Lalai 42 - ŊMALƐ KRƆŊKRƆŊ LƐ

WOLO NI JI ENYƆ (Lalai 42—72 ) Mɔ ko ni yɔɔ nomŋɔɔ mli sɔlemɔ

David Lala ni ekɛha lalatsɛ nukpa lɛ

¹ Bɔ ni ofrote shweɔ faa ni hoɔ lɛ, nakai nɔŋŋ misusuma shweɔ bo, Naa Nyɔŋmɔ.

² Misusuma miiye bo Nyɔŋmɔ ni ji Nyɔŋmɔ hiɛkãalɔ lɛ he kumai. Te be po ni maba, ni mabana Nyɔŋmɔ hiɛ hu?

³ Mihiɛ yaafonu etsɔ̃ miniyenii shwaneshwane kɛ nyɔɔŋnyɔɔŋ fɛɛ, be mli ni mɛi biɔ mi akɛ, “Nɛgbɛ oNyɔŋmɔ lɛ yɔɔ lɛ?”

⁴ Miwerɛ hoɔ mihe, kɛji mikai enɛɛmɛi: bɔ ni mi kɛ asafo yuu nyiɛɔ, bɔ ni amɛtoɔ yuu, ni minyiɛɔ amɛhiɛ kɛyaa Nyɔŋmɔ We lɛ; bɔ ni asafo lɛ bɔɔ oshe kɛ miishɛɛ, ni amɛkɛ shidaa lalai yeɔ gbijurɔ lɛ.

⁵ Oo misusuma, mɛɛba ofee mɔbɔmɔbɔ nɛkɛ? Mɛɛ yeyeeye ofee yɛ mimli nɛɛ? Okɛ ohiɛ afɔ̃ Nyɔŋmɔ nɔ, ejaakɛ majie eyi ekoŋŋ kɛ̃, mɔ ni ji miyelikɛbualɔ kɛ miNyɔŋmɔ lɛ.

⁶ Misusuma efee mɔbɔmɔbɔ yɛ mimli, no hewɔ ni mikaiɔ bo, yɛ Yordan shikpɔŋ lɛ kɛ Hermon gɔji lɛ, kɛ Mizar gɔŋ lɛ nɔ nɛɛ.

⁷ Onujɔi lɛ agbɛɛmɔ jijeɔ, eko nyiɛ eko sɛɛ. Oshɔkei kɛ omlɛ̃mlɛ̃i lɛ fɛɛ ekumɔ eshwie minɔ, ni esu miyi.

⁸ Shwane lɛ, Yehowa jieɔ esuɔmɔ ni tsakeee lɛ kpo etsɔ̃ɔ mi; ni nyɔɔŋ lɛ milaa Yehowa he lala; ni misɔleɔ mitsɛɔ miNyɔŋmɔ, mɔ dɛŋ ni miwala yɔɔ lɛ.

⁹ Mikɛɔ Nyɔŋmɔ, mitɛsaa lɛ, akɛ, “Mɛɛba ohiɛ ekpa minɔ? Mɛɛba sa akɛ manyiɛ mɔbɔmɔbɔ yɛ haomɔ ni henyɛlɔ haoɔ mi lɛ hewɔ?”

¹⁰ Ahora ni mihenyɛlɔi lɛ bɔɔ mi lɛ, shãa mi tamɔ fala, be mli ni amɛbiɔ mi daa akɛ, “Nɛgbɛ oNyɔŋmɔ lɛ yɔɔ?” lɛ.

¹¹ Oo misusuma, mɛɛba ofee mɔbɔmɔbɔ yɛ mimli nɛkɛ? Ni mɛɛ yeyeeye ofee yɛ mimli nɛɛ? Okɛ ohiɛ afɔ̃ Nyɔŋmɔ nɔ, ejaakɛ majie eyi ekoŋŋ kɛ̃, mɔ ni ji miyelikɛbualɔ kɛ miNyɔŋmɔ lɛ.