Lalai 27 - ŊMALƐ KRƆŊKRƆŊ LƐ

Yijiemɔ sɔlemɔ

David Lala ko.

¹ Yehowa ji mila kɛ miyiwalaheremɔ, namɔ po gbeyei mashe? Yehowa ji miwala hewalɛ ni wa, namɔ hiɛ po mihe aaakpokpo yɛ?

² Kɛji efɔŋfeelɔi ni ji mihaolɔi kɛ mihenyɛlɔi ba amɛbatua mi, ni amɛmiitao mi amɛgbe po, amɛaatɛrɛ, ni amɛaagbeegbee shi.

³ Kɛji asafo ko gba ta ewo mi po, mitsui efaŋ. Kɛji ta te shi wo mi tete lɛ, no mli po lɛ, mana ekãa.

⁴ Nɔ koome mibiɔ yɛ Yehowa dɛŋ, ni no sɛɛgbɛ mitiuɔ: akɛ mahi shi yɛ Yehowa we lɛ, miwala gbii abɔ fɛɛ; ni mana Yehowa lɛ, ni makase nii hu yɛ eSɔlemɔ we lɛ.

⁵ Ejaakɛ fimɔ gbi nɔ lɛ, eeeŋɔ mi ehɔ ebuu lɛ mli; eeeŋɔ mi etee ebuu lɛŋ teemɔhe lɛ, eeewo mi edamɔ tɛsaa nɔ.

⁶ Ni eeewo minɔ yɛ mihenyɛlɔi ni ebɔle mi lɛ anɔ; ni mikɛ mliflimɔ aaabɔ oshe, ni mashã afɔle yɛ ebuu lɛŋ. Mala, ni matswa saŋku mahã Yehowa.

⁷ Oo Yehowa, kɛji mibo mitsɛ bo lɛ, bo mi toi. Naa mi mɔbɔ, ni ohere mi nɔ.

⁸ Owiemɔ lɛ kɛɔ akɛ, “Nyɛtaoa mihiɛgbɛ.” “Yehowa, bo ohiɛgbɛ lɛ mitaoɔ nɛɛ.”

⁹ Kaaŋɔ ohiɛ otee mi. Kaashwie otsulɔ yɛ mlifu naa. Bo ji miyelikɛbualɔ. Kaashɛ mi ofɔ̃, ni kaakwa mi hu, miyiwalaheremɔ Nyɔŋmɔ.

¹⁰ Kɛji mitsɛ kɛ minyɛ kwa mi tete lɛ, bo Yehowa ooobaa miyi.

¹¹ Oo Yehowa, tsɔ̃ɔmɔ mi ogbɛ lɛ, ni okpala mi kɛtsɔ̃ tɛmpɔŋ ni kã shi faŋŋ nɔ; ejaakɛ mihenyɛlɔi lɛ ayi fa.

¹² Kaaŋmɛɛ mihe ohã tamɔ bɔ ni mihenyɛlɔi lɛ taoɔ lɛ; ejaakɛ amale odasefoi ete shi ewo mi, ni amɛmiishwe ni amɛwa mi yi.

¹³ Shi kɛ̃lɛ, miheɔ miyeɔ akɛ mana Yehowa mlihilɛ lɛ yɛ hiɛkãalɔi ashikpɔŋ nɛɛ nɔ.

¹⁴ Kwɛmɔ Yehowa gbɛ; wajemɔ ohe, ni ona tsui, ni okwɛ Yehowa gbɛ.