Lalai 106 - ŊMALƐ KRƆŊKRƆŊ LƐ

Yehowa mlihilɛ hã ewebii

¹ Nyɛjiea Yehowa yi! Nyɛdaa Yehowa shi, ejaakɛ ehi, ejaakɛ esuɔmɔ ni tsakeee lɛ hiɔ shi kɛyaa naanɔ.

² Namɔ aaanyɛ Yehowa hewalɛ nitsumɔi lɛ agba? Namɔ aaanyɛ eyijiemɔ lɛ agba kɛwula shi?

³ Ajɔɔ mɛi ni yeɔ jalɛ sane ni amɛfeɔ nɔ ni ja be fɛɛ be lɛ.

⁴ Oo Yehowa, kaimɔ mi kɛji ona omaŋ lɛ mɔbɔ. Kɛji oohere amɛyiwala lɛ, ye obua mi,

⁵ koni mana ohalamɔbii lɛ ashweremɔ, bɔ ni afee ni mi kɛ omaŋ lɛ mli afili lɛ, koni mi kɛ omaŋ lɛ fɛɛ anya kɛ yijiemɔ.

⁶ Wɔ kɛ wɔtsɛmɛi fɛɛ lɛ, wɔfee esha; wɔfee efɔŋ, ni wɔye yiwalɛ sane.

⁷ Be ni wɔblematsɛmɛi lɛ yɔɔ Ijipt lɛ, amɛyooo onaakpɛɛ nitsumɔi lɛ asɛɛ, amɛkaiii osuɔmɔ babaoo ni tsakeee lɛ; shi moŋ, amɛtse Ŋwɛi Flooflonyo lɛ hiɛ atua, yɛ Ŋshɔ Tsuru lɛ naa.

⁸ Shi kɛ̃lɛ ehere amɛyiwala yɛ egbɛi lɛ hewɔ; koni ehã ale ehewalɛ kpeteŋkple lɛ.

⁹ Eŋa Ŋshɔ Tsuru lɛ yi, ni egbi; ni enyiɛ amɛhiɛ kɛtsɔ̃ bu kwɔŋkwɔŋ lɛ mli, oookɛɛ shiaŋa nɔ.

¹⁰ Kɛkɛ ni ehere amɛyiwala kɛjɛ mɔ ni hetsɛ̃ɔ amɛ lɛ dɛŋ, ni ekpɔ̃ amɛ kɛjɛ henyɛlɔ lɛ dɛŋ.

¹¹ Nu lɛ su amɛhenyɛlɔi lɛ ayi gbidigbidi, eshwɛɛɛ amɛteŋ mɔ kome folo nɛkɛ.

¹² Kɛkɛ ni amɛhe ewiemɔi lɛ amɛye; amɛla amɛ jie eyi.

¹³ Shi yeee be ko, ni amɛhiɛ kpa nii ni etsu ehã amɛ lɛ anɔ, ni amɛmɛɛɛ eŋaawoo dɔŋŋ.

¹⁴ Amɛyadi amɛkɔnɔnii asɛɛ fe nine yɛ ŋa kplanaa lɛ nɔ, ni amɛka Nyɔŋmɔ yɛ shiaŋa lɛ nɔ.

¹⁵ Ehã amɛ amɛnitaomɔnii lɛ, shi ehã lootãa hela ko ni naa wa babote amɛteŋ.

¹⁶ Amɛkɔlɔ Mose kɛ Aaron, Yehowa Mɔ Krɔŋkrɔŋ, lɛ nɔ, yɛ shitoohe lɛŋ,

¹⁷ ni shikpɔŋ gba, ni emi Datan, ni etsimɔ Abiram kɛ eŋa kɛ eshwiei fɛɛ anɔ gbidigbidi.

¹⁸ La je yɛ amɛsafo lɛ mli, ni la lilɛi shã mɛi fɔ̃ji lɛ.

¹⁹ Amɛfee shika tsinabi amãgã hu yɛ Sinai, ni amɛja amãgã ni ashwie lɛ.

²⁰ Amɛŋɔ anunyam lɛ ni sa Nyɔŋmɔ lɛ amɛhã tsina ni kpeɔ jwɛi amãgã lɛ moŋ.

²¹ Amɛhiɛ kpa Nyɔŋmɔ, amɛyiwalaherelɔ lɛ, mɔ ni fee nii wuji yɛ Ijipt lɛ, nɔ.

²² Lɛ Nyɔŋmɔ, mɔ ni efee naakpɛɛnii yɛ Ijipt shikpɔŋ lɛ nɔ, ni efee gbeyei nibii yɛ Ŋshɔ Tsuru lɛŋ lɛ.

²³ Nyɔŋmɔ to akɛ ebaakpãtã amɛhiɛ; shi etsulɔ Mose, mɔ ni eŋɔ lɛ lɛ, damɔ mli ehã amɛ yɛ Nyɔŋmɔ hiɛ, ni ejɔɔ mlifu lɛ he koni ekakpãtã amɛhiɛ.

²⁴ Amɛgbe shikpɔŋ fɛɛfɛo lɛ he guɔ, ejaakɛ amɛheee Nyɔŋmɔ shiwoo lɛ amɛyeee.

²⁵ Amɛwie huhuuhu yɛ amɛbuui amli; ni amɛbooo Yehowa gbee toi.

²⁶ No hewɔ lɛ, ekpãtã amɛhiɛ yɛ ŋa lɛ nɔ.

²⁷ Ni eshɛrɛ amɛshwiei lɛ eshwã majimaji lɛ amli; egbɛ amɛ eshwã shikpɔji lɛ anɔ fɛɛ.

²⁸ Amɛkɛ amɛhe yabɔ jemawɔŋ Baal jalɔi lɛ ahe yɛ Peor; ni amɛye nii ni akɛshã afɔle ahã gbohii.

²⁹ Amɛkɛ amɛnifeemɔnii wo Yehowa mlifu; ni gbele hela bote amɛteŋ.

³⁰ Shi Finehas te shi, ni edamɔ mli ehã amɛ; kɛkɛ ni gbele hela lɛ sɛɛ fo.

³¹ Hewɔ lɛ, abu enɛ jalɛ ahã lɛ kɛjɛ yinɔ kome nɔ kɛtee ekroko nɔ, aahu kɛya shi naanɔ fɛɛ.

³² Amɛwo Yehowa mlifu yɛ Meriba nu lɛ he, ni amɛhewɔ lɛ, Mose na amane.

³³ Amɛwo Mose mli la, ni amɛhã enaa tɛ shi.

³⁴ Amɛkpãtãaa jeŋbii lɛ ahiɛ tamɔ bɔ ni Yehowa fã amɛ lɛ,

³⁵ shi moŋ amɛfutu amɛ ni amɛkase amɛnifeemɔnii lɛ.

³⁶ Yehowa webii lɛ ja maŋsɛɛbii amãgãi lɛ, ni no hã amɛnane tɔ̃tɔ̃.

³⁷ Amɛŋɔ amɛbihii kɛ amɛbiyei lɛ, amɛkɛshãshãa afɔlei amɛhã wɔji.

³⁸ Amɛshwie amɛbihii kɛ amɛbiyei ni efeko efɔŋ ko lɛ alá shi amɛkɛshã afɔle amɛhã Kanaan amãgãi lɛ ni amɛkɛ lá lɛ bule shikpɔŋ lɛ.

³⁹ Amɛkɛ amɛnifeemɔnii lɛ wo amɛhe muji, ni amɛyeee Nyɔŋmɔ anɔkwa.

⁴⁰ No hewɔ lɛ, Yehowa mli fu emaŋ lɛ, ni enyaŋe lɛ diɛŋtsɛ ewebii lɛ.

⁴¹ Etu amɛ ewo jeŋbii adɛŋ, no hewɔ lɛ, amɛhenyɛlɔi lɛ ye amɛnɔ.

⁴² Amɛhenyɛlɔi lɛ wa amɛyi waa, ni amɛhenyɛlɔi lɛ ba amɛ shi amɛwo amɛhewalɛ shishi.

⁴³ Yehowa jie amɛ shii abɔ, shi amɛkɛ amɛkuɛŋtilɛ tse ehiɛ atua; ni aba amɛ shi yɛ amɛhe esha lɛ hewɔ.

⁴⁴ Shi kɛ̃lɛ, be ni enu amɛbolɔmɔ lɛ, enu amɛhaomɔ lɛ he ehã amɛ.

⁴⁵ Ekai ekɛ amɛteŋ kpãŋmɔ lɛ, ni emusuŋ tsɔ̃ lɛ yɛ esuɔmɔ babaoo ni tsakeee lɛ naa.

⁴⁶ Ehã majimaji fɛɛ ni ŋɔ amɛ nom lɛ na amɛ mɔbɔ.

⁴⁷ Oo Yehowa, wɔNyɔŋmɔ, heremɔ wɔyiwala; ni obua wɔnaa kɛjɛ majimaji lɛ anɔ kɛba, koni wɔda bo shi, ni wɔjie ogbɛi krɔŋkrɔŋ lɛ yi.

⁴⁸ Yijiemɔ ahã Yehowa Israel Nyɔŋmɔ lɛ, kɛjɛ naanɔ kɛyashi naanɔ; ni maŋ muu lɛ fɛɛ akɛɛ akɛ, “Amen!” Nyɛjiea Yehowa yi!