Lalai 17 - ŊMALƐ KRƆŊKRƆŊ LƐ

Mɔ ni efeko efɔŋ ko sɔlemɔ

David sɔlemɔ ko.

¹ Oo Yehowa, bo jalɛ sane toi; too otoi ohã mibolɔmɔ lɛ. Feemɔ toi ohã misɔlemɔ ni jeee amale ni lɛ.

² Bo diɛŋtsɛ buu mi bem, ejaakɛ bo onaa nɔ ni ja.

³ Kɛji oka mitsui okwɛ, kɛ otao mimli nyɔɔŋ, ni oka mi okwɛ lɛ, onaŋ nɔ fɔŋ ko kwraa yɛ mimli; mikɛ minaabu efeee efɔŋ.

⁴ Yɛ gbɔmɛi adesai anifeemɔnii agbɛfaŋ lɛ, mibo odaaŋ wiemɔ toi, ni minyiɛɛɛ yiwalɔi agbɛ lɛ nɔ.

⁵ Minane emɔ shi shiŋŋ yɛ ogbɛi lɛ anɔ, ni mishaneko.

⁶ Oo Nyɔŋmɔ, miibo miitsɛ bo, ejaakɛ ooohere mi nɔ; ba otoi shi ohã mi ni obo miwiemɔi lɛ atoi.

⁷ Jiemɔ onaakpɛɛ suɔmɔ ni tsakeee lɛ kpo otsɔ̃ɔ mi. Oo, bo yiwalaherelɔ ni okɛ ohewalɛ hereɔ mɛi ni taoɔ abobaa lɛ ayiwala kɛjɛɔ amɛhenyɛlɔi adɛŋ.

⁸ Baamɔ miyi tamɔ abaa hiŋmɛi mli ajaŋmalaatɛ yi. Okɛ mi atee ofiji ashishi hɔɔŋ lɛ mli.

⁹ Jiemɔ mi kɛjɛ mɛi fɔ̃ji ni waa mi yi, kɛ mihenyɛlɔi kakawuai ni ebɔle mi kɛkpe lɛ adɛŋ.

¹⁰ Amɛkpliŋ amɛtsui, ni amɛnaaa mɔbɔ, ni amɛkɛ amɛnaabui wieɔ hewoo wiemɔi.

¹¹ Amɛjaa misɛɛ mo, amɛbɔleɔ mihe kɛkpeɔ kpula; amɛ jie amɛhiɛ amɛka mi koni amɛtsi mi amɛtswa shi.

¹² Amɛtamɔ jata ni kɛ hiɛdɔɔ baatserɛ emilɛ loo; amɛtamɔ jatabi ni ewo antɛo yɛ odɔtɔ mli.

¹³ Oo Yehowa, tee shi owo mihenyɛlɔi lɛ, ni obutu amɛ. Okɛ oklante lɛ ajie misusuma yɛ mɔ fɔŋ lɛ dɛŋ.

¹⁴ Yehowa, kɛ onineshiwalɛ ajie mi kɛjɛ gbɔmɛi ni amɛna amɛgbɛfaŋnɔ yɛ wala be nɛɛ mli lɛ adɛŋ. Hã amɛmusui ayimɔ obɔ̃bɔ̃ kɛ toigbalamɔ ni osaa oto ohã amɛ lɛ; ni pii ashwɛ ahã amɛbii kɛ amɛbii abii.

¹⁵ Mi lɛ, mana ohiɛ, yɛ jalɛ mli; ni kɛ mihiɛ tsɛ̃ lɛ, mitsui aaatɔ, ejaakɛ mina bɔ ni oyɔɔ.