Hosea 2 - ŊMALƐ KRƆŊKRƆŊ LƐ

¹ No hewɔ lɛ, nyɛkɛa nyɛnyɛmimɛi hii, Israelbii, lɛ akɛ Ammi, “Mimaŋ ji amɛ” kɛ nyɛmimɛi yei lɛ hu akɛ Ruhama, “Mimusuŋ etsɔ̃ mi yɛ amɛhe.”

Gomer yeee anɔkwa lɛ, Israel hu yeee anɔkwa

² “Mibii, nyɛkɛ nyɛnyɛ awiea, ejaakɛ jeee miŋa ji lɛ dɔŋŋ; ni mi hu jeee ewu ji mi. Nyɛkɛ lɛ awiea koni ekpa ejwamaŋbɔɔ lɛ, ni efo egblãfitemɔ lɛ sɛɛ.

³ Kɛjeee nakai lɛ maŋmɛ lɛ yayai tamɔ gbi ni afɔ lɛ lɛ; mahã etsɔ̃ tamɔ ŋa nɔ shikpɔŋ ni nɔ egbi, ni mikɛ kumai baagbe lɛ.

⁴ Asaŋ minaŋ emusuŋbii lɛ hu amɔbɔ, ejaakɛ yoo ajwamãŋ bii ji amɛ.

⁵ Ejaakɛ amɛnyɛ bɔ ajwamãŋ; efee hiɛgbejianii kɛna amɛ musu. Ekɛɛ ehe akɛ, ‘Hã maya mayatiu mishieŋtsɛmɛi lɛ; amɛ amɛhãa mi niyenii kɛ nu kɛ mikuntu kɛ klala lɛ kɛ mimu kɛ dãa.’

⁶ No hewɔ lɛ, agbɛnɛ mikɛ ŋmei baafo ehe afabaŋ, ni matswa gbogbo kɛsa eyi koni matsi lɛ gbɛ.

⁷ Eeetiu eshieŋtsɛmɛi lɛ asɛɛ nɛ, shi eninaŋ amɛ; ni eeetao amɛ, shi enaŋ amɛ. Kɛ̃lɛ lɛ eeekɛɛ ehe akɛ, ‘Hã makpale kɛya miklɛŋklɛŋ wu lɛ ŋɔɔ; ejaakɛ be ni mikɛ lɛ yɔɔ lɛ, ehi hã mi moŋ fe amrɔ nɛɛ.’

⁸ Te eŋɔɔɔ nɔ akɛ mi ji mɔ ni hã lɛ abele kɛ wain kɛ mu kɛ jwiɛtɛi kɛ shika lɛ fɛɛ ni amɛkɛjaa jemawɔŋ Baal lɛ.

⁹ No hewɔ lɛ, mashɔ̃ mibele lɛ kɛ wain lɛ hu kɛ kuŋtu kɛ klala ni enaa ebuɔ lɛ.

¹⁰ Maŋmɛ lɛ yayai agbɛnɛ matsɔ̃ɔ eshieŋtsɛmɛi lɛ; ni mɔ ko mɔ ko nyɛŋ lɛ ahere yɛ midɛŋ.

¹¹ Mafo mliflimɔ gbii juji ni eyeɔ lɛ fɛɛ asɛɛ, nyɔji hei kɛ afi gbii juji lɛ, kɛ hejɔɔmɔ gbii lɛ.

¹² Ni maŋala ewaintsei lɛ kɛ agbãmi tsei lɛ ni ekɛɔ akɛ nomɛi ji nɔ ni enaa yɛ eshieŋtsɛmɛi lɛ adɛŋ akɛ enyɔmɔwo lɛ. Mahã fɛɛ atsɔ̃ koo koni ŋaŋ kooloi aye amɛnɔ nii.

¹³ Magbala etoi yɛ tsofakɛŋma ni etee eyashã ehã Baal jemawɔji yɛ amɛgbii juji lɛ anɔ lɛ hewɔ. Ewula kɛ jwinei kɛtee eyanyiɛ eshieŋtsɛmɛi lɛ asɛɛ, ni ehiɛ kpa minɔ.” Nɔ ni Yehowa kɛɔ nɛ.

Suɔmɔ ni Yehowa yɔɔ hã ewebii

¹⁴ “No hewɔ lɛ, mibagbe eyitso ni mi kɛ lɛ aaatee ŋa lɛ nɔ ekoŋŋ; mi kɛ lɛ aaayawie naajɔlɛ wiemɔ yɛ jɛi koni eyiŋ atsɔ̃ kɛba shĩa.

¹⁵ Makpale ewain tromi lɛ mahã lɛ, ni mahã Amanehulu Jɔɔ lɛ atsɔ̃ Hiɛnɔkãmɔ Agbo ahã lɛ. Eeehere mi nɔ tamɔ efee yɛ eblayeiaŋ lɛ be ni ejɛ Ijipt eba lɛ.

¹⁶ Nakai be lɛ ebaatsɛ mi ‘Miwu’ ekoŋŋ, shi jeee ‘MiBaal’ dɔŋŋ.

¹⁷ Ejaakɛ mibakɔ jemawɔji Baali lɛ agbɛii yɛ edaaŋ; ni etsiŋ amɛtã tete po dɔŋŋ.

¹⁸ “Nakai be lɛ mli lɛ, mikɛ ŋaŋ kooloi kɛ loofɔji kɛ shikpɔŋ lɛ nɔ nibii ni wamɔɔ fɛɛ aaakpãŋ yɛ nyɛhewɔ koni amɛkaye nyɛ awui; ni makumɔ gãi kɛ klante amli, ni mahã tawuu sɛɛ afo yɛ shikpɔŋ lɛ nɔ, ni nyɛbaahi shi shweshweeshwe.

¹⁹ “Israel, mibatsɛ ohe baa akɛ miŋa kɛaatee naanɔ; Maye bo anɔkwa, ni maye bo jalɛ sane, Masumɔ bo, ni mimusuŋ aaatsɔ̃ mi yɛ ohe.

²⁰ Maye mishiwoo nɔ, ni mafee bo miŋa, ni ooole akɛ mi ji Yehowa.

²¹ Nakai be lɛ mahã mimɛi, Israelbii, asɔlemɔ lɛ hetoo.

²² Mahã nu anɛ shikpɔŋ lɛ nɔ koni shikpɔŋ lɛ aba abele kɛ wain kɛ mu ahã Israel.

²³ Mahã mimɛi lɛ ahe shi yɛ shikpɔŋ lɛ nɔ, ni mahã amɛshwere. Mɛi ni atsɛ amɛ akɛ ‘Mɔbɔnalɛ etã’ lɛ, kɛ mɛi hu ni atsɛ amɛ akɛ ‘Nyɛjeee mimɛi’ lɛ, mibana amɛ fɛɛ mɔbɔ. Ni makɛɛ amɛ akɛ, ‘Mimɛi ji nyɛ,’ ni amɛaahere nɔ akɛ ‘bo ji wɔNyɔŋmɔ lɛ.’ ”