Kojolɔi 19 - ŊMALƐ KRƆŊKRƆŊ LƐ

Levinyo ko kɛ ehemɔ

¹ Nakai bei lɛ amli be ni maŋtsɛ bɛ Israel lɛ, Levinyo ko yato gbɔ yɛ Efraim gɔji lɛ anɔ he ko shɔŋŋ. Ekɛ yoo ko ni jɛ Betlehem yɛ Yuda lɛ fee hemɔ.

² Shi yoo lɛ mlifu nuu lɛ ni eshi nuu lɛ etee etsɛ we yɛ Betlehem Yuda, ni eyaye nyɔji ejwɛ yɛ jɛi.

³ Kɛkɛ ni ewu lɛ yiŋ etee koni eyatiu esɛɛ ni ekɛ lɛ awie yɛ tsuijurɔ naa koni ekpala lɛ kɛba ekoŋŋ. Nuu lɛ kɛ etsulɔ kɛ tejii enyɔ tee. Be ni Levinyo lɛ yashɛ yoo lɛ tsɛ lɛ we lɛ ni eshaanuu lɛ na lɛ lɛ, ehere lɛ kɛ miishɛɛ.

⁴ Shaanuu lɛ tsĩ Levinyo lɛ naa, ni Levinyo lɛ kɛ shaanuu lɛ hi shi gbii etɛ̃. No hewɔ lɛ, nuu lɛ kɛ yoo lɛ ye nii, ni amɛnu nɔ ko ni amɛhi shi yɛ jɛi.

⁵ Gbi ni ji ejwɛ lɛ nɔ lɛ, amɛte shi leebi maŋkpa, ni Levinyo lɛ miitao eyi mli, kɛkɛ ni eshaanuu lɛ kɛɛ lɛ akɛ, “Okɛ aboloo atrɔma kome ko asa onaa koni no sɛɛ dani nyɛyi mli.”

⁶ No hewɔ lɛ, hii enyɔ lɛ ho amɛtara shi, ni amɛye nii, ni amɛnu nɔ ko. Kɛkɛ ni yoo lɛ tsɛ lɛ kɛɛ eshaanuu lɛ akɛ, “Kpɛlɛ̃mɔ ni owɔ biɛ ŋmɛnɛ hu ni omii ashɛ ohe!”

⁷ Be ni nuu lɛ te shi ni ebaayi mli lɛ, eshaanuu lɛ tsĩ enaa, ni ewɔ jɛi ekoŋŋ.

⁸ Gbi ni ji enumɔ lɛ nɔ lɛ, nuu lɛ te shi leebi maŋkpa ni ebaaya, kɛkɛ ni yoo lɛ tsɛ lɛ kɛɛ akɛ, “Wo onaa nɔ ko dã. Hii shi kɛyashi gbɛkɛnaashi.” No hewɔ lɛ, shaahiimɛi enyɔ lɛ fɛɛ ye nii.

⁹ Be ni nuu lɛ kɛ ehemɔ lɛ kɛ etsulɔ lɛ te shi ni amɛbaayi mli lɛ, eshaanuu lɛ ni ji yoo lɛ tsɛ lɛ kɛɛ lɛ akɛ, “Amrɔ nɛɛ, je ena etã, nyɛwɔa; duŋ baawo nɔŋŋ. Wɔ biɛ ni omii ashɛ ohe, koni nyɛte shi maŋkɛ mra ni nyɛyi mli, ni oya omaŋ.”

¹⁰ Shi nuu lɛ ekpɛlɛ̃ɛɛ ni ewɔ jɛi nakai gbi lɛ; no hewɔ lɛ, ete shi ni eyi mli. Ebɛŋkɛ Yebus ni ji Yerusalɛm ŋlɛnɔ. Ekɛ ehemɔ lɛ nyiɛ kɛ tejii enyɔ ni awo amɛnɔ nii.

¹¹ Be ni amɛbɛŋkɛɔ Yebus lɛ, je ena etã. No hewɔ lɛ, tsulɔ lɛ kɛɛ enuŋtsɔ lɛ akɛ, “Hã ni wɔgba kɛya Yebusbii amaŋ nɛɛ mli ni wɔyawɔ jɛi.”

^12-13 Shi enuŋtsɔ lɛ kɛɛ lɛ akɛ, “Wɔgbaŋ kɛyaŋ mɛi kpɔji amaŋ ko mli, maŋ ni jeee Israelbii amaŋ. Shi moŋ wɔbaafoŋ kɛya Gibea.” Ekɛɛ etsulɔ lɛ akɛ, “Wɔtsi wɔshɛ wɔhiɛgbɛ he ko ni wɔyawɔ Gibea loo Rama.”

¹⁴ No hewɔ lɛ, amɛfoŋ kɛtee amɛhiɛ. Be ni amɛbɛŋkɛ Gibea ni ji Benyaminbii amaŋ lɛ lɛ, hulu nyɔ shi wo amɛ.

¹⁵ No hewɔ lɛ, amɛgba Gibea koni amɛyawɔ jɛi. Be ni amɛshɛ maŋ lɛ mli lɛ, Levinyo lɛ ho eta maŋ lɛ blohuŋ, ejaakɛ mɔ ko mɔ ko eŋɔɔɔ amɛ kɛyaaa eshĩa koni amɛyawɔ jɛi.

¹⁶ Kɛkɛ lɛ naa nuumo ko ni eyatsu nii yɛ eŋmɔ mli ni eku esɛɛ eeba gbɛkɛnaashi mli. Efraim gɔji lɛ anɔ nyo ji lɛ, ni ebato gbɔ yɛ Gibea maŋ lɛ mli. Gibeabii lɛ Benyaminbii ni.

¹⁷ Be ni nuumo lɛ yaawo ehiɛ nɔ lɛ, ena nuu gbɛnyiɛlɔ lɛ yɛ blohu lɛ mli. Nuumo lɛ bi nuu lɛ akɛ, “Nɛgbɛ oyaa, ni nɛgbɛ ojɛ?”

¹⁸ Levinyo lɛ to he akɛ, “Wɔjɛ Betlehem ni yɔɔ Yuda lɛ; wɔmiifo mli kɛya Efraim gɔji lɛ asɛɛgbɛ shɔŋŋ. Efraimnyo ji mi. Mitee Betlehem yɛ Yuda, shi mimaŋ miyaa nɛɛ; ni mɔ ko eŋɔɔɔ mi kɛyaaa eshĩa.

¹⁹ Shi wɔyɛ jwɛi kɛ niyenii hã wɔtejii lɛ, ni aboloo hu yɛ hã mi kɛ oblayoo lɛ kɛ oblanyo lɛ ni fata wɔhe lɛ; nɔ ko nɔ ko he ehĩaaa wɔ.”

²⁰ Nuumo lɛ kɛɛ akɛ, “Oba kɛ omanye. Nɔ fɛɛ nɔ ni he aaahia bo lɛ, mahã bo; blohu lɛ mli kɛkɛ ni okawɔ.”

²¹ No hewɔ lɛ, nuumo lɛ ŋɔ lɛ kɛtee eshĩa. Ehã tejii lɛ anii. Gbɔi lɛ fɔfɔɔ amɛnaji ahe; ni amɛye nii, ni amɛnu nɔ ko.

²² Shi be ni amɛmii eshɛ amɛhe lɛ, maŋ lɛ mli bii komɛi ni ji hii yakagbɔmɛi babɔle shĩa lɛ kɛkpe. Amɛshimɔ shinaa lɛ, ni amɛkɛɛ shĩatsɛ ni ji nuumo lɛ akɛ, “Okɛ nuu lɛ ni bato oshĩa lɛ aje kpo kɛba ni wɔkɛ lɛ awɔ.”

²³ Shi nuumo lɛ ni ji shĩatsɛ lɛ je kpo kɛba amɛŋɔɔ ni ekɛɛ amɛ akɛ, “Dabida, minyɛmimɛi! Nyɛkafea efɔŋ ni tamɔ enɛ; akɛni nuu nɛɛ ebato mishĩa nɛɛ hewɔ lɛ nyɛkafea nɛkɛ hiɛgbejianii nɛɛ.

²⁴ Naa, mibi oblayoo foro kɛ nuu lɛ hu hemɔ. Mikɛ amɛ moŋ baaje kpo kɛba ni nyɛfite amɛ ni nyɛfee amɛ nɔ fɛɛ nɔ ni nyɛsumɔɔ; shi nuu nɛɛ lɛ, nyɛkafea lɛ nɛkɛ hiɛgbejianii nɛɛ.”

²⁵ Shi hii lɛ booo lɛ toi. No hewɔ lɛ, Levinyo lɛ ŋɔ ehemɔ lɛ, ni ekɛ lɛ je kpo kɛba amɛŋɔɔ yɛ blohu lɛ mli. Amɛnyɛ yoo lɛ nɔ ni amɛkɛ lɛ wɔ, ni amɛfee lɛ niseniianii nyɔɔŋnyɔɔŋ fɛɛ ni be ni je bɔi tsɛremɔ lɛ, amɛŋmɛ̃ɛ ehe.

²⁶ Hiɛfutɛfutɛ mli lɛ, yoo lɛ ba ni ebaho ebu shi yɛ nuumo lɛ shĩa lɛ he ni ewu lɛ yɔɔ lɛ shinaa lɛ shi kɛyashi be ni hiɛ gbele.

²⁷ Be ni ewu lɛ te shi leebi ni egbele shĩa lɛ shinaa lɛ ni ebaaje kpo eya lɛ, naa yoo lɛ ni ji ehemɔ lɛ bu shi yɛ shĩa lɛ shinaa lɛ shi, ni eniji jwere kpoku lɛ nɔ.

²⁸ Ewu lɛ kɛɛ lɛ akɛ, “Tee shi ni wɔtee” shi fɛɛ lɛ kranaa. Kɛkɛ ni ewu lɛ wo egbonyo lɛ eŋmɛ eteji lɛ nɔ, ni ekɛshwie nɔ kɛtee emaŋ.

²⁹ Be ni eshɛ ewe lɛ, ekɔ kakla, ni emɔ ehemɔ lɛ mli, ni efolɔ emli yɛ etalɔi lɛ anɔ kukuji nyɔŋma kɛ enyɔ. Ehã akɛtee akutsei nyɔŋma kɛ enyɔ lɛ fɛɛ amli akɛyatsɔ̃ɔ amɛ.

³⁰ Mɛi fɛɛ ni na lɛ kɛɛ akɛ, “Afeko nɛkɛ nɔ ko dã ni asaŋ anako nɛkɛ nɔ ko dã kɛjɛ gbi ni Israelbii jɛ Ijipt shikpɔŋ lɛ nɔ ba aahu kɛbashi ŋmɛnɛ gbi nɛɛ. Nyɛsusua he, nyɛwoa he ŋaa, nyɛwiea he.”