɔbɔ yɛ haomɔ ni henyɛlɔ haoɔ mi lɛ hewɔ?

³ Oo, hã ola kɛ onɔkwale lɛ aba; koni amɛbatsɔ̃ɔ mi gbɛ. Hã amɛ kɛ mi aba Zion ogɔŋ krɔŋkrɔŋ lɛ nɔ, kɛ oSɔlemɔwe lɛŋ.

⁴ Kɛkɛ lɛ maya Nyɔŋmɔ afɔleshãa latɛ lɛ he; maya Nyɔŋmɔ ni hãa mi miishɛɛ kpeteŋkple lɛ ŋɔɔ; ni matswa saŋku mikɛaajie oyi. Oo Nyɔŋmɔ, miNyɔŋmɔ.

⁵ Oo misusuma, mɛɛba ofee mɔbɔmɔbɔ nɛkɛ? Ni mɛɛ yeyeeye ofee yɛ mimli nɛɛ? Okɛ ohiɛ afɔ̃ Nyɔŋmɔ nɔ; shi majie eyi ekoŋŋ kɛ̃, mɔ ni ji miyelikɛbualɔ kɛ miNyɔŋmɔ lɛ.