Kojolɔi 17 - ŊMALƐ KRƆŊKRƆŊ LƐ

Mika wɔji lɛ

¹ Nuu ko ni atsɛɔ lɛ Mika hi shi yɛ Efraim gɔji lɛ anɔ.

² Ekɛɛ enyɛ akɛ, “Jwiɛtɛi kukuji akpe kome kɛ oha lɛ ni awo yɛ odɛ̃ŋ, nɔ ni olomɔ yɛ he ni owie he hu yɛ mitoiŋ lɛ, naa, eyɛ midɛŋ; mi miwo.” Enyɛ here nɔ akɛ, “Yehowa ajɔɔ bo mibi.”

³ Mika kɛ jwiɛtɛi kukuji akpe kɛ oha lɛ ku sɛɛ hã enyɛ. Kɛkɛ ni enyɛ kɛɛ, “Mijie jwiɛtɛi nɛɛ yɛ midɛŋ, ni mijɔɔ nɔ mihã Yehowa yɛ mibi lɛ hewɔ; akɛfee amãgã ni akpɛ kɛ nɔ ni ashwie; enɛ hewɔ lɛ mikɛmiiku sɛɛ mahã bo.”

⁴ Kɛkɛ ni Mika kɛ jwiɛtɛi lɛ ku sɛɛ hã enyɛ. Enyɛ kɛ jwiɛtɛi lɛ mli kukuji ohai enyɔ hã nishwielɔ, koni ekɛfee amãgã ni akpɛ kɛ nɔ ni ashwie; ni akɛba Mika we lɛ.

⁵ Nuu Mika nɛɛ yɛ he ko ni ejaa yɛ. Efee amãgã ni akɛgbaa kɛ wɔji; ni ewo ebihii lɛ ateŋ mɔ kome osɔfo koni eye osɔfo ehã lɛ.

⁶ Nɛkɛ bei nɛɛ amli lɛ, maŋtsɛ bɛ Israel; mɔ fɛɛ mɔ feɔ nɔ ni sa lɛ diɛŋtsɛ ehiɛ.

⁷ Shi oblanyo ko yɛ Betlehem ni yɔɔ Yuda lɛ. Ejɛ Yuda weku lɛ mli; Levinyo ji lɛ, ni ebato gbɔ yɛ Betlehem.

⁸ Oblanyo nɛɛ fã yɛ Betlehem ni yɔɔ Yuda lɛ koni eyahi he fɛɛ he ni eeena. Egbɛfãa lɛ mli lɛ, eyaje Mika we lɛ yɛ Efraim gɔji lɛ anɔ.

⁹ Mika bi oblanyo lɛ akɛ, “Nɛgbɛ ojɛ obaa nɛɛ?” Oblanyo lɛ to he akɛ, “Levinyo ji mi, ni mijɛ Betlehem ni yɔɔ Yuda lɛ. Miiya miyahi he fɛɛ he ni mina.”

¹⁰ Mika kɛɛ lɛ akɛ, “Okɛ mi abahi shi ni otsɔ̃ ŋaawolɔ kɛ osɔfo ohã mi. Daa afi naakplɔ lɛ, mahã bo jwiɛtɛi kukuji nyɔŋma kɛ atade kɛ oniyenii.”

¹¹ Levinyo lɛ kpɛlɛ̃ akɛ ekɛ Mika aaahi shi, ni ekɛ Mika hi shi tamɔ ebihii lɛ eko.

¹² Mika wo oblanyo lɛ osɔfo, ni oblanyo lɛ tsɔ̃ Mika osɔfo, ni ehi Mika we lɛ.

¹³ Kɛkɛ ni Mika kɛɛ, “Kpaako mina mile akɛ Yehowa baahã mashwere, ejaakɛ mina Levinyo akɛ osɔfo.”