Kojolɔi 8 - ŊMALƐ KRƆŊKRƆŊ LƐ

Aye Midianbii anɔ kunim agbe naa

¹ Kɛkɛ ni Efraim hii lɛ bi Gideon akɛ, “Mɛɛba oye wɔ nɛkɛ sane akɛ obakpeee wɔ be ni ofãa ni okɛ Midian ayawu lɛ?” Amɛ kɛ lɛ wie he nyanyaanya.

² Gideon kɛɛ amɛ akɛ, “Mɛni mifee ni ekɛ nɔ ni nyɛfee lɛ ye egbɔ? Fioo po ni nyɛ, Efraim, nyɛfee lɛ, efe nɔ ni mikɛ miweku muu fɛɛ efee lɛ.

³ Nyɔŋmɔ hewalɛ naa lɛ nyɛgbe Midian lumɛi ni ji Oreb kɛ Zeeb. Mɛni minyɛ mifee ni ekɛ nɔ ni nyɛfee lɛ ye egbɔ?” Nɛkɛ ni ekɛɛ pɛ, kɛkɛ ni amɛmlifu lɛ naa ba shi.

⁴ Gideon kɛ hii ohai etɛ̃ ni ekɛnyiɛ lɛ shɛ Yordan Faa lɛ naa, ni amɛfo. Etɔ amɛ moŋ, shi kɛ̃lɛ amɛnyiɛ henyɛlɔi lɛ asɛɛ lolo.

⁵ No hewɔ lɛ, Gideon kɛɛ Sukotbii lɛ akɛ, “Nyɛfai nɛ, nyɛhãa hii ni mikɛnyiɛ nɛɛ aboloo akwaabɔi nyɛhãa mi, ejaakɛ etɔ amɛ, ni minyiɛ Zeba kɛ Zalmuna, Midian maŋtsɛmɛi lɛ, asɛɛ.”

⁶ Shi Sukot onukpai lɛ to he akɛ, “Ani onine eshɛ Zeba kɛ Zalmuna nɔ momo hewɔ ni wɔhã otabilɔi lɛ aboloo lɛ lo?”

⁷ No hewɔ lɛ, Gideon kɛɛ akɛ, “Ojogbaŋŋ! Kɛji Yehowa hã minine shɛ Zeba kɛ Zalmuna nɔ lɛ, no lɛ mikɛ ŋã mli ŋmeii kɛ aklatii baayi nyɛ ni nyɛheloo baafamɔ.”

⁸ Kɛkɛ ni Gideon fã kɛjɛ jɛi kɛtee Penuel. Ekɛ Penuelbii wie tamɔ bɔ ni ekɛ Sukotbii wie lɛ nɔŋŋ. Ni Penuelbii lɛ to he hã lɛ tamɔ bɔ ni Sukotbii lɛ to he lɛ nɔŋŋ.

⁹ No hewɔ lɛ, ekɛɛ Penuelbii lɛ akɛ, “Kɛji miye omanye ni miba lɛ, makumɔ nyɛmɔɔ nɛɛ.”

¹⁰ Shi Zeba kɛ Zalmuna kɛ tabilɔi aaafee hii akpei nyɔŋma kɛ enumɔ yɛ Karkor. Mɛnɛɛmɛi ji mɛi pɛ ni eshwɛ yɛ bokãgbɛbii ata lɛ fɛɛ mli, ejaakɛ tabilɔi akpei oha kɛ nyɔŋmai enyɔ sɔŋŋ enyɔnyɔi.

¹¹ Kɛkɛ ni Gideon tsɔ̃ gbɛ ni gbɛfalɔi aku nyiɛɔ nɔ lɛ nɔ yɛ Noba kɛ Yagbeha bokãgbɛ, ni eyahɛŋ henyɛlɔi lɛ trukaa.

¹² Zeba kɛ Zalmuna jo foi; shi Gideon tiu amɛ. Eyamɔmɔ Midian maŋtsɛmɛi enyɔ nɛɛ ni ji Zeba kɛ Zalmuna lɛ, ni egbɛ amɛta muu lɛ fɛɛ eshwã.

¹³ Kɛkɛ ni Gideon, Yoash bi lɛ, ku esɛɛ kɛjɛ ta lɛ mli. Etsɔ̃ Heres ŋmeŋme lɛ nɔ kɛba.

¹⁴ Emɔ Sukot oblanyo ko, ni ehã eŋmã Sukot nɔyelɔi kɛ emli onukpai lɛ agbɛii ehã lɛ, hii nyɔŋmai kpawo kɛ kpawo.

¹⁵ Gideon banina Sukotbii lɛ, ni ekɛɛ: “Naa, Zeba kɛ Zalmuna nɛ! Amɛhewɔ nyɛye mihe fɛo akɛ, ‘Ani onine eshɛ Zeba kɛ Zalmuna nɔ momo hewɔ ni wɔhãa otabilɔi ni etɔ amɛ lɛ aboloo lɛ lo?’ lɛ.”

¹⁶ Kɛkɛ ni Gideon mɔmɔ Sukot maŋ lɛ mli onukpai lɛ, ni ekɛ ŋã mli ŋmeii kɛ aklatii yi amɛ waa.

¹⁷ Penuel mɔɔ lɛ hu Gideon kumɔ, ni egbe maŋ lɛ mli hii lɛ.

¹⁸ Agbɛnɛ Gideon bi Zeba kɛ Zalmuna akɛ, “Hii ni nyɛgbe yɛ Tabor lɛ, te amɛsubaŋ yɔɔ tɛŋŋ?” Amɛto he akɛ, “Amɛtamɔ bo pɛ; amɛ fɛɛ amɛtamɔ maŋtsɛmɛi abii.”

¹⁹ Gideon kɛɛ: “Minyɛmimɛi ni; minyɛ musuŋbii ji amɛ. Anɔkwale, mina Yehowa akɛ eji nyɛgbeee amɛ kulɛ migbeŋ nyɛ.”

²⁰ Kɛkɛ ni ekɛɛ ekromɔbi Yeter akɛ, “Tee shi ni ogbe amɛ!” Shi oblanyo lɛ gbalaaa eklante lɛ; eeshe gbeyei, ejaakɛ edako.

²¹ Kɛkɛ ni Zeba kɛ Zalmuna kɛɛ, “Bo diɛŋtsɛ tee shi ni ogbe wɔ, ejaakɛ ja nuu ni nyɛɔ nuu nii etsuɔ,” Kɛkɛ ni Gideon te shi ni egbe Zeba kɛ Zalmuna, ni ejie kuɛnii ni afee amɛ nyɔɔŋtsere fãfãi ni yɔɔ amɛyoomai lɛ akuɛ lɛ.

²² Enɛ sɛɛ lɛ, Israelbii lɛ kɛɛ Gideon akɛ, “Ye wɔnɔ, bo kɛ obi kɛ onabi fɛɛ, ejaakɛ ohere wɔ yɛ Midianbii lɛ adɛŋ.”

²³ Shi Gideon kɛɛ amɛ akɛ, “Miyeŋ nyɛnɔ, ni mibi hu yeŋ nyɛnɔ; Yehowa aaaye nyɛnɔ.”

²⁴ Kɛkɛ ni ekɛɛ, “Mibabi nyɛ nɔ ko; no ji akɛ nyɛteŋ mɔ fɛɛ mɔ kɛ shika toiiaŋnii ni eha lɛ ahã mi!” (Ejaakɛ akɛni Ishmaelbii ji Midianbii lɛ hewɔ lɛ, amɛwo shika toiiaŋnii).

²⁵ Israelbii lɛ to he akɛ, “Wɔkɛaahã kɛ miishɛɛ.” Amɛkɛ mama lɛɛ shi, ni amɛteŋ mɔ fɛɛ mɔ shɛrɛ shika toiiaŋnii ni eha lɛ eshwie nɔ.

²⁶ Shika toiiaŋnii lɛ ni Gideon bi lɛ, etsiimɔ ji shika ŋmiiŋmi shekeli akpe kome kɛ ohai kpawo, soro jwinei ni afee amɛ nyɔɔŋtsere fãfãi kɛ toiiaŋnii kɛ afaseo atadei ni Midian maŋtsɛmɛi lɛ wowoo lɛ, kɛ kɔsɔŋkɔsɔi ni yɔɔ amɛyoomai lɛ akuɛi lɛ.

²⁷ Gideon kɛ shika nɛɛ fee efod, ni ekɛto emaŋ ni ji Ofra lɛ mli. Ni Israelbii fɛɛ kwa Nyɔŋmɔ, ni amɛtee jɛi ni amɛyaja efod lɛ. Enɛ tsɔ̃ tsɔne ehã Gideon kɛ ewe lɛ.

²⁸ Bɔ ni fee ni aba Midian shi ahã Israel nɛ. Enɛ sɛɛ lɛ Midianbii wooo amɛhe nɔ dɔŋŋ, ni shikpɔŋ lɛ nɔ jɔ afii nyɔŋmai ejwɛ yɛ Gideon wala be mli.

Gideon gbele

²⁹ Gideon, Yoash bi lɛ, yi mli etee eyahi lɛ diɛŋtsɛ ewe.

³⁰ Eyɛ bihii nyɔŋmai kpawo ni ji lɛ diɛŋtsɛ emusuŋbii, ejaakɛ eŋɔ yei pii.

³¹ Ehemɔ ni yɔɔ Shekem lɛ, lɛ hu ekɛ lɛ fɔ binuu. Ewo gbekɛ lɛ Abimelek.

³² Gideon, Yoash bi lɛ, gbɔ kotokoto dani egbo. Afu lɛ yɛ etsɛ Yoash fuuhe lɛ yɛ Ofra ni ji Abiezerbii akrowa lɛ mli.

³³ Shi be ni Gideon egbo sɛɛ lɛ, Israelbii lɛ ku amɛsɛɛ amɛyasɔmɔ Baal nyɔŋmɔi lɛ, ni amɛkɛ Baal-Berit fee amɛnyɔŋmɔ.

³⁴ Amɛkaiii Yehowa, amɛNyɔŋmɔ lɛ, mɔ ni jie amɛ yɛ amɛhenyɛlɔi fɛɛ adɛŋ yɛ he fɛɛ he lɛ.

³⁵ Asaŋ amɛfeee Yerubaal ni ji Gideon lɛ we lɛ ejurɔ ko tamɔ bɔ ni lɛ lɛ efee Israel lɛ.