Lalai 135 - ŊMALƐ KRƆŊKRƆŊ LƐ

Yijiemɔ lala

¹ Nyɛjiea Yehowa gbɛi lɛ yi! Nyɛ Yehowa tsuji fɛɛ, nyɛjiea eyi,

² nyɛ mɛi ni nyɛdamɔɔ Yehowa we lɛ yɛ wɔNyɔŋmɔ lɛ we lɛ kpoi lɛ anɔ lɛ.

³ Nyɛjiea Yehowa yi, ejaakɛ Yehowa hi! Nyɛlaa nyɛjiea egbɛi lɛ yi, ejaakɛ emli hi!

⁴ Ejaakɛ Yehowa eŋɔ Yakob ehã lɛ diɛŋtsɛ ehe, eŋɔ Israel efee lɛ diɛŋtsɛ enɔ.

⁵ Ejaakɛ mile akɛ Yehowa je agbo, ni wɔNuŋtsɔ lɛ, efe nyɔŋmɔi fɛɛ.

⁶ Nɔ fɛɛ nɔ ni sa Yehowa hiɛ, yɛ ŋwɛi kɛ shikpɔŋ lɛ nɔ, yɛ ŋshɔ kɛ bui voovoi lɛ amli lɛ, no efeɔ.

⁷ Lɛ ji mɔ ni hãa atatui woɔ kɛjɛɔ shikpɔŋ lɛ naagbeehei lɛ. Lɛ ehãa srawa gbalaa kɛfataa nunɛmɔ he ni ehãa kɔɔyɔɔ fãa kɛjɛɔ enitoohe lɛ.

⁸ Etswia Ijipt kromɔbii lɛ nii kɛjɛ gbɔmɔ nɔ kɛyashi kooloo nɔ.

⁹ Ijipt lɛ efee okadii kɛ naakpɛɛ nii yɛ mli ekɛgbala Farao kɛ etsuji lɛ fɛɛ toi;

¹⁰ ni etswia majimaji pii anii; ni egbegbee majiatsɛmɛi hewalɔi.

¹¹ Egbe Sihon, Amorbii lɛ amaŋtsɛ, kɛ Og, Bashan maŋtsɛ lɛ hu, kɛ Kanaan maŋtsɛmɛi lɛ fɛɛ.

¹² Eŋɔ amɛshikpɔŋ lɛ ehã akɛ gboshinii, akɛ gboshinii ehã emaŋ Israelbii lɛ.

¹³ Oo, Yehowa, ogbɛi lɛ hiɔ shi kɛyaa naanɔ! Oo Yehowa, ohiɛ nyam lɛ yɛ kɛmiiya yinɔi fɛɛ nɔ.

¹⁴ Ejaakɛ Yehowa aaabu emaŋbii lɛ bem, ni emusuŋ aaatsɔ̃ lɛ yɛ etsuji lɛ ahe.

¹⁵ Jeŋmaji lɛ amãgãi lɛ jwiɛtɛi kɛ shika ni, gbɔmɛi aninenaa nitsumɔi ni.

¹⁶ Amɛyɛ naabui, shi amɛwieee; amɛyɛ hiŋmɛii, shi amɛnaaa nii.

¹⁷ Amɛyɛ toii, shi amɛnuuu nii, asaŋ wala bɛ amɛmli.

¹⁸ Mɛi ni fee amɛ lɛ tamɔ amɛ nɔŋŋ; nakai nɔŋŋ ji mɛi ni kɛ amɛhiɛ fɔ̃ɔ amɛnɔ lɛ.

¹⁹ Oo Israel we, nyɛjiea Yehowa yi! Oo Aaron we, nyɛjiea Yehowa yi!

²⁰ Oo Levi we, nyɛjiea Yehowa yi! Nyɛ mɛi ni nyɛsheɔ Yehowa gbeyei, nyɛjiea Yehowa yi!

²¹ Ajɛ Zion ajie Yehowa yi, lɛ mɔ ni eyɔɔ Yerusalɛm lɛ! Nyɛjiea Yehowa yi!