Kojolɔi 2 - ŊMALƐ KRƆŊKRƆŊ LƐ

Yehowa bɔfo yɛ Bokim

¹ Agbɛnɛ Yehowa bɔfo jɛ Gilgal kɛba Bokim ni ebakɛɛ Israelbii lɛ akɛ, “Mijie nyɛ kɛjɛ Ijipt ni mikɛ nyɛ ba shikpɔŋ ni mikã nyɛtsɛmɛi lɛ akitã yɛ he lɛ nɔ, ni mikɛɛ: ‘Mikuŋ mikpãŋmɔ ni mi kɛ nyɛ ekpãŋ lɛ mli gbi ko gbi ko,

² ni nyɛ hu nyɛ kɛ shikpɔŋ nɛɛ nɔ bii lɛ akakpãŋa kpãŋmɔ ko; amɛfɔleshãa latɛi lɛ nyɛkumɔa.’ Shi nyɛbooo mifãmɔ lɛ toi. Mɛni nyɛfee nɛɛ?

³ No hewɔ lɛ, agbɛnɛ mi hu nɔ ni mikɛɔ ji mishwieŋ amɛ yɛ nyɛhiɛ, shi moŋ amɛaatsɔ̃mɔ nyɛhenyɛlɔi, ni amɛnyɔŋmɔi lɛ aaatsɔ̃ nyɛ tsɔne.”

⁴ Be ni Yehowa bɔfo lɛ wie nɛkɛ wiemɔi nɛɛ yɛ Israelbii lɛ fɛɛ atoiŋ lɛ, maŋ lɛ wo yara amɛfo.

⁵ Amɛwo jɛi gbɛi akɛ Bokim, ni amɛshã shãa afɔlei amɛhã Yehowa yɛ jɛi.

Yoshua gbele

⁶ Agbɛnɛ be ni Yoshua wo maŋ lɛ gbɛ lɛ, Israelbii lɛ tee shikpɔŋ lɛ nɔ koni amɛteŋ mɔ fɛɛ mɔ ayaŋɔ egbɛfaŋnɔ.

⁷ Maŋ lɛ sɔmɔ Yehowa gbii abɔ fɛɛ ni Yoshua yɔɔ lɛ, kɛ gbii abɔ fɛɛ ni onukpai ni hi shi yɛ Yoshua gbele sɛɛ ni amɛna Yehowa nitsumɔi wuji fɛɛ ni etsu ehã Israel lɛ yɔɔ lɛ.

⁸ Yehowa tsulɔ Yoshua, Nun bi lɛ, gbo be ni eye afii oha kɛ nyɔŋma.

⁹ Afu lɛ yɛ lɛ diɛŋtsɛ eshikpɔŋ lɛ nɔ yɛ Timnat-Heres yɛ Efraim gɔji lɛ anɔ yɛ Gaash gɔŋ lɛ kooyigbɛ.

¹⁰ Nakai yinɔbii lɛ hu fɛɛ gboi, ni yinɔ kroko ba yɛ amɛsɛɛ ni amɛleee Yehowa aloo nitsumɔi ni etsu ehã Israel lɛ.

Israel fɔ̃ɔ Yehowa jamɔ

¹¹ Kɛkɛ ni Israelbii lɛ fee efɔŋ yɛ Yehowa hiɛ, ni amɛyasɔmɔ Baal nyɔŋmɔi lɛ.

¹² Amɛkwa Yehowa, amɛtsɛmɛi lɛ aNyɔŋmɔ lɛ, mɔ ni jie amɛ kɛjɛ Ijipt shikpɔŋ lɛ nɔ lɛ, ni amɛyanyiɛ nyɔŋmɔi krokomɛi ni ji amɛhewɔhewɔ maji lɛ anyɔŋmɔi lɛ asɛɛ. Ni amɛwo Yehowa mli la.

¹³ Ni amɛfɔ̃ɔ Yehowa jamɔ, ni amɛyasɔmɔ Baal nyɔŋmɔi lɛ kɛ Astarte nyɔŋmɔi lɛ.

¹⁴ No hewɔ lɛ, Yehowa mli wo Israelbii lɛ la ni ehã ofɔ̃yelɔi baye amɛ ofɔ̃. Asaŋ ekɛ Israelbii lɛ wo amɛhenyɛlɔi ni bɔle amɛ kɛkpe lɛ ahewalɛ shishi, ni amɛnyɛɛɛ amɛhenyɛlɔi lɛ ahiɛ amɛdamɔ dɔŋŋ.

¹⁵ He fɛɛ he ni Israelbii lɛ aaafã ta kɛaatee lɛ, Yehowa kɛ amɛ yeɔ kɛ joomɔ tamɔ bɔ ni ebɔ amɛ kɔkɔ kɛ bɔ ni ekã amɛ kitã lɛ. Enɛ hã efi Israelbii lɛ waa naakpa.

¹⁶ Kɛkɛ ni Yehowa tee ta hiɛnyiɛlɔi ashi. Amɛ amɛhereɔ Israelbii lɛ yɛ mɛi ni bahaa amɛnibii kɛyaa lɛ adɛŋ.

¹⁷ Shi amɛhiɛnyiɛlɔi lɛ hu amɛbooo amɛ toi, ejaakɛ amɛjeɔ Yehowa sɛɛ amɛyanyiɛɔ nyɔŋmɔi krokomɛi asɛɛ ni amɛjaa amɛ. Etsɛɛɛ kɛkɛ lɛ amɛŋmɛɛ shihilɛ ni amɛtsɛmɛi lɛ hi ni amɛye Yehowa kitãi lɛ anɔ lɛ he; amɛ lɛ amɛyeee kitãi lɛ anɔ.

¹⁸ Be fɛɛ be ni Yehowa aaatee hiɛnyiɛlɔi ashi ehã Israelbii lɛ, Yehowa yeɔ ebuaa hiɛnyiɛlɔi lɛ ni amɛhereɔ Israelbii lɛ yɛ amɛhenyɛlɔi lɛ adɛŋ gbii abɔ fɛɛ ni hiɛnyiɛlɔ lɛ yɔɔ lɛ; ejaakɛ ŋtsɔi ni Israelbii lɛ dɔmɔɔ yɛ mɛi ni waa amɛ yi kɛ mɛi ni haoɔ amɛ lɛ hewɔ lɛ dɔɔ Yehowa.

¹⁹ Shi kɛ hiɛnyiɛlɔ lɛ gbo pɛ, amɛkuɔ amɛsɛɛ ekoŋŋ, ni amɛjeŋba fiteɔ fe amɛtsɛmɛi lɛ tete yɛ nyɔŋmɔi krokomɛi asɛɛ ni amɛyanyiɛɔ ni amɛsɔmɔɔ amɛ, ni amɛjaa amɛ lɛ hewɔ. Amɛfɔ̃ɔɔ nibii ni amɛfeɔ lɛ, ni amɛkpaaa amɛkuɛŋtimɔ jeŋba lɛ.

²⁰ No hewɔ lɛ, Yehowa mli woɔ la woɔ Israelbii lɛ, ni ekɛɔ akɛ, “Akɛni nɛkɛ maŋ nɛɛ etɔ̃ mikpãŋmɔ lɛ ni miwo amɛtsɛmɛi lɛ akitã yɛ he lɛ nɔ, ni amɛbooo mi toi

²¹ hewɔ lɛ mi hu kɛjɛ ŋmɛnɛ kɛyaa nɛɛ mishwieŋ jeŋmaji ni shwɛ be ni Yoshua gbo lɛ eko eko yɛ amɛhiɛ dɔŋŋ.

²² Mikɛ maji nɛɛ baaka Israel makwɛ akɛ amɛaajwɛŋ bɔ ni Yehowa taoɔ akɛ amɛhi shi lɛ nɔ, tamɔ bɔ ni amɛtsɛmɛi lɛ jwɛŋ nɔ lɛ lo, aloo amɛ lɛ amɛfeŋ nakai.”

²³ No hewɔ ni Yehowa shi nakai jeŋmaji lɛ, ni eshwieee amɛ amrɔ nɔŋŋ, ni ehãaa Yoshua aye amɛnɔ kunim lɛ.