Lalai 132 - ŊMALƐ KRƆŊKRƆŊ LƐ

Sɔlemɔ we lɛ kafomɔ

Zion lala ko.

¹ Oo Yehowa, kaimɔ David kɛ amanehului fɛɛ ni ena lɛ:

² bɔ ni ekã bo Yehowa kitã, ni ewo bo, Yakob Nyɔŋmɔ Hewalɔ Koome lɛ shi akɛ,

³ “Miboteŋ miwe lɛ mli, ni mikwɔŋ misaatso lɛ hu;

⁴ mibɛŋ mihiŋmɛi, ni mijieŋ mihiŋmɛi sɛɛ

⁵ kɛyaashi beyinɔ ni mana he ko mahã Yehowa. Hɛɛ, kɛyaashi mana shihilɛhe mahã Yakob Nyɔŋmɔ Hewalɔ Koome lɛ.”

⁶ Naa, wɔnu Kpãŋmɔ Adeka lɛ he yɛ Betlehem, ni wɔyana yɛ Yearim ŋa lɛ nɔ.

⁷ Wɔkɛɛ akɛ, “Nyɛhãa wɔbotea Yehowa we lɛŋ; nyɛhãa wɔjaa yɛ emaŋtsɛ sɛi lɛ hiɛ!”

⁸ Oo Yehowa, wo ohe nɔ ni oya ohejɔɔmɔhe lɛ, bo kɛ ohewalɛ Adeka lɛ.

⁹ Hã osɔfoi lɛ awula kɛ jalɛ tamɔ atade, ni omɛi krɔŋkrɔŋi lɛ abɔ oshe kɛ nyamɔ.

¹⁰ Otsulɔ David hewɔ lɛ, kaakwa maŋtsɛ ni ofɔ lɛ mu lɛ.

¹¹ Yehowa kã David kitã yɛ anɔkwale mli, ni ekuŋ mli. Ekɛɛ akɛ, “Maŋɔ omusuŋbii lɛ eko mata omaŋtsɛ sɛi lɛ nɔ.

¹² Kɛji obii lɛ ye mikpãŋmɔi lɛ kɛ mimlai ni matsɔ̃ɔ amɛ lɛ nɔ lɛ, no lɛ amɛ hu amɛbii aaata omaŋtsɛ sɛi lɛ nɔ daa.”

¹³ Ejaakɛ Yehowa eŋɔ Zion, ni eesumɔ akɛ ekɛfee eshihilɛhe.

¹⁴ “Mihejɔɔmɔhe nɛ kɛmiiya naanɔ; biɛ mahi, ejaakɛ biɛ misumɔɔ.

¹⁵ Majɔɔ niyenii babaoo nɔ mahã Zion, ni ohiafoi lɛ hu, mahã amɛtɔrɔ kɛ ŋmaa.

¹⁶ Esɔfoi lɛ, mikɛ miyiwalaheremɔ aaawo amɛ tamɔ atade; ni emɛi krɔŋkrɔŋi lɛ aaabɔ oshe kɛ nyamɔ.

¹⁷ Mahã Maŋtsɛ wulu ko ajɛ David shwiei lɛ amli, ni mahã mɔ ni mifɔ lɛ mu lɛ lumɔyeli lɛ ama shi.

¹⁸ Ehenyɛlɔi lɛ, mawo amɛ hiɛgbele, shi lɛ lɛ, ekekre lɛ aaakpɛlɛ.”