Lalai 31 - ŊMALƐ KRƆŊKRƆŊ LƐ

Nyɔŋmɔ nɔ hemɔkɛyeli he sɔlemɔ

David Lala ni ekɛha lalatsɛ nukpa lɛ.

¹ Oo Yehowa, bo abo mibaa, kaahã mihiɛ miigbo gbi ko gbi ko. Okɛ ojalɛ lɛ ahere mi.

² Ba otoi shi ohã mi. Feemɔ oya ni ohere mi. Tsɔ̃ mibobaahe tɛsaa, kɛ mɔɔ ni wa ni okɛhere miyiwala.

³ Hɛɛ! Bo ji mitɛsaa kɛ mimɔ̃ɔ. Ogbɛi lɛ hewɔ lɛ, nyiɛmɔ mihiɛ, ni otsɔ̃ɔ mi gbɛ.

⁴ Jiemɔ mi kɛjɛ tsɔne ni amɛtsɔ̃ yɛ teemɔ mli lɛ mli; ejaakɛ bo nɔŋŋ pɛ ji mibobaahe.

⁵ Miitu mimumɔ miiwo bo odɛ̃ŋ, ejaakɛ bo okpɔ̃ mi. Oo Yehowa, bo Nyɔŋmɔ anɔkwafo.

⁶ Minyɛɔ mɛi ni kɛ amɛhiɛ fɔ̃ɔ yaka amãgãi anɔ lɛ, shi mi lɛ, Yehowa nɔ mihiɛ kã.

⁷ Mimli aaafli mi, ni manya yɛ osuɔmɔ ni sɛɛ efooo lɛ hewɔ. Ejaakɛ ona minɔnaa lɛ, ni ole mihaomɔ lɛ.

⁸ Oŋmɛko mihe owoko henyɛlɔ lɛ dɛŋ; shi moŋ, ohã minane ena maahe.

⁹ Oo Yehowa, naa mi mɔbɔ, shi efi mi; mihiŋmɛii kɛ mikla kɛ migbɔmɔtso fɛɛ egbɔjɔ kɛ awerɛho sɔŋŋ.

¹⁰ Shi miyeɔ ŋkɔmɔ miwalabeiaŋ fɛɛ, ni midɔmɔɔ ŋtsɔi yɛ mifii lɛ amli. Mihe esha hewɔ lɛ, mihewalɛ nɔ egbɔ ni miwui lɛ amli hu egbɔjɔ.

¹¹ Mitsɔ̃ ahorabɔɔnɔ mihã mihenyɛlɔi. Mitsɔ̃ jatsu kpele mihã mihe gbɔmɛi; mitsɔ̃ gbeyei nɔ yɛ minanemɛi ahiɛ. Mɛi ni naa mi yɛ blohuiaŋ lɛ, joɔ minaa foi.

¹² Hiɛ ekpa minɔ tamɔ gbonyo ni ajie jwɛŋmɔ yɛ enɔ, Mitsɔ̃ tamɔ gbɛ́ ko.

¹³ Hɛɛ! Miinu mɛi pii miiwie ablɛbi. Gbeyei ebɔle mi kɛkpe be ni amɛtee miyi nɔ ajina ni amɛkpãŋɔ miyi nɔ koni amɛkpãtã mihiɛ lɛ.

¹⁴ Shi mi lɛ, bo Yehowa onɔ mihiɛ kã. Mikɛɔ akɛ, “Bo ji miNyɔŋmɔ!”

¹⁵ Miwala be lɛ yɛ odɛ̃ŋ; jiemɔ mi kɛje mihenyɛlɔi kɛ mɛi ni waa mi yi lɛ adɛŋ.

¹⁶ Osuɔmɔ ni sɛɛ efooo lɛ hewɔ lɛ, heremɔ miyiwala. Kwɛmɔ mi otsulɔ koni ona mi mɔbɔ.

¹⁷ Oo Yehowa, kaahã ashwie mihiɛ shi, ejaakɛ bo miboɔ mitsɛɔ. Hã miyiwalɔi lɛ moŋ ahiɛ ashwie shi. Hã amɛtɔ mu kɛya gbohiiaje.

¹⁸ Hã amalelɔi lɛ amua amɛnaa, mɛi ni kɛ hewoo kɛ heguɔgbee wieɔ wiemɔi ni esaaa shiɔ jalɔi lɛ.

¹⁹ Oo, kwɛ bɔ ni omlihilɛ ni oyɔɔ kɛhã mɛi ni sheɔ bo gbeyei lɛ fa babaoo hã. Ojieɔ otsɔ̃ɔ mɛi ni baa bo abo lɛ yɛ gbɔmɛi ahiɛ.

²⁰ Oŋɔɔ amɛ oteɔ yɛ ohiɛ teemɔhe lɛ mli. Kɛjeɔ mɛi ayinɔ kpãŋmɔi amli, ni okɛ amɛ toɔ shweshweeshwe yɛ obuu lɛ mli.

²¹ Yijiemɔ ahã Yehowa ejaakɛ ejie enaakpɛɛ suɔmɔ ni sɛɛ efooo lɛ kpo etsɔ̃ɔ mi, be ni atua mi tamɔ maŋ ko ni asa eyi lɛ.

²² Yɛ mitsuifãa mli lɛ, mikɛɛ akɛ, “Ashwie mi kɛje ohiɛ kɛtee sɛɛ shɔŋŋ.” Kɛ̃lɛ, be ni mibo mitsɛ bo lɛ, obo mifaikpamɔ toi.

²³ Nyɛsumɔa Yehowa, nyɛ hetselɔi fɛɛ. Yehowa baa anɔkwafoi ayi, shi henɔwolɔi lɛ, ewoɔ amɛ nyɔmɔ babaoo.

²⁴ Nyɛ mɛi fɛɛ ni nyɛhiɛ kã Yehowa nɔ lɛ, nyɛwajea nyɛhe, ni nyɛfea ekãa.