Lalai 22 - ŊMALƐ KRƆŊKRƆŊ LƐ

Piŋmɔŋ blɔmɔ kɛ yijiemɔ lala

David Lala ko ni ekɛha lalatsɛ nukpa lɛ.

¹ MiNyɔŋmɔ, miNyɔŋmɔ, mɛɛba okwa mi? Mɛɛba okɛ miyelikɛbuamɔ teŋ jɛkɛ nɛkɛ? Mɛɛba okɛ mikɛ̃ɛmɔ teŋ jɛkɛ nɛkɛ?

² Oo, miNyɔŋmɔ, mibolɔɔ shwane, shi ohereee mi nɔ. Mibolɔɔ nyɔɔŋ hu, ni mijɔɔɔ mihe.

³ Shi kɛ̃lɛ, mɔ Krɔŋkrɔŋ ji bo; mɔ koome pɛ yi ni Israel jieɔ kɛ lalai lɛ.

⁴ Wɔtsɛmɛi lɛ he bo ye, ni amɛkɛ amɛhiɛ fɔ̃ onɔ ni ojie amɛ.

⁵ Bo amɛbolɔ amɛtsɛ, ni ohere amɛ. Bo onɔ amɛkɛ amɛhiɛ fɔ̃ ni amɛhiɛ gboiii!

⁶ Shi mi lɛ, gɔgɔmi kɛkɛ ji mi, mishɛɛɛ gbɔmɔ. Mɛi bɔɔ mi ahora, ni mɛi nyaŋeɔ mi.

⁷ Mɛi fɛɛ ni naa mi lɛ yeɔ mihe fɛo; amɛgbɛɔ amɛdaaŋ, ni amɛhosoɔ amɛyitsei,

⁸ Amɛkɛɔ akɛ, “Tuu osane lɛ owo Yehowa dɛŋ; hã ni lɛ ehere bo, hã ni lɛ ehere mɔ he miishɛɛ ni eyɔɔ lɛ.”

⁹ Bo ojie mi kɛjɛ minyɛ musu mli, ohiɛ mi shweshweeshwe, be ni mikã minyɛ fufɔ naa.

¹⁰ Kɛjɛ mifɔmɔ mli beebe, aŋɔ mi aŋmɛ onɔ. Kɛjɛ be ni minyɛ fɔ mi nɛɛ bo ji miNyɔŋmɔ.

¹¹ Okɛ mi teŋ akajekɛ, ejaakɛ shi haomɔ ebɛŋkɛ, ni bualɔ ko bɛ.

¹² Henyɛlɔi babaoo ebɔle mi kɛkpe kpula, tamɔ tsina hii, amɛtamɔ Bashan tsina hii hewalɔi, ni efo sa ewo mihe.

¹³ Amɛgbɛɔ amɛdaaŋ hatohatoo amɛwoɔ mi; amɛtamɔ jata kramakrama ni miihuu.

¹⁴ Aloo mi ashwie tamɔ nu, ni mitalɔi amli egoi: ni mitsui esere yɛ mimli tamɔ wo agbaku.

¹⁵ Misɛŋ egbi tamɔ ŋɛsuko mli, mililɛi ekpɛtɛ midaaŋ; ni oshi mi oŋmɛ su mli tamɔ gbonyo.

¹⁶ Henyɛlɔi ebɔle mi kɛkpe tamɔ shifɔji; mɛi fɔ̃ji asafo efo sa ewo mihe kpula, amɛtserɛ miniji kɛ minaji.

¹⁷ Manyɛ makane mimli wui fɛɛ; mihenyɛlɔi lɛ taa gãa amɛkwɛɔ mi.

¹⁸ Amɛja mitadei lɛ amli amɛhã amɛhe, ni mihebo lɛ, amɛfɔ̃ nɔ oshiki.

¹⁹ Oo Yehowa, kaahi sɛɛ shɔŋŋ. Oo, bo mihewalɛ, feemɔ oya ni oye obua mi.

²⁰ Jiemɔ misusuma kɛjɛ klante naa gbele mli, heremɔ miyiwala kɛjɛ shifɔji lɛ adɛŋ.

²¹ Jiemɔ mi kɛjɛ jatai adaaŋ, heremɔ miyiwala kɛje wuoi akoji ateŋ.

²² Majaje onifeemɔi lɛ matsɔ̃ɔ minyɛmimɛi lɛ, ni majie oyi yɛ asafo lɛ mli.

²³ Nyɛ Yehowa gbeyeishelɔi, nyɛjiea Yehowa yi. Nyɛ Yakob shwiei fɛɛ, nyɛwoa ehiɛ nyam; ni nyɛ Israel shwiei bluublu, nyɛkɛ woo ahãa lɛ.

²⁴ Ejaakɛ ekwaaa nɔnalɔ nɔnaa lɛ, ni ekuuu ehiɛ efɔ̃ɔɔ nɔnalɔ nɔ. Shi be ni nɔnalɔ bo etsɛ lɛ lɛ, ehere lɛ nɔ.

²⁵ Bo ohãa mijieɔ oyi yɛ asafo kpele lɛ mli; maye mishiwoi lɛ anɔ yɛ mɛi ni sheɔ bo gbeyei ni amɛjaa bo lɛ ahiɛ.

²⁶ Ohiafoi aaaye nii, ni amɛaatɔrɔ; mɛi ni taoɔ Yehowa sɛɛgbɛ lɛ, aaajie eyi. Amɛyi ana wala kɛya naanɔ.

²⁷ Jeŋ koji kpawo lɛ aaakai, ni amɛaakpale kɛaaba Yehowa ŋɔɔ; ni majimaji lɛ amli akutsei lɛ fɛɛ aaakula shi amɛja lɛ.

²⁸ Ejaakɛ maŋtsɛyeli lɛ Yehowa nɔ ni, ni lɛ eyeɔ majimaji lɛ anɔ.

²⁹ Lɛ shikpɔŋ lɛ nɔ hewolɔi lɛ fɛɛ aaakoto. Mɛi ni egboi momo, kɛ mɛi ni baagboi fɛɛ baakoto lɛ.

³⁰ Yinɔbii fɛɛ aaasɔmɔ lɛ, gbɔmɛi baagba Nuŋtsɔ lɛ he sane atsɔ̃ɔ yinɔbii ni baa lɛ.

³¹ Abaajaje atsɔ̃ɔ yinɔbii ni afɔko tete lɛ akɛ lɛ, Yehowa lɛ, ehere maŋ lɛ yiwala.