Lalai 35 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David Lala ko.

¹ Oo Yehowa, okɛ mɛi ni kɛ mi ena lɛ ana; okɛ mɛi ni kɛ mi wuɔ lɛ awu!

² Kɔ tsɛŋ wulu kɛ tsɛŋ bibioo ni ote shi oye obua mi.

³ Gbalamɔ akplɔ kɛ lema owo mɛi ni nyiɛ misɛɛ lɛ. Kɛɛmɔ misusuma akɛ, “Mi ji oyiwalaheremɔ.”

⁴ Mɛi ni nyiɛ misɛɛ ni taoɔ mi agbe lɛ, hã amɛhiɛ ashwie shi, ni amɛhe guɔ agbo. Mɛi ni jwɛŋɔ mihe efɔŋ lɛ, hã ashwie amɛ kɛku sɛɛ kɛ hiɛgbele.

⁵ Be ni Yehowa bɔfo lɛ shwieɔ amɛ kɛyaa lɛ hã amɛtsɔ̃ tamɔ tutuu yɛ kɔɔyɔɔ naa.

⁶ Be ni Yehowa bɔfo lɛ nyiɛ amɛsɛɛ lɛ, hã amɛgbɛ nɔ awo duŋ ni enɔ ashãmɔ.

⁷ Mifeko amɛ efɔŋ ko kwraa shi amɛtsɔ mi tsɔne amɛtee; koni edu mi, ni amɛtsa bu kwɔŋkwɔŋ koni magbee mli ni magbo.

⁸ Hã amɛhiɛ akpãtã trukaa. Hã tsɔne ni amɛ diɛŋtsɛ amɛtsɔ̃ lɛ nɔŋŋ adu amɛ. Hã amɛgbee bu ni amɛtsa lɛ mli ni amɛhiɛ akpãtã.

⁹ Kɛkɛ lɛ, misusuma mli aaafli lɛ yɛ Yehowa hewɔ, mimii aaashɛ mihe, ejaakɛ ehere mi.

¹⁰ Migbɔmɔtso muu lɛ fɛɛ aaakɛɛ akɛ, “Oo Yehowa, namɔ tamɔ bo, bo mɔ ni ohereɔ gbɔjɔlɔi kɛjɛɔ mɛi ni he wawaa fe amɛ lɛ adɛŋ; ni ohereɔ gbedelɔi kɛ ohiafoi kɛjeɔ mɛi ni yeɔ amɛ amim lɛ adɛŋ.”

¹¹ Odasefoi yiwalɔi teɔ shi woɔ mi. Amɛbiɔ mi nibii ni mileee he nɔ ko.

¹² Amɛkɛ efɔŋ toɔ mi ekpakpa najiaŋ; mikla tete etɔ biti.

¹³ Shi mi lɛ, be ni amɛhe yeɔ lɛ, mibu kpekpe; mikɛ ŋmaahilɛ wa mihe yi, ni mima miyi shi misɔle,

¹⁴ tamɔ nɔ ni minaanyo loo minyɛminuu he ŋkɔmɔ miyeɔ lɛ. Minyiɛ mɔbɔmɔbɔ ni mima miyi shi, tamɔ mɔ ko ni enyɛ egbo ni eeye enyɛ he ŋkɔmɔ.

¹⁵ Shi mi lɛ, kɛ mitɛ lɛ, amɛbuaa amɛhe naa kɛ miishɛɛ; amɛbuaa amɛhe naa amɛwoɔ mi; niiahetswialɔi ni mileee amɛ lɛ, kpaaa miheguɔ gbee.

¹⁶ Amɛyeɔ mihe fɛo ni amɛfɔ̃ɔɔ; amɛkpeɔ amɛnyanyɔji ashishi amɛwoɔ mi.

¹⁷ Oo Yehowa, mɛɛbe oookwɛ enɛ kɛyashi? Jiemɔ mi kɛje amɛdɛŋ hiɛkpãtãmɔ mli, heremɔ miyiwala kɛjɛ jatai nɛɛ adɛŋ.

¹⁸ Kɛkɛ lɛ mada bo shi yɛ asafo kpele lɛ mli; majie oyi yɛ mɛi pii ahiɛ.

¹⁹ Kaahã mɛi ni nyɛɔ mi yakatswaa lɛ miiye mi yɔɔ; ni kaahã mɛi ni he tsɛ̃ɔ mi yakatswaa lɛ mikpɛkpɛɛ mi.

²⁰ Ejaakɛ amɛwieee hejɔlɛ wiemɔ; shi moŋ amɛfoɔ saji amɛshwieɔ mɛi ni he jɔ yɛ shikpɔŋ lɛ nɔ lɛ anɔ.

²¹ Amɛgbɛɔ amɛdaaŋ hatoo amɛwoɔ mi; amɛkɛɔ akɛ, “Yiɛ, yiɛ, wɔna kɛ wɔhiŋmɛi.”

²² Oo Yehowa, bo diɛŋtsɛ ona, kaafee diŋŋ! Oo Yehowa, okɛ mi teŋ akajekɛ kwraa.

²³ MiNyɔŋmɔ kɛ miNuŋtsɔ, kojomɔ ohã mi. Wo ohe nɔ ni oye misane lɛ ohã mi.

²⁴ Oo Yehowa, miNyɔŋmɔ, buu mi bem yɛ ojalɛ lɛ naa, ni kaahã mihenyɛlɔi lɛ miiye mi yɔɔ.

²⁵ Kaahã amɛmiikɛɛ yɛ amɛyiŋ akɛ, “Gbeebi akle, nɔ ni wɔtaoɔ nɛ.” Kaahã amɛmiikɛɛ akɛ, “Wɔnine egbe lɛ.”

²⁶ Mɛi ni nyaa yɛ mimanehulu hewɔ lɛ hã ashwie amɛhiɛ shi ni amɛhiɛ agboi. Mɛi ni woɔ amɛhe nɔ, ni amɛtsɛɔ amɛhe yɛ minɔ lɛ, hã amɛhiɛgbele kɛ heguɔgbee lɛ atsɔ̃ amɛhe bo.

²⁷ Mɛi ni taoɔ mi ejurɔ lɛ, hã amɛbɔ oshe kɛ nyamɔ ni amɛkɛɛ daa akɛ, “Naa Nyɔŋmɔ je agbo; lɛ enyaa etsulɔ ejurɔyeli he kɛ miishɛɛ.”

²⁸ Kɛkɛ lɛ, majaje ojalɛ lɛ, ni majie oyi daa nɛɛ.