Lalai 118 - ŊMALƐ KRƆŊKRƆŊ LƐ

Kunimyeli he shidaa

¹ Oo, nyɛdaaa Yehowa shi, ejaakɛ ehi, ejaakɛ naanɔ esuɔmɔ ni tsakeee lɛ hiɔ shi kɛyaa.

² Hã Israelbii akɛɛ akɛ, “Naanɔ esuɔmɔ ni tsakeee lɛ hiɔ shi kɛyaa.”

³ Hã Aaronwe lɛ akɛɛ akɛ, “Naanɔ esuɔmɔ ni tsakeee lɛ hiɔ shi kɛyaa.”

⁴ Hã mɛi ni sheɔ Yehowa gbeyei lɛ akɛɛ akɛ, “Naanɔ esuɔmɔ ni tsakeee lɛ hiɔ shi kɛyaa.”

⁵ Mimanehulu lɛ mli lɛ mibolɔ mitsɛ Yehowa, ni Yehowa here mi nɔ, ni ehã miye mihe.

⁶ Akɛni Yehowa yɛ misɛɛ hewɔ lɛ, misheee gbeyei! Mɛni gbɔmɔ aaanyɛ mi afee?

⁷ Yehowa damɔ mimasɛi akɛ mibualɔ; ni mana mɛi ni nyɛɔ mi lɛ anaagbee.

⁸ Ehi akɛ abaa Yehowa abo, fe nɔ ni akɛ hiɛ aaafɔ̃ gbɔmɔ adesa nɔ.

⁹ Ehi akɛ abaa Yehowa abo, fe nɔ ni akɛ hiɛ aaafɔ̃ abladei anɔ.

¹⁰ Majimaji bɔle mihe kɛkpe kpula; Yehowa gbɛi mli lɛ, mifolɔ amɛmli mishwie.

¹¹ Amɛbɔle mi, hɛɛ, amɛbɔle mi kɛkpe kpula; Yehowa gbɛi mli lɛ, mifolɔ amɛmli mishwie.

¹² Amɛbɔle mi tamɔ wobii; amɛtso grigri tamɔ ŋmei la; Yehowa gbɛi mli lɛ, mifolɔ amɛmli mishwie.

¹³ Atsi mi waa, ni kulɛ miyagbee shi; shi Yehowa ye ebua mi.

¹⁴ Yehowa ji mihewalɛ kɛ milala; Yehowa etsɔ̃ miyiwalaheremɔ.

¹⁵ Nyɛboa toi, kunimyeli nyamɔ lalai miigbɛɛ yɛ jalɔi abuui amli.

¹⁶ Yehowa hewalɛ kpele lɛ ni fee enɛ! Yehowa hewalɛ lɛ ehã wɔye kunim. Ehewalɛ kpele lɛ ehã wɔye ta mli kunim.

¹⁷ Migboŋ, shi moŋ miyi aaana wala, ni majaje Yehowa nitsumɔi lɛ matsɔ̃ɔ.

¹⁸ Yehowa egbala mitoi waa moŋ, shi eŋɔko mi ehãko gbele.

¹⁹ Nyɛgbelea jalɛ agboi lɛ nyɛhãa mi, koni matsɔ̃ mli ni mayada Yehowa shi.

²⁰ Yehowa agbo lɛ nɛ. Jalɔi lɛ baatsɔ̃ mli kɛbote mli.

²¹ Miida bo shi akɛ ohere mi nɔ, ni otsɔ̃ miyiwalaheremɔ.

²² Tɛ lɛ ni tsutswalɔi lɛ kwa lɛ etsɔ̃ koŋtɛ.

²³ Yehowa nifeemɔnii nɛ; eyɛ naakpɛɛ yɛ wɔhiɛ.

²⁴ Ŋmɛnɛ ji gbi ni Yehowa fee lɛ, nyɛhãa wɔmli afilia wɔ, ni wɔnyaa yɛ mli.

²⁵ Oo Yehowa, ofainɛ, heremɔ wɔyiwala koo! Oo Yehowa, hã omanye aba koo!

²⁶ Ajɔɔ mɔ ni baa yɛ Yehowa gbɛi lɛŋ lɛ! Wɔmiijɔɔ nyɛ kɛmiijɛ Yehowa we lɛ.

²⁷ Yehowa lɛ ji Nyɔŋmɔ, ni ehã la etso ehã wɔ. Nyɛhiɛa gbijurɔ blɛo lɛ kɛyaa afɔleshãa latɛ lɛ koji lɛ ahe tɔ̃ɔ.

²⁸ Bo ji miNyɔŋmɔ, mada bo shi. Bo ji miNyɔŋmɔ, makafo bo.

²⁹ Oo, nyɛdaa Yehowa shi, ejaakɛ ehi; ejaakɛ naanɔ esuɔmɔ ni tsakeee lɛ hiɔ shi kɛyaa.