Lalai 142 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David Lala ko be mli ni eyɛ tɛkpolo lɛ mi. Sɔlemɔ ko.

¹ Miiwo migbee nɔ miibolɔ miitsɛ Yehowa, mikɛ migbee miikpa Yehowa fai.

² Miifɔse mikɔmɔi lɛ miishwie ehiɛ, miijaje mihaomɔi lɛ yɛ ehiɛ.

³ Be ni mimumɔ tɔ biti yɛ mimli lɛ, bo ole migbɛ lɛ. Mihenyɛlɔi etsɔ̃ tsɔne kɛtee mi yɛ gbɛ ni minyiɛ nɔ lɛ nɔ.

⁴ Kwɛ mininejurɔgbɛ, ni ooona akɛ mɔ ko mɔ ko bɛ ni le mi. Abobaahe ebɔ mi; Mɔ ko mɔ ko jwɛŋŋ mihe.

⁵ Oo Yehowa, miibolɔ miitsɛ bo! Mikɛɛ akɛ bo ji mibobaahe, bo ji migbɛfaŋnɔ yɛ hiɛkãalɔi ashikpɔŋ lɛ nɔ.

⁶ Feemɔ toi ohã mibolɔmɔ lɛ, ejaakɛ aba mi shi fe nine. Jiemɔ mi yɛ mihenyɛlɔi lɛ adɛŋ, ejaakɛ amɛhe wa fe mi.

⁷ Jiemɔ mi kɛje gboklɛfoi atsuŋ, koni mada bo shi. Jalɔi aaabɔle mi kɛkpe, ejaakɛ ofee mi ejurɔ.