Kojolɔi 21 - ŊMALƐ KRƆŊKRƆŊ LƐ

Ŋamɛi ni Benyamin akutso lɛ na

¹ Agbɛnɛ Israel hii lɛ ekãmɔ kitãi yɛ Mizpa akɛ, “Wɔteŋ mɔ ko mɔ ko kɛ ebiyoo akahã Benyaminnyo gbãlã.”

² No hewɔ lɛ, maŋ lɛ yiŋ kɛtee Betel. Amɛhi shi yɛ jɛi yɛ Nyɔŋmɔ hiɛ kɛyashi gbɛkɛ. Amɛfo waa kɛ dɔlɛ

³ amɛkɛɛ: “Ao Yehowa, Israel Nyɔŋmɔ, mɛɛba enɛ ba yɛ Israel akɛ ŋmɛnɛ akutso kome elaaje yɛ Israel?”

⁴ Enɔ jetsɛremɔ lɛ, maŋ lɛ te shi maŋkɛ mra, ni amɛma afɔleshãa latɛ yɛ jɛi. Amɛshã shãa afɔlei kɛ hejɔlɛ afɔlei.

⁵ Israelbii lɛ bi akɛ, “Israel akutsei lɛ ateŋ lɛ, te akutso ni fataaa Israel maŋ muu lɛ fɛɛ he kɛbaaa Yehowa ŋɔɔ lɛ? Ejaakɛ amɛkã kitã wulu akɛ mɔ ni baaa Yehowa ŋɔɔ yɛ Mizpa lɛ, ‘Gbe agbe lɛ.’ ”

⁶ Benyaminhii lɛ anii fee amɛnyɛmimɛi Israelbii lɛ mɔbɔ, ni amɛkɛɛ, “Ŋmɛnɛ gbi nɛɛ atse akutso kome yɛ Israel he ashɛ afɔ̃.

⁷ Te wɔɔfee tɛŋŋ hu ni wɔna ŋamɛi wɔhã mɛi ni eshwɛ lɛ, akɛni wɔkã Yehowa kitã akɛ wɔkɛ wɔbiyei haŋ Benyaminbii gbãlã nɛɛ?”

⁸ Kɛkɛ ni Israelbii lɛ kɛɛ, “Te Israel akutsei lɛ ateŋ mɔ ni lɛ lɛ ebɛ mli ni atee Yehowa ŋɔɔ yɛ Mizpa lɛ?” Ana akɛ mɔ ko mɔ ko jɛɛɛ Yabesh ni yɔɔ Gilead lɛ baaa nsra lɛ mli kɛ kpee wulu lɛ.

⁹ Ejaakɛ be ni akane maŋ lɛ, ana akɛ Yabesh-Gileadbii lɛ ateŋ mɔ kome nɛkɛ folo bɛ jɛi.

¹⁰ No hewɔ lɛ, kpee lɛ tsu hii ni feɔ ekãa fe fɛɛ lɛ ateŋ mɛi akpei nyɔŋma kɛ enyɔ, ni amɛfã amɛ akɛ, “Nyɛyaa ni nyɛyagbea Yabesh-Gileadbii lɛ kɛ klante, yei kɛ hii fɛɛ hu.

¹¹ Bɔ ni nyɛfee nɛ: Hii fɛɛ kɛ yoo fɛɛ yoo ni le nuu lɛ, nyɛkpãtãa amɛhiɛ butubutu.”

¹² Mɛi ni atsu lɛ yana oblayei froi ohai ejwɛ yɛ Yabesh-Gileadbii lɛ ateŋ ni leko nuu, ni amɛkɛ oblayei nɛɛ ba nsra lɛ mli yɛ Shilo ni yɔɔ Kanaan shikpɔŋ lɛ nɔ lɛ.

¹³ Kɛkɛ ni kpee muu lɛ fɛɛ tsu akɛ wiemɔ yahã Benyaminbii ni yɔɔ Rimon tɛsaa lɛ he lɛ akɛ akɛ amɛ ekpãtã.

¹⁴ Amɛku amɛsɛɛ amɛba nakai be lɛ mli, ni akɛ yei ni ahere amɛyiwala yɛ Yabesh-Gilead yei lɛ ateŋ lɛ hã amɛ gbãlã; shi no tete lɛ eshɛɛɛ amɛ.

¹⁵ Benyaminbii lɛ anii fee maŋ lɛ mɔbɔ, ejaakɛ Yehowa ehã mligbalamɔ eba Israel akutsei lɛ ateŋ.

¹⁶ No hewɔ lɛ, kpee lɛ mli onukpai lɛ kɛɛ, “Te wɔɔfee tɛŋŋ wɔna ŋamɛi wɔhã mɛi ni eshwɛ lɛ, akɛni akpãtã Benyamin yei lɛ ahiɛ nɛɛ?”

¹⁷ Amɛkɛɛ, “Esa akɛ gbɛfaŋ nɔ ko ahi shi ahã Benyaminbii lɛ ateŋ mɛi ni yi na wala lɛ, bɔ ni afee ni akutso ko seshi akabule yɛ Israel.

¹⁸ Shi wɔ lɛ, wɔnyɛŋ wɔkɛ wɔbiyei lɛ ahã amɛ gbãlã, ejaakɛ Israelbii ekã kitã akɛ, ‘Alomɔ mɔ ni aaaŋɔ yoo ko ahã gbãlã yɛ Benyamin.’ ”

¹⁹ No hewɔ lɛ, amɛkɛɛ: “Daa afi lɛ ayeɔ Yehowa gbijurɔ yɛ Shilo. Shilo kã Betel kooyigbɛ kɛ Lebona wuoyigbɛ yɛ gbɛjegbɛ ni kã kɛjɛ Betel kɛyaa Shekem lɛ bokãgbɛ.”

²⁰ Kɛkɛ ni amɛfã Benyaminbii lɛ akɛ, “Nyɛyaa ni nyɛyatea yɛ waintromi lɛ amli.

²¹ Kɛji Shilo oblayei lɛ je kpo ba amɛbajo lɛ, kɛkɛ lɛ nyɛfãa kpo kɛjɛa waintromi lɛ amli kɛbaa koni nyɛteŋ mɔ fɛɛ mɔ abamɔ eŋã yɛ Shilo oblayei lɛ ateŋ, koni nyɛkɛ amɛ aya Benyamin shikpɔŋ lɛ nɔ.

²² Ni kɛji amɛtsɛmɛi loo amɛnyɛmimɛi ba nyɛŋɔɔ amɛkɛ nyɛ babe lɛ, nyɛkɛa amɛ akɛ, ‘Nyɛkwɛa wɔhewɔ kɛkɛ ni nyɛkɛ amɛ ahãa wɔ; ejaakɛ jeee ta mli wɔshɔ̃ amɛ yɛ, yɛ nyɛdɛŋ koni wɔkɛ amɛ afee wɔŋamɛi; ni asaŋ jeee nyɛ nyɛkɛ amɛ hã wɔ ni eeeba lɛ akɛ nyɛaatere wɔyi sɔ̃ ko.’ ”

²³ Benyaminbii lɛ fee nakai. Amɛmɔmɔ ŋamɛi yɛ amɛyikulɛ naa yɛ mɛi ni bajo lɛ ateŋ, ni amɛŋɔ amɛ kɛtee. Kɛkɛ ni amɛku amɛsɛɛ kɛtee amɛshikpɔŋ nɔ. Amɛsaa maji lɛ amɛmamɔ, ni amɛhi mli.

²⁴ Nakai be lɛ mli nɔŋŋ lɛ, Israelbii lɛ hu shi jɛi. Mɔ fɛɛ mɔ ku esɛɛ kɛtee ekutso kɛ eweku mli, ni amɛteŋ mɔ fɛɛ mɔ tee lɛ diɛŋtsɛ eshikpɔŋ nɔ.

²⁵ Nakai be lɛ mli lɛ, maŋtsɛ ko bɛ Israel; mɔ fɛɛ mɔ feɔ nɔ ni ja yɛ lɛ diɛŋtsɛ ehiɛ.