Lalai 148 - ŊMALƐ KRƆŊKRƆŊ LƐ

Jeŋ fɛɛ ajie Nyɔŋmɔ yi

¹ Nyɛjiea Nyɔŋmɔ yi! Nyɛjɛa ŋwɛi nyɛjiea Yehowa yi; nyɛjiea eyi yɛ ŋwɛi flooflo!

² Nyɛ, ebɔfoi lɛ fɛɛ nyɛjiea eyi! Nyɛ, etai lɛ fɛɛ nyɛjiea eyi!

³ Hulu kɛ nyɔɔŋtsere, nyɛjiea eyi! Nyɛŋulamii ni kpɛlɛɔ fiaa, nyɛjiea eyi!

⁴ Nyɛ ŋwɛii amli ŋwɛi, kɛ nui ni yɔɔ ŋwɛii amli ŋwɛi lɛ, nyɛjiea eyi!

⁵ Hã amɛ jie Yehowa gbɛi lɛ yi, ejaakɛ lɛ efã, ni abɔ amɛ.

⁶ Eŋɔ amɛ emamɔ shi kɛmiiya naanɔ; ewo amɛ akpɔ, ni amɛnyɛŋ nɔ amɛku.

⁷ Nyɛjɛa shikpɔŋ lɛ nɔ nyɛjiea Yehowa yi! Nuŋ loi wuji ni he yɔɔ gbeyei, bui ni mli kwɔlɔ fɛɛ,

⁸ la kɛ nyɔŋmɔŋtɛ, snoo kɛ afua, ahum ni yeɔ efãmɔ nɔ.

⁹ Nyɛjiea eyi nyɛ gɔji kɛ gɔŋkpɔi fiaa, tsei ni woɔ yibii kɛ tsenedrui fɛɛ!

¹⁰ Ŋaŋ kooloi kɛ shĩa kooloi fɛɛ, waamɔ nibii kɛ loofɔji.

¹¹ Shikpɔŋ nɔ majiatsɛmɛi kɛ majimaji anɔ bii fɛɛ, lumɛi kɛ shikpɔŋ lɛ nɔ kojolɔi fɛɛ,

¹² oblahii kɛ oblayei fɛɛ, onukpai kɛ gbekɛbii bluublu,

¹³ hã amɛ jie Yehowa gbɛi lɛ yi, ejaakɛ ekoome egbɛi lɛ nɔ awo gojoo fe gbɛii fɛɛ. Lɛ enunyam lɛ kwɔ fe shikpɔŋ kɛ ŋwɛi fɛɛ tete.

¹⁴ Ekɛ ehewalɛ kpele lɛ ewo emaŋbii anɔ. No hewɔ lɛ, emɛi krɔŋkrɔŋ lɛ ajie eyi, Israelbii, ni ji emaŋ ni bɛŋkɛ lɛ lɛ, nyɛjiea Yehowa yi!