Kojolɔi 12 - ŊMALƐ KRƆŊKRƆŊ LƐ

Yefta kɛ Efraimbii lɛ

¹ Efraim hii lɛ bua amɛhe naa kɛhã ta. Amɛfo mli kɛtee Zafon ni amɛyakɛɛ Yefta akɛ, “Mɛɛ hewɔ be ni ofã ni okɛ Amonbii lɛ yaa ayawu lɛ, obakpeee wɔ ni wɔkɛ bo aya lɛ? Wɔkɛ la baashã oshĩa lɛ wɔshwie oyiteŋ.”

² Yefta kɛɛ amɛ akɛ, “Mikɛ mimaŋbii lɛ, bei ni mli wa ba wɔ kɛ Amonbii lɛ ateŋ, shi be ni mitsɛ nyɛ lɛ, nyɛbahereee mi yɛ Amonbii lɛ adɛŋ.

³ Be ni mina akɛ nyɛhereŋ mi lɛ, mikɛ mihe wo osharã mli, ni mifã kɛyanina Amonbii lɛ. Yehowa hã miye amɛnɔ kunim. No hewɔ lɛ, mɛni hewɔ nyɛfã kɛba minɔ ŋmɛnɛ ni nyɛkɛ mi abawu lɛ?”

⁴ Kɛkɛ ni Yefta bua Gileadhii lɛ fɛɛ naa kɛkpe, ni ekɛ Efraimbii lɛ wu, ni amɛye Efraimbii lɛ anɔ kunim, ejaakɛ Efraimbii lɛ kɛɛ akɛ, “Nyɛ Gileadbii lɛ, kobɔfoi ni bafata Efraimbii kɛ Manasebii ahe ji nyɛ.”

⁵ Gileadbii tsĩ Efraimbii lɛ gbɛ yɛ hei ni afoɔ Yordan Faa lɛ yɛ lɛ. Kɛji Efraimbii ni ejo foi lɛ ateŋ mɔ ko kɛɛ akɛ, “hã mafo faa lɛ,” Gileadbii biɔ lɛ akɛ, “Ani Efraimnyo ji bo lo?” Ni kɛ ekɛɛ “Dabi” lɛ,

⁶ Gileadbii lɛ kɛɔ lɛ akɛ, “Belɛ kɛɛmɔ, ‘Shibolet’; ni kɛ enyɛɛɛ etsɛ wiemɔ lɛ jogbaŋŋ ni ekɛɛ ‘Sibolet’ ” lɛ, kɛkɛ lɛ amɛmɔɔ lɛ, ni amɛgbeɔ lɛ yɛ hei ni afoɔ Yordan Faa lɛ yɛ lɛ. Nɛkɛ be nɛɛ mli lɛ, Efraimbii lɛ ateŋ mɛi akpei nyɔŋmai ejwɛ kɛ enyɔ nyɔnyɔɔi.

⁷ Yefta nyiɛ Israel hiɛ afii ekpaa. Kɛkɛ ni Yefta, Gileadnyo lɛ gbo. Afu lɛ yɛ emaŋ lɛ mli yɛ Gilead.

Ibzan, Elon kɛ Abdon

⁸ Yefta sɛɛ lɛ, Ibzan ni jɛ Betlehem lɛ ji hiɛnyiɛlɔ ni nyiɛ Israel hiɛ.

⁹ Eyɛ bihii nyɔŋmai etɛ̃ kɛ biyei hu nyɔŋmai etɛ. Ekɛ ebiyei lɛ bahã gbãlã yɛ akutsei krokomɛi amli, ni eyaŋɔ yei nyɔŋmai etɛ̃ kɛjɛ akutsei krokomɛi amli ebahã ebihii lɛ.

¹⁰ Ibzan nyiɛ Israel hiɛ afii kpawo; kɛkɛ ni egbo. Afu lɛ yɛ Betlehem.

¹¹ Ibzan sɛɛ lɛ, Elon ni jɛ Zebulon lɛ ji mɔ ni nyiɛ Israel hiɛ. Enyiɛ amɛhiɛ afii nyɔŋma;

¹² kɛkɛ ni egbo, ni afu lɛ yɛ Ayalon yɛ Zebulon shikpɔŋ lɛ nɔ.

¹³ Elon sɛɛ lɛ, Abdon ni ji Hilel ni jɛ Piraton lɛ bi lɛ ji mɔ ni nyiɛ Israel hiɛ.

¹⁴ Eyɛ bihii nyɔŋmai ejwɛ kɛ nabii hu nyɔŋmai etɛ̃. Ebii kɛ enabii nɛɛ taraa tejii nyɔŋmai kpawo anɔ. Abdon nyiɛ Israel hiɛ afii kpaanyɔ.

¹⁵ Kɛkɛ ni Abdon, Hilel ni ji Piratonnyo lɛ bi lɛ gbo. Afu lɛ yɛ Piraton yɛ Efraim shikpɔŋ lɛ nɔ yɛ Amalekbii agɔŋ lɛ nɔ.