Lalai 18 - ŊMALƐ KRƆŊKRƆŊ LƐ

David kunimyeli lala

David Lala ni ekɛha lalatsɛ nukpa be mli ni Yehowa jie lɛ yɛ ehenyɛlɔi kɛ Saul dɛŋ.

¹ Oo Yehowa, miisumɔ bo; bo ji mihewalɛ.

² Yehowa ji mitɛsaa kɛ mimɔɔ ni wa, kɛ mijielɔ. MiNyɔŋmɔ kɛ mitɛsaa, mɔ mli ni mibaa abo yɛ; bo ji mitsɛŋ kɛ miyiwalaheremɔ akloŋto. Bo ji mimɔɔ ni wa.

³ Mibo mitsɛ Yehowa, mɔ ni sa yijiemɔ lɛ, ni ehere miyiwala kɛjɛ mihenyɛlɔi lɛ adɛŋ.

⁴ Gbele kpãi lalaa mi, ni ŋshɔkei wuji lota mi.

⁵ Gbohiiaje kpãi lalaa mi kɛkpe, migbee gbele tsɔnei amli.

⁶ Mifĩmɔ mli lɛ, mitsɛ Yehowa; mibo mitsɛ miNyɔŋmɔ lɛ, koni eye ebua mi. Ejɛ Sɔlemɔ we lɛ tɔ̃ɔ ni enu migbee; ni mibolɔmɔ lɛ bote etoiŋ.

⁷ Kɛkɛ ni shikpɔŋ lɛ kpokpo, ni gɔji lɛ ashishitoo lɛ hu hoso, ni amɛjo bliblibli; ejaakɛ Nyɔŋmɔ mli efu.

⁸ Lasu fã kɛjɛ egugɔ mli kɛtee ŋwɛi; ni la ni kpãtãa nii ahiɛ jɛ edaaŋ; ŋai ni miitso jɛ edaaŋ.

⁹ Nyɔŋmɔ hã ŋwɛi kpoo enaa shi, kɛkɛ ni lɛ diɛŋtsɛ ebayi shi ni duŋ kabitii yɛ enajiaŋshi.

¹⁰ Eta kerub nɔ, ni efiliki; eta kɔɔyɔɔ fiji anɔ kɛkpeleke shi oya.

¹¹ Ekɛ duŋ ha ehe; oblɔtu kpii ni eshi lutulutu eshi yɛ eyiteŋ tamɔ akatamanso.

¹² Nyɔŋmɔŋtɛi kɛ ŋai ni miitso kpɛlɛ kɛtsɔ̃ oblɔtu kabitii lɛ mli kɛnyiɛ ehiɛ.

¹³ Kɛkɛ ni Yehowa shi yɛ ŋwɛi tamɔ ŋwɛi shiimɔ, ni ŋwɛi flooflonyo lɛ wo egbee.

¹⁴ Etsɛ̃rɛ egãimlibii lɛ, ni ekɛgbɛ ehenyɛlɔi lɛ eshwã. Ehã srawa gbalagbalai ni ekɛgbɛ amɛ eshwã kɛ foi.

¹⁵ Oo Yehowa, oyiŋaa naa kɛ ogugɔŋ mumɔ gbɛɛmɔ naa hã ŋshɔ mli ŋkajai lɛ je kpo, ni je lɛ shishitoo lɛ bakamɔ shi faŋŋ.

¹⁶ Ekpã enine mli kɛjɛ ŋwɛi ni ebawo mi, ni egbala mi kɛjɛ nui babaoo mli.

¹⁷ Ejie mi kɛjɛ mihenyɛlɔi ni he wa lɛ kɛ mɛi hu ni hetsɛ̃ɔ mi lɛ adɛŋ; ejaakɛ amɛhe wa fe mi kwraa.

¹⁸ Amɛbatua mi yɛ mimanehulu gbi lɛ nɔ; shi Yehowa ji mɔ ni fã mihe.

¹⁹ Ejie mi kɛtee he ni lɛɛ lɛkɛtɛɛ. Ejie mi, ejaakɛ eyɛ mihe tsui.

²⁰ Yehowa to mi najiaŋ yɛ mijalɛ lɛ naa; ejuro mi, ejaakɛ muji ko bɛ mihe.

²¹ Ejaakɛ miba mijeŋ yɛ Yehowa hiɛ, ni mijeko miNyɔŋmɔ lɛ sɛɛ yɛ gbɛ fɔŋ ko nɔ.

²² Ejaakɛ miye emlai lɛ fɛɛ anɔ, ni mikuko ekpɔi lɛ ekoeko mli.

²³ Shwamɔ ko bɛ mihe yɛ ehiɛ, ni miwiɔ mihe kɛjeɔ nɔsha he.

²⁴ Yehowa to mi najiaŋ yɛ mijalɛ naa, ejaakɛ muji ko bɛ midɛŋ yɛ ehiɛ.

²⁵ Yehowa, mɛi ni yeɔ bo anɔkwa lɛ, bo diɛŋtsɛ oyeɔ amɛ anɔkwa; ni mɛi ni shwamɔ ko bɛ amɛhe lɛ, ojieɔ ohe kpo otsɔ̃ɔ amɛ akɛ bo diɛŋtsɛ lɛ shwamɔ bɛ ohe.

²⁶ Mɔ ni he tse lɛ, ojieɔ ohe kpo otsɔ̃ɔ lɛ akɛ oyɛ krɔŋŋ; ni mɔ ni bɛ eŋɛlɛnɔ lɛ, okɛ lɛ yeee.

²⁷ Mɛi ni baa amɛhe shi lɛ, ohereɔ amɛ; shi hiŋmɛii ni woɔ amɛhe nɔ lɛ, obaa amɛ shi.

²⁸ Oo Yehowa, miNyɔŋmɔ, lɛɛlɛŋ bo ohãa mi kane; ni ohãa miduŋ mli kpɛɔ kɛ la.

²⁹ Lɛɛlɛŋ, ohewalɛ naa lɛ, mabutu henyɛlɔi asafo. MiNyɔŋmɔ hewalɛ naa lɛ, mahuru gbogbo.

³⁰ Nyɔŋmɔ nɛɛ, enifeemɔinii fɛɛ hi kɛwula shi. Yehowa yeɔ eshiwoi anɔ. Eji tsɛŋ kɛhã mɛi fɛɛ ni baa lɛ abo lɛ.

³¹ Shi namɔ ji Nyɔŋmɔ kɛjɛ Yehowa sɛɛ? Ni namɔ ji wɔbobaahe yɛ wɔNyɔŋmɔ lɛ sɛɛ.

³² Lɛ ji Nyɔŋmɔ ni miãa mi kɛ hewalɛ; ni ehãa mifeɔ shweshweeshwe yɛ migbɛi fɛɛ amli.

³³ Ehã minajiaŋ wa tamɔ ofrote, ni eŋɔ mi edamɔ gɔji anɔ shweshweeshwe.

³⁴ Etsɔ̃ɔ mi tawuu, koni manyɛ akɔɔble gãi po mli madɔ.

³⁵ Oo Yehowa, okɛ oyiwalaheremɔ tsɛŋ lɛ ehere miyiwala; ni ohewalɛ hiɛ mimli, ni oyibaamɔ lɛ ehã mije agbo.

³⁶ Ohãa mifamɔɔ minaji zãaŋzãaŋ, ni mishaneee.

³⁷ Mitiu mihenyɛlɔi lɛ ni minina amɛ; mikpaleee kɛjeee amɛsɛɛ kɛyashi miplenee amɛ.

³⁸ Mitswia amɛ nii bɔ ni amɛnyɛɛɛ shi amɛte dɔŋŋ. Amɛnyɔnyɔi yɛ minaji anaa.

³⁹ Ejaakɛ omia mi, ni mina hewalɛ kɛhã tawuu, ni ohã mihenyɛlɔi lɛ nyɔnyɔɔi yɛ mihiɛ.

⁴⁰ Ohã mihenyɛlɔi lɛ tsɔ̃ amɛsɛɛ amɛhã mi, ni mikpãtã mɛi ni nyɛɔ mi lɛ ahiɛ.

⁴¹ Amɛbolɔ amɛtsɛ yelikɛbuamɔ; shi mɔ ko mɔ ko yeee buaaa amɛ. Amɛbolɔ amɛtsɛ Yehowa, shi efooo amɛdaaŋ.

⁴² Miwiɛ amɛ mɔnyɔmɔnyɔ ni amɛtsɔ̃ tamɔ mlu ni kɔɔyɔɔ loɔ kɛyaa. Miloo amɛ mishwie tamɔ blohuŋ ŋmɔtɔ.

⁴³ Ohãaa maŋsɔ̃ aba mi kɛ maŋbii ateŋ. Ofee mi majimaji lɛ atsɛ; mɛi ni mileee amɛ po basɔmɔ mi.

⁴⁴ Maŋsɛɛbii ba amɛhe shi amɛhã mi; amrɔ nɔŋŋ ni amɛaanu mihe lɛ, amɛkotoɔ mi.

⁴⁵ Maŋsɛɛbii atsui fã, ni amɛkɛ hekpokpomɔ je kpo kɛjɛ amɛmɔji lɛ amli kɛba.

⁴⁶ Yehowa hiɛ kã; ajie mitɛsaa lɛ yi; ni awo miyiwalaheremɔ Nyɔŋmɔ lɛ hiɛ nyam.

⁴⁷ Nyɔŋmɔ ni tɔɔ mihe owele, ni ebaa maji ashi ewoɔ mishishi lɛ.

⁴⁸ Lɛ mɔ ni ehereɔ mi kɛjɛɔ mihenyɛlɔi adɛŋ. Hɛɛ, bo owoɔ minɔ yɛ mihenyɛlɔi anɔ; bo ojieɔ mi yɛ yiwalɔi adɛŋ.

⁴⁹ Enɛ hewɔ lɛ, Yehowa, majie oyi yɛ majimaji lɛ ateŋ, ni mala majie ogbɛi lɛ yi.

⁵⁰ Yehowa hãa emaŋtsɛ lɛ yeɔ kunim kpelekplei, ni ejieɔ esuɔmɔ ni tsakeee lɛ kpo etsɔ̃ɔ mɔ ni efɔ lɛ mu lɛ; ni ji David kɛ eshwiei lɛ kɛmiiya naanɔ.