Hosea 6 - ŊMALƐ KRƆŊKRƆŊ LƐ

Maŋbii ejeee amɛhe sɛɛ anɔkwale mli

¹ Maŋbii lɛ aaakɛɛ akɛ, “Nyɛbaa koni wɔkpalea kɛyaa Yehowa ŋɔɔ. Akɛni lɛ etserɛ wɔmli lɛ, lɛ eeetsa wɔ; ni akɛni lɛ etswia wɔ nii lɛ, lɛ eeefi nɔ ehã wɔ.

² Gbii enyɔ sɛɛ lɛ, eeetsĩɛ wɔ, ni gbi ni ji etɛ̃ lɛ nɔ lɛ eeetee wɔ shi, ni wɔ kɛ lɛ aaahi shi.

³ Nyɛhãa wɔbɔa mɔdɛŋ wɔlea Yehowa. Bɔ ni ŋwanejee ko bɛ he akɛ daa gbi lɛ je tsɛreɔ lɛ, nakai nɔŋŋ ŋwanejee ko bɛ he akɛ Yehowa baajie ehe kpo etsɔ̃ɔ wɔ. Ebaaba wɔŋɔɔ tamɔ Agbiɛnaa nunɛmɔ tueɔ shwieɔ shikpɔŋ lɛ nɔ lɛ.”

⁴ Shi Yehowa kɛɔ akɛ, “Ao! Israel, mɛni mafee ohe? Ao! Yuda, te mafee bo tɛŋŋ? Ejaakɛ osuɔmɔ lɛ etamɔ leebi atatu; etamɔ leebi bɔ ni kpalaa oya.

⁵ No hewɔ ni mitsɔ̃ gbalɔi lɛ anɔ migbala amɛtoi, ni mikɛ midaaŋ wiemɔi lɛ kã amɛ, ni kojomɔ ni mikojo amɛ lɛ tsɔ̃ tamɔ kane.

⁶ Ejaakɛ nɔ ni mitaoɔ yɛ nyɛdɛŋ ji suɔmɔ ni tsakeee shi jeee afɔle; nɔ ni mitaoɔ ji lee ni aleɔ Nyɔŋmɔ shi jeee shãaafɔle.

⁷ “Shi amɛ lɛ amɛtɔ̃ kpãŋmɔ lɛ nɔ tamɔ bɔ ni Adam fee lɛ, ni amɛyeee mi anɔkwa.

⁸ Gilead lɛ nɔfɔŋfeelɔi amaŋ ni, ni lá ewu amɛhe.

⁹ Tamɔ bɔ ni ojotswalɔi woɔ mɔ ka lɛ, nakai nɔŋŋ pɛ osɔfoi lɛ efee ekome amɛgbeɔ mɛi, ni amɛfeɔ nishaianii yɛ Shekem gbɛteŋ.

¹⁰ Mina gbeyei nii ko yɛ Israel: Efraim kɛ amãgãjamɔ miibɔ ajwamãŋ yɛ jɛi; abule Israel.

¹¹ “Ni bo, Yuda, hu mito be ni nɔ ni oduɔ amrɔ nɛɛ lɛ, obaakpa eyibii.