Kojolɔi 4 - ŊMALƐ KRƆŊKRƆŊ LƐ

Debora kɛ Barak

¹ Ehud gbele sɛɛ lɛ, Israelbii lɛ fee efɔŋ ekoŋŋ amɛshi Yehowa.

² No hewɔ lɛ, Yehowa hã Yabin, Kanaan maŋtsɛ ni yeɔ maŋtsɛ yɛ Hazor lɛ, ye amɛnɔ kunim. Etatsɛ ji Sisera, ni yɔɔ Jeŋmaji Haroshet lɛ.

³ Israelbii lɛ bolɔ amɛtsɛ Yehowa koni eye ebua amɛ, ejaakɛ Yabin yɛ dade tayaa shwiilii ohai nɛɛhu, ni ewa Israelbii lɛ ayi waa naakpa afii nyɔŋmai enyɔ sɔŋŋ.

⁴ Nɛkɛ be nɛɛ mli lɛ, gbalɔ yoo Debora, Lapidot ŋã lɛ, ji Israelbii lɛ akojolɔ.

⁵ He ni etaa ji tɛŋtso ko ni atsɛɔ lɛ Debora tɛŋtso lɛ shishi yɛ Rama kɛ Betel teŋ, yɛ Efraim gɔji lɛ anɔ. Israelbii lɛ yaa eŋɔɔ yɛ jɛi ni eyeɔ amɛteŋ saji ehãa amɛ.

⁶ Debora tsu ayakpee Barak, Abinoam bi lɛ, kɛjɛ Kadesh ni yɔɔ Naftali lɛ kɛba, ni ekɛɛ lɛ akɛ, “Fãmɔ ni Yehowa, Israel Nyɔŋmɔ lɛ, fãa bo nɛ: ‘Yaaŋɔ hii akpei nyɔŋma kɛjɛ Naftalibii kɛ Zebulonbii lɛ ateŋ ni ofã ta kɛya Tabor gɔŋ lɛ nɔ.

⁷ Makpala Sisera, Yabin tatsɛ lɛ, kɛ eshwiilii kɛ etabilɔi babaoo lɛ kɛba oŋɔɔ yɛ Keshon Faa lɛ naa, ni mibahã oye enɔ kunim.’ ”

⁸ Barak kɛɛ Debora akɛ, “Kɛji okɛ mi aaatee lɛ, no lɛ matee; shi kɛji okɛ mi eyaaa lɛ, no lɛ miyaaa.”

⁹ Debora kɛɛ lɛ akɛ, “Mikɛ bo aaatee, kɛ̃lɛ nɔ ni oyaa oyatsu nɛɛ mli anunyam lɛ efeŋ onɔ; ejaakɛ yoo ko ji mɔ ni Yehowa baahã eye Sisera nɔ kunim.” Kɛkɛ ni Debora te shi ni ekɛ Barak tee Kadesh.

¹⁰ Barak hã ayakpee Zebulonbii kɛ Naftalibii kɛba Kadesh; ni hii akpei nyɔŋma kɛ lɛ ka nane kɛtee. Debora hu kɛlɛ tee.

¹¹ Shi Heber, Kennyo lɛ, etse ehe yɛ Kenbii ni ji Mose shaanuu Hobab shwiei lɛ ahe, ni eyashi ebuu lɛ yɛ tso kpele ni ma Zaananim ni yɔɔ Kadesh masɛi lɛ he tɔ̃ɔ.

¹² Be ni ayatswa Sisera adafi akɛ Barak, Abinoam bi lɛ, efã ta kɛtee Tabor gɔŋ lɛ nɔ lɛ,

¹³ Sisera bua edade tayaa shwiilii ohai nɛɛhu lɛ fɛɛ, kɛ etabilɔi lɛ fɛɛ anaa kɛjɛ jeŋbii amaŋ Haroshet kɛba Kishon Faa lɛ naa.

¹⁴ Kɛkɛ ni Debora kɛɛ Barak akɛ, “Tee shi, ejaakɛ ŋmɛnɛ gbi nɛɛ ji gbi ni Yehowa baahã oye Sisera nɔ kunim. Ani jeee Yehowa efã kɛnyiɛ ohiɛ nɛɛ?” No hewɔ lɛ, Barak kpeleke shi kɛjɛ Tabor gɔŋ lɛ nɔ. Hii akpei nyɔŋma lɛ nyiɛ esɛɛ.

¹⁵ Yehowa hã Sisera kɛ eta lɛ gbɛ shwã yɛ Barak klante naa. Kɛkɛ ni Sisera yi shi yɛ eshwiili lɛ mli, ni ejo foi yɛ enane naa.

¹⁶ Barak kɛ emɛi lɛ tiu shwiilii lɛ kɛ tabilɔi lɛ kɛtee Jeŋbii amaŋ Haroshet lɛ, ni Sisera tabilɔi lɛ fɛɛ nyɔnyɔɔ yɛ klante naa; eshwɛɛɛ mɔ kome nɛkɛ folo.

¹⁷ Shi Sisera jo foi yɛ enane naa kɛtee Yael, Kennyo Heber ŋã lɛ buu lɛ mli; ejaakɛ toiŋjɔlɛ yɛ Yabin, Hazor maŋtsɛ lɛ, kɛ Heber, Kennyo lɛ, we lɛ teŋ.

¹⁸ Yael je kpo ekɛ Sisera yakpe ni ekɛɛ Sisera akɛ, “Minuŋtsɔ, gba kɛba miŋɔɔ; kaashe gbeyei!” No hewɔ lɛ, Sisera gba kɛtee Heber ŋã lɛ ŋɔɔ yɛ buu lɛ mli, ni Yael kɛ saanɔ bo ha Sisera nɔ.

¹⁹ Sisera kɛɛ Yael akɛ, “Ofainɛ ni ohã mi nu fioo manu, shi kumai miiye mi.” No hewɔ lɛ, Heber ŋã lɛ gbele fufɔ wolotɔ naa, ni ehã lɛ eko enu. Kɛkɛ ni eha Sisera nɔ.

²⁰ Sisera kɛɛ yoo lɛ akɛ, “Daamɔ buu lɛ shinaa lɛ shi. Kɛ mɔ ko ba ni ebi bo akɛ, ‘Ani mɔ ko yɛ biɛ lo? lɛ, okɛɛ mɔ lɛ akɛ, Dabi!’ ”

²¹ Shi Yael, Heber ŋã lɛ, kɔ buu he shiŋmlitso, ni ekɔ hamle ehiɛ edɛŋ. Edɛke shi kɛtee Sisera ŋɔɔ, ni ekɛ shiŋmlitso lɛ yaka etoi shi kɛyamɔ shikpɔŋ, ejaakɛ etɔ Sisera ni ewɔ vii. No hewɔ lɛ, Sisera gbo.

²² Be ni Barak tiuɔ Sisera lɛ, Yael je kpo ekɛ Barak yakpe ni ekɛɛ Barak akɛ, “Ba, ni mikɛ nuu lɛ ni otaoɔ lɛ atsɔ̃ɔ bo.” Be ni Barak tee Yael buu lɛ mli lɛ, naa Sisera ni ekã shi ni egbo, ni shiŋmlitso lɛ tsɛkɛ etoi shi.

²³ No hewɔ lɛ, nakai gbi lɛ Nyɔŋmɔ hã Israelbii lɛ ye Kanaan maŋtsɛ Yabin nɔ kunim.

²⁴ Israelbii lɛ hãaa Yabin, Kanaan maŋtsɛ lɛ, ana mumɔ he kɛ ta kɛyashi beyinɔ ni amɛkpãtã ehiɛ.