Hosea 5 - ŊMALƐ KRƆŊKRƆŊ LƐ

¹ “Nyɛ Osɔfoi, nyɛboa sane nɛɛ toi! Nyɛ Israelbii, nyɛkaa toi! Nyɛ maŋtsɛ we lɛ mli bii, nyɛfea toi, shi naa, abaakojo nyɛ fɛɛ, ejaakɛ nyɛfee nyɛhe tamɔ akpa ni atsɔ̃ yɛ Mizpa, kɛ yaa ni akɛlɛɛ shi yɛ Tabor Gɔŋ lɛ nɔ.

² Efɔŋfeelɔi lɛ ebote nyɛnyɛŋtswibɔɔ mli vii yɛ Akasia maŋ lɛ mli, mibagbala amɛteŋ mɔ fɛɛ mɔ toi waa diɛŋtsɛ.

³ Mile Efraim bɔ ni eyɔɔ tsɔ̃; no hewɔ lɛ, Israel kɛ ehe eteko mi. Ejaakɛ amrɔ nɛɛ lɛ, Efraim, oje misɛɛ, ni Israel ebule ehe.”

Hosea bɔ wɔŋjamɔ he kɔkɔ

⁴ “Amɛnifeemɔnii hewɔ lɛ amɛnyɛɛɛ amɛsɛɛ amɛku kɛba amɛNyɔŋmɔ lɛ ŋɔɔ, ejaakɛ ajwamãŋbɔɔ mumɔ ebote amɛmli, ni no hewɔ lɛ, amɛleee mi, Yehowa dɔŋŋ.

⁵ Israel shwãa nii lɛ miiye odase moŋ eeshi lɛ nɔŋŋ. Israel kɛ Efraim hiɛ baakpãtã, ni Yuda hu kɛ amɛ fɛɛ hiɛ baakpãtã.

⁶ Amɛkɛ amɛtoi kɛ amɛtsinai baaya ayashã afɔle kɛtao Yehowa sɛɛgbɛ, shi amɛnaŋ lɛ, ejaakɛ Yehowa egbala ehe shi eshi amɛ.

⁷ Akɛni amɛje Yehowa sɛɛ hewɔ lɛ, amɛyafɔ gbɔi abii. Shi nyɔŋ hee ni baaje lɛ mli lɛ abaakpãtã amɛ kɛ amɛshikpɔŋ fɛɛ hiɛ.”

Yuda kɛ Israel kɛ amɛhe wu ta

⁸ “Akpã ta tɛtɛrɛmantɛrɛ yɛ Gibea! Akpã koofɛŋ lɛ yɛ Rama! Abɔ oshe yɛ Bet-Aven! Ohe akpokpo, Benyamin!

⁹ Gbi nɔ ni abaagbala Efraim toi lɛ, ebaatsɔ̃ amaŋfɔ̃. Naa, nɔ ni baaba Israel akutsei lɛ anɔ lɛ no mikɛɛ nɛɛ.

¹⁰ “Yuda lumɛi lɛ tsiɔ husu kɛyaa sɛɛ kɛjuɔ shikpɔŋ. Mahã mimlifu ate shi awo amɛ tamɔ nu ni etue.

¹¹ Efraim kã piŋmɔ mli. Nyɔŋmɔ ebu lɛ fɔ ejaakɛ etswa efai shi akɛ eyaanyiɛ yaka nii asɛɛ.

¹² No hewɔ lɛ, mi diɛŋtsɛ mitsɔ̃ omlɛgɛ ni baaye Efraim, kɛ fala ni baakpãtã Yuda hiɛ.

¹³ “Be ni Israel na hela ni emɔ lɛ lɛ, ni Yuda hu na fala ni efã lɛ, Efraim tee Asiria maŋtsɛ kpanaa lɛ ŋɔɔ eyabi edɛŋ yelikɛbuamɔ, shi Asiria nyɛɛɛ amɛ tsofa efee aloo etsa amɛ.

¹⁴ Mibahuru tamɔ jata mayi Israel kɛ Yuda hu nɔ, ni mi diɛŋtsɛ mibatserɛ amɛmli, kɛkɛ lɛ mishi amɛ mitee. Mashãtã amɛ kɛya ni mɔ ko mɔ ko nyɛŋ amɛyiwala ehere.

¹⁵ “Mibagbala mihe shi mashi amɛ kɛyaashi amɛaakpɛlɛ̃ amɛtɔ̃mɔ nɔ, ni amɛaabatao misɛɛgbɛ. Ekolɛ fimɔ be lɛ mli lɛ amɛaatao mi.”