Hosea 13 - ŊMALƐ KRƆŊKRƆŊ LƐ

Naagbee fɔ ni abu Israel

¹ Kulɛ kɛji Efraim shwiei lɛ wie lɛ, mɛi ahe kpokpoɔ yɛ Israel. Awo Efraim nɔ yɛ Israel; shi kɛtsɔ̃ jemawɔŋ Baal jamɔ nɔ lɛ, Efraim shwiei lɛ tɔ̃, ni no hewɔ amɛgboi.

² Amɛkã he amɛmiifee esha lɛ lolo kɛbashi ŋmɛnɛ ejaakɛ amɛkɛ amɛjwiɛtɛii yahãa ŋaalɔi, ni amɛhãa akɛ jwiɛtɛi lɛ shwieɔ amãgãi kɛ wɔji ahãa amɛ. Kɛkɛ lɛ amɛkɛɔ akɛ, “Ashã afɔle ahã amɛ!” Mɛi ni yashãa afɔlei lɛ shwɔɔ tsinabi amãgãi lɛ anaa.

³ No hewɔ lɛ, gbɔmɛi nɛɛ baalaaje tamɔ tutuu ni kɔɔyɔɔ loɔ kɛjɛɔ ŋmãagbeemɔhe kɛyaa lɛ, aloo tamɔ leebi bɔ ni kpalaa, loo afua ni hoɔ oya.

⁴ Yehowa kɛɛ, “Mi ji Yehowa, nyɛNyɔŋmɔ lɛ, ni here nyɛyiwala kɛjɛ Ijipt shikpɔŋ lɛ nɔ beebe lɛ. Nyɛleee Nyɔŋmɔ ko akɛ ja mi; ni mi misɛɛ hu lɛ yiwalaherelɔ ko bɛ dɔŋŋ.

⁵ Mikwɛ nyɛnɔ yɛ shiaŋa ni nu bɛ nɔ lɛ nɔ,

⁶ shi be ni nyɛna nii nyɛye ni nyɛtɔrɔ pɛ, kɛkɛ ni nyɛwo nyɛhe nɔ ni nyɛhiɛ kpa minɔ.

⁷ No hewɔ lɛ, mibahuru mayi nyɛnɔ tamɔ jata; mibawo nyɛ ka tamɔ mlaŋtswi yɛ gbɛtoi.

⁸ Mibatua nyɛ oookɛɛ oshishibrishi ni amɔmɔ ebii yɛ ehe tuaa mɔ, ni mibatserɛ nyɛmli maye yɛ minajiaŋ tamɔ jata. No ji akɛ mibatserɛ nyɛmli mɛnyɛmɛnyɛ tamɔ ŋaŋ kooloo awuyelɔ tsɛrɛɔ loo mli lɛ.

⁹ “Kwɛ, Israel! Mibakpãtã ohiɛ; ni namɔ aaanyɛ oyiwala ahere?

¹⁰ Nɛgbɛ omaŋtsɛ lɛ yɔɔ koni ehere oyiwala; aloo nɛgbɛ nyɛlumɛi lɛ ni baafã nyɛhe lɛ yɔɔ, mɛi ahewɔ ni nyɛbi akɛ, ‘Ahã wɔ maŋtsɛ kɛ lumɛi lɛ?’

¹¹ Mihã nyɛ maŋtsɛmɛi, shi yɛ mlifu naa; ni miŋɔ amɛ kɛtee yɛ mlila naa.

¹² “Abua Israel nishaianii lɛ kɛ etɔ̃mɔi lɛ anaa ato ahã lɛ.

¹³ Yoofɔyoo kɔ̃ɔmɔ be miiba ehã Israel; shi ehe bi kwashia ni eji hewɔ lɛ, emaaa eyi shi ebaaa awosojwaahe lɛ.

¹⁴ Mibahereŋ amɛ yɛ gbohiiaje dɛŋ; mibaŋ amɛyi yɛ gbele mli? Gbele, nɛgbɛ otsɛŋemɔ hela yɔɔ; ni Gbohiiaje, nɛgbɛ oniiahiɛkpãtãmɔ lɛ yɔɔ? Minaŋ gbɔmɛi nɛɛ mɔbɔ dɔŋŋ.

¹⁵ Israel aaafrɔke tamɔ ŋɔi, shi bokã kɔɔyɔɔ ni mli edɔ la lɛ, ni ji Yehowa kɔɔyɔɔ lɛ, baafã kɛjɛ ŋa lɛ nɔ kɛba; ebaŋala amɛnuhiŋmɛii kɛ nubui fɛɛ amli nu; asaŋ eeekpãtã amɛnɔ fɛɛ nɔ ni yɔɔ jara hiɛ.

¹⁶ Samaria yi sɔ̃ lɛ baatere lɛ diɛŋtsɛ; emli bii lɛ ahiɛ aaakpãtã yɛ ta mli, akɛ emli abifabii lɛ aaatswiatswia shi; ni aaagbala amɛyeihɔlɔi lɛ amli.”