Lalai 144 - ŊMALƐ KRƆŊKRƆŊ LƐ

Maŋtsɛ ko da Nyɔŋmɔ shi

David Lala.

¹ Yijiemɔ ahã Yehowa, mitɛsaa lɛ, mɔ ni tsɔ̃ɔ miniji tawuu kɛ miwaobii nɔmɔ lɛ.

² Lɛ ji mitɛsaa kɛ mimɔ̃ɔ, mibobaa mɔɔ ni wa, kɛ mijielɔ, mitsɛŋ kɛ mɔ abo ni mibaa lɛ. Lɛ ebaa mimaŋbii shi ewoɔ mishishi.

³ Oo Yehowa, mɛɛ ji gbɔmɔ adesa ni obuɔ ehe akɔntaa, loo gbɔmɔ bi ni ojwɛŋɔ ehe?

⁴ Gbɔmɔ lɛ etamɔ kɔɔyɔɔ, egbii lɛ tamɔ hɔ̃ɔŋ ni hoɔ.

⁵ Oo Yehowa, kpoo oŋwɛi lɛ naa shi koni oyi shi! Taramɔ gɔji lɛ ahe koni amɛje lasu!

⁶ Hã srawai agbala, koni ogbɛ ohenyɛlɔi lɛ oshwã. Tsɛ̃rɛ̃mɔ ogãimlibii lɛ koni owo amɛ foi.

⁷ Kpã onine mli kɛjɛ ŋwɛi; shɔ̃ mi koni ojie mi kɛjɛ nu kwɔŋkwɔŋ lɛ mli, kɛjɛ mɛi kpɔ̃ji adɛŋ,

⁸ mɛi ni maleɔ, ni amɛwoɔ amɛninejurɔ nɔ amɛkãa amale kitã lɛ.

⁹ Oo, Nyɔŋmɔ, mala lala hee mahã bo! Kpãi nyɔŋma saŋku matswa kɛjie oyi.

¹⁰ Bo ohãa maŋtsɛmɛi yeɔ kunim, ni ohereɔ otsulɔ David yiwala.

¹¹ Shɔ̃ mi kɛje yiwalɔ klante naa; kpɔ̃ mi kɛje mɛi kpɔ̃ji adɛŋ, mɛi ni maleɔ, ni amɛwoɔ amɛninejurɔ nɔ amɛkãa amale kitã lɛ.

¹² Wɔbihii adara yɛ amɛblahiiaŋ, tamɔ tsei ni atɛo ni amɛdara; ni wɔbiyei lɛ hu atãmɔ koŋtɛ ni ako ni akɛmaa maŋtsɛ we.

¹³ Wɔboŋoi lɛ ayimɔ obɔbɔ̃, kɛ niyenii srɔtoi fɛɛ; wɔtoi hu afɔfɔɔ akpekpei, kɛ akpei nyɔŋmanyɔŋmai yɛ ŋa nɔ.

¹⁴ Wɔtsinai hu afɔ babaoo; amɛkasharake, ni amɛkalaaje; akanu haomɔ blɔmɔ ko yɛ wɔblohuiaŋ.

¹⁵ Ajɔɔ maŋ ni naa nɛkɛ jɔɔmɔ nɛɛ! Ajɔɔ maŋ ni Yehowa ji eNyɔŋmɔ lɛ.