Kojolɔi 10 - ŊMALƐ KRƆŊKRƆŊ LƐ

Tola

¹ Abimelek sɛɛ lɛ mɔ ni te shi akɛ hiɛnyiɛlɔ ni ehere Israelbii lɛ ji Tola, Isarkanyo lɛ. Dodo bi Pua bi ji lɛ. Ehi Shamir yɛ Efraim gɔji lɛ anɔ.

² Enyiɛ Israel hiɛ afii nyɔŋmai enyɔ kɛ etɛ̃, ni egbo. Afu lɛ yɛ Shamir.

Yair

³ Tola sɛɛ lɛ, mɔ ni te shi akɛ hiɛnyiɛlɔ ji Yair, Gileadnyo lɛ. Enyiɛ Israel hiɛ afii nyɔŋmai enyɔ kɛ enyɔ.

⁴ Eyɛ bihii nyɔŋmai etɛ̃; amɛteŋ mɔ fɛɛ mɔ yɛ eteji ni etaa nɔ. Amɛyɛ maji nyɔŋmai etɛ̃ yɛ Gilead shikpɔŋ lɛ nɔ. Atsɛɔ maji nɛɛ Yair akrowai kɛbashi ŋmɛnɛ.

⁵ Yair gbo, ni afu lɛ yɛ Kamon.

Yefta

⁶ Israelbii lɛ fee efɔŋ amɛshi Yehowa ekoŋŋ. Amɛyasɔmɔ Baal nyɔŋmɔi lɛ kɛ Astarte nyɔŋmɔi lɛ ni ji Siriabii kɛ Sidonbii kɛ Moabbii kɛ Amonbii kɛ Filistibii anyɔŋmɔi lɛ. Amɛkwa Yehowa, ni amɛsɔmɔɔɔ lɛ hu.

⁷ No hewɔ lɛ, Yehowa mli wo Israel la, ni ehã Filistibii lɛ kɛ Amonbii lɛ ye Israel nɔ.

⁸ Filistibii kɛ Amonbii nɛɛ hao Israelbii lɛ ni amɛbɔ̃i amɛ nyɔŋyeli yɛ nakai afi lɛ nɔ. Amɛye Israelbii fɛɛ ni yɔɔ Yordan sɛɛ yɛ Amorbii ashikpɔŋ ni yɔɔ Gilead lɛ nɔ lɛ, nɛkɛ nyɔŋ nɛɛ afii nyɔŋma kɛ kpaanyɔ sɔŋŋ.

⁹ Agbɛnɛ hu Amonbii lɛ bafo Yordan koni amɛkɛ Yuda kɛ Benyamin we lɛ kɛ Efraim abawu. Enɛ hã Israelbii lɛ fee yeyeeye naakpa.

¹⁰ Kɛkɛ ni amɛbolɔ amɛtsɛ Yehowa amɛkɛɛ: “Wɔfee esha wɔshi bo; ejaakɛ wɔkwa bo, wɔNyɔŋmɔ lɛ, ni wɔyasɔmɔ Baal nyɔŋmɔi lɛ.”

¹¹ Yehowa kɛɛ Israelbii lɛ akɛ, “Be ni nyɛbolɔ nyɛtsɛ mi lɛ, ani jeee mi mihere nyɛ yɛ Ijiptbii kɛ Amorbii kɛ Amonbii kɛ Filistibii

¹² kɛ Sidonbii kɛ Amalekbii kɛ Midianbii ni wa nyɛ yi lɛ adɛŋ?

¹³ Shi nyɛ lɛ, nyɛkwa mi, ni nyɛyasɔmɔ nyɔŋmɔi krokomɛi moŋ. No hewɔ lɛ, mihereŋ nyɛyiwala dɔŋŋ.

¹⁴ Nyɛyaa nyɛyabolɔa nyɛtsɛa nyɔŋmɔi lɛ ni nyɛhala lɛ; amɛ, amɛhere nyɛ yɛ amanehulu be nɛɛ mli.”

¹⁵ Shi Israelbii lɛ kɛɛ Yehowa akɛ, “Wɔfee esha; bo lɛ feemɔ wɔ nɔ fɛɛ nɔ ni sa ohiɛ; shi ofainɛ ni ojie wɔ ŋmɛnɛ kɛkɛ.”

¹⁶ No hewɔ lɛ, amɛ jie nyɔŋmɔi krokomɛi lɛ amɛshwie, ni amɛsɔmɔ Yehowa. Amɛnii fee Yehowa mɔbɔ yɛ amɛmanehulu lɛ hewɔ.

¹⁷ Agbɛnɛ Amonbii lɛ hoo ta ni amɛbabɔ nsra yɛ Gilead. Israelbii hu bua amɛhe naa, ni amɛyabɔ nsra yɛ Mizpa.

¹⁸ Kɛkɛ ni Gilead maŋbii lɛ kɛ amɛlumɛi lɛ fɛɛ bibii amɛhe akɛ, “Namɔ ji nuu ni kɛ Amonbii lɛ aaababɔ̃i wuu? Lɛ eeefee Gileadbii fɛɛ anukpa.”