Lalai 19 - ŊMALƐ KRƆŊKRƆŊ LƐ

Nyɔŋmɔ anunyam ni yɔɔ adebɔɔ mli

David Lala ni ekɛha lalatsɛ nukpa lɛ.

¹ Ŋwɛi gbaa Nyɔŋmɔ anunyam lɛ etsɔ̃ɔ, ni atatu jieɔ eninenaa nitsumɔ lɛ kpo.

² Gbi fɛɛ gbi gbaa anunyam lɛ, ni nyɔɔŋ fɛɛ nyɔɔŋ shiɛɔ enilee lɛ.

³ Anuuu gbee ko, anuuu wiemɔ ko. Ni anuuu amɛgbee ko nɛ,

⁴ shi kɛ̃lɛ nɔ ni amɛwieɔ lɛ kpeleɔ jeŋ fɛɛ, ni anuɔ yɛ he fɛɛ he. Nyɔŋmɔ eshi buu yɛ ŋwɛi ehã hulu, ni hulu fãa kɛjeɔ kpo,

⁵ tamɔ ayɛmforowu jeɔ kpo kɛjɛɔ epia mli; ni emliflimɔ lɛ, etamɔ foidalɔ mliflimɔ ni ekɛdaa foi.

⁶ Ejeɔ yɛ ŋwɛi naagbeehe kome, ni ebɔleɔ shi kɛyaa naagbeehe kroko, ni nɔ ko nɔ ko eteee ehe yɛ enaa la lɛ hiɛ.

Yehowa Mla lɛ

⁷ Yehowa mla lɛ hi kɛwula shi; ehãa gbɔmɔ susuma naa hewalɛ hee. Yehowa mla lɛ maa shi shiŋŋ; ehãa humii leɔ nii.

⁸ Yehowa akpɔi lɛ ja pɛ, amɛhãa mɔ tsui nyaa. Yehowa kitãi lɛ yɛ krɔŋŋ, amɛhãa mɔ hiŋmɛi gbeleɔ.

⁹ Yehowa gbeyeishemɔ lɛ he tse, ehiɔ shi kɛyaa naanɔ. Yehowa kojomɔi lɛ anɔkwale ni, fɛɛ ja kɛmɔ shi.

¹⁰ Amɛyɛ akɔnɔ fe shika, amɛfe shika krɔŋŋ tete; amɛŋɔɔ fe wo hu, amɛŋɔɔ fe wo agbaku po.

¹¹ Asaŋ nomɛi bɔɔ otsulɔ kɔkɔ; amɛnɔyeli lɛ, sɛɛnamɔ kpele yɛ mli.

¹² Namɔ aaanyɛ lɛ diɛŋtsɛ etɔmɔi ena? Yehowa, jiemɔ mi kɛjɛ midujiaŋ tɔ̃mɔi amli.

¹³ Baamɔ mi otsulɔ, miyi kɛjɛ eshai ni gbɔmɔ hiɛ kã he ni efeɔ lɛ mli. Kaahã eshai lɛ miiye minɔ; no dani mahi kɛwula shi, ni mihe aaaje tɔ̃mɔi kpelei amli.

¹⁴ Yehowa, hã midaaŋ wiemɔ kɛ mitsuiŋ susumɔi asa ohiɛ; bo mitɛsaa kɛ mikpɔlɔ lɛ!