Kojolɔi 18 - ŊMALƐ KRƆŊKRƆŊ LƐ

Mika kɛ Dan akutso lɛ

¹ Nakai be lɛ mli lɛ, maŋtsɛ bɛ Israel. Nakai be lɛ mli hu lɛ Dan akutso lɛ miitao amɛgbɛfaŋ shikpɔŋ ko amɛhã amɛhe koni amɛyahi nɔ; ejaakɛ kɛbashi nakai be lɛ mli lɛ amɛnako amɛgbɛfaŋnɔ yɛ Israel akutsei lɛ ateŋ.

² No hewɔ lɛ, Danbii lɛ tsu hii kãkãlɔi enumɔ kɛjɛ amɛweku lɛ fɛɛ mli kɛjɛ Zora kɛ Eshtaol, koni amɛyasara shikpɔŋ lɛ ni amɛkpa lɛ shi. Amɛkɛɛ mɛi ni atsu lɛ akɛ, “Nyɛyaa ni nyɛyakpaa shikpɔŋ lɛ fɛɛ shi.” Amɛba Mika shĩa lɛ yɛ Efraim gɔji ashikpɔŋ lɛ nɔ, ni amɛbawɔ jɛi.

³ Be ni amɛbɛŋkɛ Mika shĩa lɛ, oblanyo lɛ wiemɔ hã amɛyoo akɛ Levinyo ji lɛ. Amɛgba kɛtee shĩa lɛ, ni amɛbi lɛ akɛ, “Namɔ kɛ bo ba biɛ? Mɛni ofeɔ yɛ biɛ? Mɛni otsuɔ yɛ biɛ?”

⁴ Oblanyo lɛ to he akɛ, “Mika kɛ mi eye efua, ni ebɔ mi apaa koni maye osɔfo mahã lɛ.”

⁵ Amɛkɛɛ lɛ akɛ, “Ofainɛ, ni obi Nyɔŋmɔ ohã wɔ bɔ ni afee ni wɔle akɛ wɔgbɛ ni wɔnyiɛ nɛɛ aaafee omanye lo?”

⁶ Osɔfo lɛ to he hã amɛ akɛ, “Nyɛyaa kɛ omanye. Yehowa hiŋmɛi kã nyɛhe yɛ gbɛ ni nyɛnyiɛ nɛɛ mli!”

⁷ Kɛkɛ ni mɛi enumɔ lɛ kɛshwie nɔ kɛtee Laish. Amɛna jɛibii lɛ bɔ ni amɛyɔɔ shweshweeshwe amɛhã, tamɔ Sidonbii lɛ, kɛ bɔ ni amɛyɔɔ kpoo ni amɛyiŋ efeee amɛ kɔshikɔshi yɛ mɔ ko he lɛ. Nɔ ko bɛ shikpɔŋ nɔ ni he hiaa amɛ; niiatsɛmɛi ji amɛ. Amɛkɛ Sidonbii lɛ ateŋ jɛkɛ, ni amɛkɛ mɔ ko mɔ ko bɛ sharamɔ.

⁸ Be ni mɛi enumɔ lɛ ku amɛsɛɛ kɛba amɛnyɛmimɛi lɛ aŋɔɔ yɛ Zora kɛ Eshtaol lɛ, amɛnyɛmimɛi lɛ bi amɛ akɛ, “Te nyɛyana tɛŋŋ?”

⁹ Mɛi ni atsu lɛ kɛɛ, “Nyɛtea shi ni wɔyaa wɔyatua amɛ, ejaakɛ wɔyana shikpɔŋ lɛ, ni ehi naakpa. Mɛni nyɛtara shi nyɛfeɔ? Nyɛkashashaoa shi kwraa ni nyɛya nyɛyaŋɔ shikpɔŋ lɛ nyɛfea nyɛnɔ.

¹⁰ Kɛ nyɛtee lɛ, nyɛbaaya nyɛyanina gbɔmɛi ni kwɛɛɛ nɔ fɔŋ ko gbɛ. Shikpɔŋ ni da ni. Anɔkwale mli lɛ, Nyɔŋmɔ kɛhã nyɛ. Eji he ko ni shikpɔŋ nɛɛ nɔ nibii fɛɛ mli ekoeko he bɛ ona yɛ.”

¹¹ Kɛkɛ ni hii ohai ekpaa ni jɛ Danbii aweku lɛ mli ni emia kɛ tawuunii fã kɛjɛ Zora kɛ Eshtaol,

¹² ni amɛyiŋ amɛtee amɛyabɔ nsra yɛ Kiriat-Yearim yɛ Yuda. No hewɔ lɛ, atsɛɔ jɛi akɛ Dan Shitoohe kɛbashi ŋmɛnɛ. Eyɛ Kiriat-Yearim anaigbɛ.

¹³ Amɛfo mli yɛ jɛi kɛtee Efraim gɔji lɛ anɔ, ni amɛba Mika shĩa lɛ masɛi.

¹⁴ Kɛkɛ ni hii enumɔ lɛ ni tee yasara Laish shikpɔŋ lɛ bi amɛnyɛmimɛi lɛ akɛ, “Ani nyɛle akɛ shĩai nɛɛ ateŋ eko mli lɛ efod kɛ wɔji kɛ amãgã ni akpɛ kɛ amãgã ni ashwie yɛ mli lo? No hewɔ lɛ, agbɛnɛ nyɛkwɛa nɔ ni nyɛaafee.”

¹⁵ No hewɔ lɛ, amɛgba jɛi; ni amɛba Levinyo oblanyo lɛ shĩa ni ji Mika shĩa lɛ, Amɛŋã oblanyo lɛ.

¹⁶ Ni Danbii mɛi ohai ekpaa lɛ ni emia kɛ amɛtawuu nii lɛ damɔ agbo lɛ naa.

¹⁷ Ni mɛi enumɔ lɛ ni tee yasara shikpɔŋ lɛ bote shĩa lɛ mli ni amɛyahole amãgã ni akpɛ lɛ kɛ efod lɛ kɛ wɔji lɛ kɛ amãgã ni ashwie lɛ.

¹⁸ Be ni mɛi enumɔ lɛ bote Mika shĩa lɛ ni amɛyahole amãgã ni akpɛ lɛ kɛ efod lɛ kɛ wɔji lɛ kɛ amãgã ni ashwie lɛ, osɔfo lɛ bi amɛ akɛ, “Mɛni nyɛfeɔ nɛɛ?”

¹⁹ Amɛkɛɛ lɛ akɛ, “Feemɔ diŋŋ; okɛ onine ato onaabu, ni obaho ni wɔtee koni oyatsɔ̃ wɔŋaawolɔ kɛ wɔsɔfo. Te emli nɔ ni hi hã bo lɛ, akɛ oooye osɔfo ohã gbɔmɔ kome we aloo akɛ oooye ohã Israel muu fɛɛ?”

²⁰ Sane lɛ ŋɔɔ osɔfo lɛ naa. Ehole amãgã ni akɛgbaa lɛ kɛ wɔji lɛ kɛ efod ni akpɛ lɛ, ni ekɛba mɛi lɛ aŋɔɔ.

²¹ Kɛkɛ ni amɛyiŋ amɛtee. Amɛhã gbekɛbii lɛ kɛ shĩa kooloi lɛ kɛ nibii lɛ nyiɛ amɛhiɛgbɛ.

²² Be ni amɛkɛ Mika shĩai lɛ teŋ gbɛ ejekɛ lɛ, abo atsɛ mɛi ni yɔɔ shĩai ni bɛŋkɛ Mika shĩa lɛ amli lɛ, ni amɛtiu Danbii lɛ.

²³ Amɛbolɔ amɛtsɛ Danbii lɛ ayisɛɛ. Kɛkɛ ni Danbii lɛ tsɔ̃ amɛhe ni amɛbi Mika akɛ, “Mɛni feɔ bo hewɔ ni okɛ gbɔmɛi babaoo baa nɛɛ?”

²⁴ Mika to he akɛ, “Nyɛŋɔ minyɔŋmɔi lɛ ni mifee lɛ kɛ osɔfo lɛ, kɛmiiya; mɛni eshwɛ mi dɔŋŋ? Te feɔ tɛŋŋ ni nyɛbiɔ mi akɛ, ‘Mɛni feɔ bo’ lɛ?”

²⁵ Danbii lɛ kɛɛ Mika akɛ, “Kaahã anu ogbee yɛ wɔteŋ ni mlilatsɛmɛi nɛɛ miitsɛ̃ kɛmiiba onɔ ni amɛbakpãtã bo kɛ owe lɛ mli bii ahiɛ.”

²⁶ Kɛkɛ ni Danbii lɛ kɛshwie nɔ. Be ni Mika na akɛ amɛhe wa fe lɛ lɛ, etsɔ̃ ehe, ni eku esɛɛ kɛtee eshĩa.

²⁷ Danbii lɛ ŋɔ nibii ni Mika efee lɛ kɛ esɔfo lɛ, ni amɛtee Laish. Emli bii lɛ, gbɔmɛi ni yɔɔ kpoo ni amɛkwɛɛɛ efɔŋ ko gbɛ ji amɛ; shi Danbii lɛ kɛ klante gbe amɛ ni amɛshã maŋ lɛ.

²⁸ Mɔ ko bɛ ni hereɔ Laishbii lɛ, ejaakɛ maŋ lɛ kɛ Sidon jɛkɛ ni amɛ Laishbii lɛ, amɛkɛ mɔ ko mɔ ko bɛ nɔ ko feemɔ. Laish maŋ lɛ kã Bet-Rehob jɔɔ lɛ mli. Danbii lɛ saa to maŋ lɛ, ni amɛhi mli.

²⁹ Amɛkɛ amɛtsɛ Dan ni ji Yakob bi lɛ gbɛi Dan lɛ wo maŋ lɛ. Shi sa lɛ maŋ lɛ gbɛi ji Laish.

³⁰ Danbii lɛ kɛ amãgã ni akpɛ lɛ ma shi hã amɛhe. Yonatan, Mose bi Gershom bi lɛ, kɛ ebihii lɛ ye osɔfo hã Dan akutso lɛ kɛyashi gbi nɔ ni aŋɔ mɛi ni yɔɔ shikpɔŋ lɛ nɔ lɛ nom lɛ.

³¹ No hewɔ lɛ, Danbii lɛ kɛ amãgã ni akpɛ ni Mika fee lɛ ma shi hã amɛhe gbii abɔ fɛɛ ni Nyɔŋmɔ we lɛ yɔɔ Shilo lɛ.