Hosea 8 - ŊMALƐ KRƆŊKRƆŊ LƐ

Yehowa bu Israel fɔ yɛ amãgãjamɔ hewɔ

¹ Yehowa kɛɛ akɛ, “Kpã tɛtɛrɛmantɛrɛ lɛ okɛhɛle mɛi ashi. Henyɛlɔ miiba tamɔ okropɔŋ ebayi Yehowa we lɛ nɔ, ejaakɛ mimaŋbii lɛ eku mi kɛ amɛ kpãŋmɔ lɛ mli, ni amɛtɔ̃ mimla lɛ nɔ.

² Mi amɛbolɔɔ amɛtsɛɔ akɛ, ‘WɔNyɔŋmɔ, bo ji mɔ ni wɔ, Israelbii, wɔle.’

³ Israelbii ekwa nɔ kpakpa lɛ, no hewɔ lɛ, henyɛlɔi aaanyiɛ amɛsɛɛ.

⁴ “Amɛto maŋtsɛmɛi, shi jeee mi minɔ amɛtsɔ̃; ni amɛhole lumɛi hu ni mileee mli eko kwraa. Amɛkɛ amɛjwiɛtɛi kɛ amɛshika fee amãgãi ni baakpãtã amɛ nɔŋŋ amɛhiɛ.

⁵ Mitaooo tsinabi ni ajaa yɛ Samaria maŋ lɛ mli lɛ kwrakwra. Mimli ewo amɛ la naakpa. Mɛɛ beyinɔ po amɛaaba amɛjeŋ jogbaŋŋ yɛ Israel?

⁶ Ŋaalɔ ko ni fee tsinabi lɛ; shi naa, jeee Nyɔŋmɔ ni. Nakai tsinabi lɛ ni ajaa yɛ Samaria lɛ, aaajwara lɛ dukuduku.

⁷ Ejaakɛ akɛni amɛdu kɔɔyɔɔ lɛ lasuogbele ji yibii ni amɛbaakpa. Abele ekpɛŋ bi kome nɛkɛ ni aaana aye. Ni kɛji abele lɛ aaaba tete lɛ, gbɔi moŋ aaabaye.

⁸ Majimaji lɛ emi Israel momo, ni enɛ ehã etsɔ̃ tamɔ tsɛnsi ko ni he bɛ sɛɛnamɔ.

⁹ Ejaakɛ Israel tsɔ̃ tamɔ ŋaŋ teji ni miifo shi. Etee eyabi Asiria dɛŋ yelikɛbuamɔ; asaŋ Efraim bɔ maŋsɛɛbii apaa koni amɛbu ehe.

¹⁰ Amɛbɔ majimaji apaa moŋ, shi agbɛnɛ mibabua amɛnaa kɛkpe, ni magbala amɛtoi. Biɛ be kukuoo mli lɛ amɛbaakpa maŋtsɛmɛi kɛ lumɛi too.

¹¹ “Israelbii mamɔɔ afɔleshãa latɛi koni amɛkɛdãi esha ni amɛfee lɛ, shi afɔleshãa latɛi lɛ moŋ etsɔ̃ eshafeemɔ nɔ.

¹² Kɛji miŋma mimlai lɛ shii akpei abɔ tete mihã amɛ lɛ, amɛbaaŋɔ mlai lɛ akɛ mɔkpɔŋ dɛŋ nii.

¹³ Amɛsumɔɔ afɔleshãa. Amɛgbeɔ kooloi amɛkɛshãa mifɔlei lɛ akɛ loo kɛkɛ ni ayeɔ. Eji nɔ ko ni esaaa mihiɛ. Ni no hewɔ lɛ, agbɛnɛ mibakai eshai ni amɛfee lɛ ni mibawo amɛ he nyɔmɔ. Ijipt kɛ̃ amɛaaku amɛsɛɛ kɛaatee.

¹⁴ “Ejaakɛ Israel hiɛ kpa ebɔlɔ lɛ nɔ, ni emamɔ mɔji moŋ ehã ehe; ni Yuda hu tswa gbogbo ewo emaji pii ahe. Shi mawo amɛmaji lɛ amli la ni mashã amɛmɔji lɛ.”