Lalai 14 - ŊMALƐ KRƆŊKRƆŊ LƐ

Gbɔmɛi ayitsoŋwalɛ

David Lala ni ekɛha lalatsɛ nukpa lɛ.

¹ Kwashiai kɛɔ yɛ amɛtsuiŋ akɛ, “Nyɔŋmɔ ko bɛ!” Amɛfite, ni amɛfeɔ nyaŋemɔ nii; mɔ ko mɔ ko bɛ ni feɔ nɔ̃ kpakpa.

² Yehowa jɛɔ ŋwɛi ekwɛɔ gbɔmɛi abii, akɛ aleee nɔ eeena akɛ mɔ ko yɛ ni le nii ni etaoɔ Nyɔŋmɔ sɛɛgbɛ lo?

³ Amɛ fɛɛ amɛdu gbɛ, amɛ fɛɛ kwa amɛfite. Mɔ ko mɔ ko bɛ ni feɔ ekpakpa. Dabida, mɔ kome folo nɛkɛ bɛ.

⁴ Ani nɔfɔŋfeelɔi lɛ amɛleee nii? Mɛi ni yeɔ mimaŋbii tamɔ ayeɔ kɔmi, ni amɛsɔleee amɛtsɛɛɛ Yehowa lɛ, amɛbɛ jwɛŋmɔ!

⁵ Gbeyei kpele aaamɔmɔ amɛ, ejaakɛ Nyɔŋmɔ kɛ jalɔi lɛ yɛ.

⁶ Nɔfɔŋfeelɔi aaanyɛ afite ohiafo yiŋtoo nɛ; shi kɛ̃lɛ Yehowa ji ebobaahe.

⁷ Oo, kulɛ Israel yiwalaheremɔ lɛ ajɛ Zion aba! Kɛji Yehowa hã emaŋ lɛ ku sɛɛ na nii ekoŋŋ lɛ, no lɛ Yakob aaanya, ni Israel mii aaashɛ ehe.